ه‌وئێمێلانه‌ی بۆم دێت هه‌ندێ رۆژ ده‌گاته په‌نجا دانه، له‌ناو ئه‌مانه‌دا بابه‌تی زۆر به‌تام و چێژی تێدایه،و هه‌ندێكیان هه‌ندێ جار ده‌مگریه‌نن، و كاركردیان له‌سه‌ر دڵ و ده‌روونم زۆره.. یه‌كێ له‌و ئێمێلانه ئه‌م بابه‌ته‌ی به‌رده‌ستانه، هه‌روه‌ك مامۆستای وتاربێژ باسی ده‌كات بابه‌تێكه ته‌نیا باوه‌ڕدارانی راسته‌قینه بۆیان ده‌سه‌لمێت، ده‌نا له‌روانگه‌ی مادییه‌وه شتی وا مه‌حاڵه..
منیش ده‌ڵێم: ئه‌وانه‌ش كه خاوه‌نی ته‌جروبه‌ن و به‌چاویخۆیان شتی له‌وه گه‌وره‌تریان دیوه، ئه‌وانه‌ش بۆیان ده‌سه‌ڵمێ.. فه‌رموون بابه‌ته‌كه بخه‌ینه به‌رده‌ستان و خۆتان حه‌كه‌م بن..
ئافره‌ته ئیشكه‌ره‌كه‌یان ناوبه‌ناو ده‌ڕۆیشته حه‌مامه‌كه‌و شیری سنگی دا ده‌دۆشی. رووداوێكی سه‌یر ته‌نیا خاوه‌ن باوه‌ڕ بۆی ده‌سه‌لمێ.. مامۆستا ده‌ڵێ: براده‌رێكی رووله‌خوا ومتمانه پێكراوی خه‌ڵكی شارۆچكه‌ی { حوره‌یمیلا }ی نزیكی {ریاز}ی پایته‌خت بۆی گێڕامه‌وه، كه ئافره‌تێكی ناسراویان له هه‌مان شارۆچكه‌دا تووشی سه‌ره‌تانی خوێن ده‌بێت، -خوا هه‌موو لا یه‌كمان له‌و به‌ڵایه بپارێزێت- له‌به‌ر ئه‌وه پێویستی به كه‌سێك ده‌بێت خزمه‌تی بكات و كاری ناوماڵی بۆ بكات، ئه‌وانیش ئافره‌تێكی ئه‌نده‌نووسی بۆ دێنن، ئه‌م ئافره‌ته تا ده‌ست هه‌ڵبخه‌یت دیندار و ره‌وشت به‌رز ده‌بێت.. پاش هه‌فته‌یه‌ك له‌هاتنی خزمه‌تكاره‌كه ژنه‌ی خاوه‌ن ماڵ هه‌ست ده‌كات، ئه‌م كاره‌كه‌ره زوو زوو ده‌چێته سه‌ر ئاو مانه‌وه‌شی عاده‌تی نییه، رۆژێك پرسیاری لێ ده‌كات: ئه‌وه هۆی چییه وا زوو زوو ده‌ڕۆیته سه‌ر ئاو، و زۆریش ده‌مێنیته‌وه؟
خزمه‌تكاره‌كه‌ش دڵی پڕ ده‌بێت وده‌داته پڕمه‌ی گریان..
لێی ده‌پرسێ هۆی چییه وا ده‌گریت؟ ئایا به‌و پرسیاره ناڕه‌حه‌تم كردیت؟
ئه‌ویش ده‌ڵێت.. به‌پرسیاره‌كه‌ی تۆ ناره‌حه‌ت نه‌بووم، به‌ڵام كاتێ ئه‌و كومپانیایه‌ی كارمان بۆ په‌یدا ده‌كات په‌یوه‌ندی پێوه‌كردم، ته‌نیا بیست رۆژبوو كوڕه‌كه‌م له‌دایك بووبوو، له‌به‌ر ئه‌وه‌ی كه زۆر پیێویستیمان به‌پاره هه‌بوو نه‌م ویست ئه‌م هه‌له‌م له‌كیس بچێت، كوڕه‌كه‌م به‌جێ هێشت و هاتم.. ئێستاش كه زۆر له‌سه‌ر ئاو ده‌مێنمه‌وه مه‌مكه‌كانم ده‌دۆشم بۆئه‌وه‌ی سووك ببن چونكه پڕ له‌شیرن..!!
كاتێ ئافره‌تی خاوه‌ن ماڵ به‌م مه‌سه‌له‌یه ده‌زانێت له‌نزیكترین گه‌شتی ئه‌نده‌نووسیدا تكتی بۆ ده‌بڕێت، وپاره‌كه‌ی بۆ ده‌دات، وبانگی ده‌كات و پێی ده‌ڵێ: ئه‌مه پاره‌ی حه‌قی خزمه‌تكردنی دوو ساڵی ته‌واوته پێشه‌كی پێت ده‌ده‌م بگه‌ڕێره‌وه بۆ ئه‌نده‌نووسیا بۆلای كوڕه‌كه‌ت شیری بده‌رێ و خزمه‌تی بكه.. پاش دوو ساڵی تر ده‌توانی سه‌رمان لێ بده‌یت!! ئیتر ژماره‌ی ته‌له‌فونی خۆیانی ده‌داتێ هه‌ركاتێ ئاره‌زووی لێ بوو پاش دوو ساڵه‌كه بگه‌ڕێته‌وه بۆلایان..
پاش گه‌ڕانه‌وه‌ی خزمه‌تكاره‌كه به هه‌فته‌یه‌ك ئافره‌تی خاوه‌ن ماڵ مه‌وعیدی لای دكتۆری ده‌بێت بۆ ئه‌وه‌ی خوێنه‌كه‌ی بۆ بپشكنرێت.. له‌كاتی ئه‌نجامی پشكنینه‌كه‌دا ناكاوێكی سه‌یر روو ده‌دات!! شوێنه‌واری سه‌ره‌تان له‌ناو خوێنا نه‌ماوه!! دكتۆر داواده‌كات چه‌ند جارێك شیته‌ڵكردنی خوێنه‌كه‌ی بۆ دووباره ده‌كه‌نه‌وه به‌ڵام ئه‌نجامه‌كه‌ی هه‌ر یه‌كێكه.. !!
دكتۆر سه‌رسام ده‌بێ له‌م چاره‌سه‌ره‌ی، چونكه نه‌خۆشییه‌كه مه‌ترسیدار بوو..
پاشان ده‌ینێرێت بۆ تیشك ده‌بینێت رێژه‌ی سه‌ره‌تان سفرله‌سه‌ده.. ئیتر دكتۆر دڵنیا ده‌بێت كه‌به‌ته‌واوی چاره‌سه‌ری بووه..بۆیه لێی ده‌پرسێت: چ چاره‌سه‌رێكت به‌كارهێناوه؟
ئه‌ویش ده‌ڵێت: ئه‌و چاره‌سه‌رییه‌م به‌كارهێناوه كه پێغه‌ممه‌ر صلى الله علیه وسلم بۆی نووسیوم، ئه‌بو ئومامه ده‌فه‌رموێ: پێغه‌ممه‌ر صلى الله علیه وسلم فه‌رمووی: نه‌خۆشه‌كانتان به خێركردن چاره‌سه‌ر بكه‌ن..
سه‌رچاوه : سایتی م.حه‌سه‌ن پێنجوێنی