[size=16]

لە ئەمڕۆدا ئاواز و گۆرانی كوردی بەگشتی ئەوەندەی لە چەند و ژمارەدا زۆ بووە، لە چۆنایەتیدا كزەو مەگەر دەگمەن ئاوازی بەشی زۆری ئەو گۆرانیانەتێك ببیستی لە ئاستێكی موزیكی و هونەری بەرزدابێت.  بەشی زۆری ئەو گۆرانیانە تێكەڵیەكی بێ سەر و بەری لەگۆرانی توركی و فارسی و عەرەبی و بەشی هەرە زۆری گۆرانیبێژەكانیش ئاگایان لە كەللتوری گۆرانی و موزیك نیە. دیارە من لێرەدا مەبەستم ئەو نیە كە ئەبێ گۆرانی كوردی بەدەر بێ لەكاریگەریتی گۆرانی و موزیكی دەورو بەر، بەڵام نابێ مۆرك و تایبەتمەندی گۆرانی كوردی وون بكرێ، واتە ئەو كاریگەریەتیە نابێ بگاتە ئەو شوێنەی كە كەللتوری دەورووبەردا بتوێنێتەوە.

لە نێو شەپۆلە تازەكانی گۆرانی مۆزیكی كوردیدا، لەو ساڵانەی دواییدا، (زیاد ئەسعەد) بە گوڕوتین و تۆنێكی تاسە شكێنەوە هاتە نامانەوە و هەندێ سنوری تەقلیدی بەزاندو دڵ و گوێچكەمانی بە ریتمی تازەو داهێنەرانە زاخاو دایەوە،
چۆن و بۆچی ؟!
یەكەم : لەبەر ئەوەی لاسایی كەرەوە و تەقلیدی نەبوو، واتە هەمان سەدای گۆرانییەكانی رابردووی نەدایەوە بەگوێچكەماندا فۆلكلۆریشی بۆ خۆی نەكرد بە بەندینخانە.
دووەم : هونەرمەند (زیاد ئەسعەد) بە تەنها هەر بەهرە و سەلیقە نییە، بەڵكو لە هەمان كاتدا شارەزایی دنیای موزیك و مەقامات ئەزانێت چی ئەكات و عاشقانە لەگەڵ كارەكەی خۆیدا هەڵس و كەوت ئەكات، یان ئەتوانم بڵێم (مۆسیقاو گۆرانی بووە بەدڵدار و تەنانەت – هاوسەری ئەو).
(زیاد ئەسعەد) هەموو ژیانی خۆی داوە بە هونەرەكەی و تەنانەت بۆ چركە ساتێ لێ دوور نەكوتۆتەوە. بەشی زۆری گۆرانییەكانی تری ئەم سەردەمە، گۆرانیەكانیان تەمەنیان كورتە زۆر زوو بیر ئەچنەوە، بەڵام بە شێكی باشی گۆرانییەكانی هونەرمەند (زیاد ئەسعەد) وا لەسەر زاری گەنجەكانەوە و ئەوترێنەوە. كە ئەمەیش بۆ خۆی بەڵگەیەكی زیندووە بۆ زیندوویتی ئەو گۆرانیانە، (زیاد) جگە لەوەی خۆی دەنگی خۆشە، لەهەمان كاتدا ئاواز دانەرێكی بەتوانایە چەندیین گۆرانی بۆ گۆرانیبێژە ناسراوەكانی ئەم سەردەمە داناوە.
(زیاد ئەسعەد) بەچاكی ئاگای لەكەللتوری گۆرانی كوردییە، ئاگای لەگۆرانی كۆن و تازەی میللەتەكانی دەورو بەرە تەنانەت هەناسەكانیان لەیەكتری جیا ئەكاتەوە.
من لەنزیكەوە كاك (زیاد) ئەناسم و تێكەڵین و لەسەردمێكدا لە سوید رۆژانە یەكترمان ئەبینی و بۆ یەكەمجاریش لە رێگەی هونەرمەند (پەیوەند جاف)ـی زاوامەوە لەماڵی خۆمان ناسیم.
هونەرمەند (زیاد ئەسعەد) وەك مرۆڤیش پیاوێكی ناسك و رووخۆش و دڵپاكە، ئەو مۆسیقا و گۆرانی كردووەبەنان و ئاو تا سەر ئێسقان عاشقی هەموو گۆرانییەكی جوانە، هەر ئەم عەشقیەش وای لێكردووەكە نەوەستێ و هەمیشە بەخشندە بێ.
جارێكیان باسی ئەو هەموو موزیكییە گەورەیەی بۆ كردم كە لە (حەسەن زیرەك)ـدا هەبووە، ئەیگوت (حەسەن زیرەك لەهەندێ حاڵتدا ئاڵ و گۆڕی هەندێ تۆنی دەنگدا كاری وایكردووە، كە جێگای سەروڕمانە !!) دیارە من رووبەروو هەندێ رەخنەم لە هونەرمەند (زیاد ئەسعەد) گرتووە، بەتایبەتی كە ئەو لە ژیانی خۆیی دا پەرش و بڵاوەو پەرت پەرتە و دوورە پەرێزیەكەی لەخەڵكەوە تاڕادەیەك كاری كردۆتە سەر قەتیس بوونی چالاكییەكانی، من پێم وایە ئەبوایە تا ئێستا (زیاد) چەندیین جار سەردانی كوردستانی بكردایە، ئەو لە نزیكەوە تێكەڵ بە عاشقانی گۆرانییەكانی خۆی ببوایەوە و لەنزیكەوە گوێ لەخواست و داواكانیان بگرتایە و چەندیین كۆنسێرتی پێش كەش بكردایە، لەم ڕووەوە (زیاد) زۆر تەمبلە و مەگەر هەلیكۆپتەرێ لەماڵەكەی دا بنیشێتەوە بیڕفێنێ و بیهێنێتەوە!! ئێ ئەمەیش چۆن ئەكرێ ؟!
لە رووی هەڵبژاردنی ئەو تێكستی شیعریانەوە كە بۆ ئاوازەكانی هەڵییان ئەبژێرێت، تێكستەكان روون و بێگرێ و گۆڵن بەتەواوی لەگەڵ ئاوازەكاندا ئەیگونجێنێ، ئەویش بۆتە هۆی ئەوەی كە لەلایەن گوێگرانەوە زوو لەبەر بكرێن.
هەڵبەت شیعری گۆرانی ئەبێ سادەو رەوان بن و زوو بگەنە ئاستی تێگەیشتنی خەڵكەكە، ئەگەر وانەبێت جۆرە دابڕانێك ئەكەوێتە نێوان وشە و ئاوازەوە، هونەرمەند (زیاد ئەسعەد) لە دنیای گۆرانی و مۆسیقای مندا لە نەورەسێكی سپی ئەچێ كە لەبەر هەتاوی ژیاندا دەبرسیكێتەوە.
لەدوایشدا لە دڵەوە سڵاوم بۆ هونەرمەند (زیاد ئەسعەد) و چاوی ماچ ئەكەم.

شیركۆ بێكەس

رۆژنامەی هەولێر[/size]