نیكۆتین Nicotine و مادە ژەهراوییەكانی تری ناو دوكەڵی جگەرە كاریگەرییەكی گەورەیان هەیە لەسەر رزگاربوونی لەش لە مادە زییانبەخشەكان. جگەرەكێشان دەبێتە ئەگەری تێكدانی خانەكان كە ئەمەش هۆكارە بۆ نەخۆشی شێرپەنجە، بەرزبوونەوەی ئاستی كۆلیستیرۆل، نەخۆشی لە خوێنبەرەكانی تاجی دڵدا، نەخۆشی لە بۆریە خوێنیەكانی لەش بە گشتی، نەخۆشی لە كۆئەندامی هەناسەدا، زیادبوونی ئەگەری لاوازبوونی ئێسك. جگەرەكێشان كاریگەرییەكی نێگەتیڤ دەكاتە سەر هەڵمژینی گەلێك ڤیتامین و كانزا كە زۆر گرنگن بۆ لەش. جگەرەكێشان زیاتر لە هەموو ڤیتامینەكان گرفت بۆ ڤیتامین C پەیدادەكات. ڤیتامین C یەكێك لە مادە دژەئۆكسانەكانی لەش كە رۆڵی بەرچاویان هەیە بۆ پاراستنی لەش لە چەندین نەخۆشی. هەر چەند زیاتر جگەرە بكێشیت، هێندە ڤیتامین C لە ناو خوێن و لە خانەكانی لەشدا ون دەبێت، ئەوەش وا لە لەش دەكات كە پێویستی بە بڕی زیاتری ڤیتامین C بێت بۆ قەرەبووكردنەوەی ئەو زیانانەی كە لە ئەنجامی جگەرەكێشانەوە بە خانەكانی لەش گەیشتووە. بۆ ئەم مەبەستە، جگەرەكێش رۆژانە پێویستی بە نزیكەی 2000 ملگم ڤیتامین C هەیە. دابینكردنی ئەم رێژە بەرزەی ڤیتامین C تەنها لە رێگای خۆراكەوە كارێكی ئاسان نییە، بۆیە دەبێ ڤیتامین C لە رێگای دەرمان یان یارمەتیدەرەكانی خۆراكەوە Supplements وەربگیرێت. جگەرەكێشەكان پێویستە كە رێژەیەكی بەرز لە مادە دژەئۆكسانەكان وەربگرن كە بە شێوەیەكی سەرەكی لە سەوزە و میوەدان. بەهەرحاڵ، دەبێ ئەم راستییە بزانرێت كە هیچ خۆراكێك یان یارمەتیدەری خۆراك یان مادە دژەئۆكسانەكان بە تەواوی لەشت ناپارێزن لە زیانەكانی جگەرەكێشان.

گوڵان