كورته‌نامه‌ی مۆبایل

بۆچی جوابم ناده‌یته‌وه‌
لایه‌كم لێ ناكه‌یته‌وه‌
زۆر ده‌مێكه‌ بیرت ده‌كه‌م
خۆ وه‌خته‌ من سوێم بێته‌وه‌

2
چه‌ند جارێ زه‌نگم بۆت لێدا
خۆ تۆ نه‌تگوت ئه‌لوو جارێ
هێند تامه‌زرۆی بیستنێكتم
رۆحم ئه‌شكی لێ ده‌بارێ

3
هه‌موو رۆژێ چاوه‌رشێتم
بمخه‌یته‌ نێو سۆمای چاوێ
بێ تۆیی وا ژاكاندوومی
سێبووری دڵ نایێ تاوێ

4
كه‌ی دێیته‌وه‌ هه‌ناسه‌كه‌م
وا خه‌ریكه‌ بێ تۆ ده‌مرم
ئه‌گه‌ر تۆ نه‌گه‌ی به‌ فریام
به‌ ناچاری سه‌ر هه‌ڵده‌گرم

5
تازه‌ دوای چی هاتیته‌وه‌
بۆ ده‌ته‌وێ تێكده‌ی ژینم
نامه‌وێ ئیدی سه‌ر له‌ نو
ژاناو بخه‌یته‌ برینم

6
كه‌ی تۆ وابووی بۆ ساتێكیش
ناپرسی لێم چۆنم بێ تۆ
ده‌رك ناكه‌ی به‌ وه‌رینم
شه‌قارم بێ بارانی تۆ

7
سه‌رده‌مێكه‌ له‌ سۆراختام
هه‌ر دێم و ده‌چم بێ ئاگا
بۆ نازانی جیا له‌ سۆزت
هیچ شت به‌ هانای من ناگا

8
شه‌وان تامه‌زرۆی زه‌نگێكم
تێدا چرپه‌ی تۆ ببیستم
هێند تامه‌زرۆی له‌ره‌ت بوومه‌
وه‌ك ده‌روێشێ ده‌تپه‌رستم

9
بۆ وا بێ باك به‌ سه‌فه‌رێ
لێره‌ جێت هێشتم به‌ ته‌نیا
بۆ تۆ نه‌بێ ده‌ پێم بڵێ
بۆ عه‌شقی كێ ببم شه‌یدا

10
هێند عه‌وداڵی بینینێكتم
وه‌خته‌ سوێی بێته‌وه‌ چاوم
هه‌ناسه‌كه‌م كه‌ی ده‌زانی
تۆ ماسیت و منیش ئاوم

11
كه‌ چاوم پێت ئاشنا ده‌بێ
دڵ و رۆحم ده‌بن گه‌ش گه‌ش
تامه‌زرۆمه‌ شه‌وتا به‌یان
سه‌ر خه‌و بكه‌م له‌ نێو باوه‌ش

12
خۆ تۆ به‌ ته‌نیا نه‌تكوشتووم
چاوو برۆش كردومیان شێت
كه‌ ئاوێته‌ی سۆمات ده‌بم
برك و ژانم گشت بیر ده‌چێت

13
ئه‌مشه‌و تۆم له‌ خه‌ودا بینی
هاتی خه‌وتی له‌ ئامێزم
به‌ سۆزه‌وه‌ خه‌واندمت
تا ئه‌و ده‌مه‌ نه‌ما هێزم

14
وه‌ره‌ برژانگ بكه‌ په‌یژه‌
بۆ خۆت پشوو ده‌ له‌ چاوم
هه‌ناسه‌م فێنك بكه‌وه‌
به‌ یادی تۆیه‌ كه‌ ماوم

15
كه‌ یه‌كه‌م جار چاوی تۆم دی
له‌ گلێنه‌ت عه‌شقم بینی
زانیم كه‌وا وا خوڵقاوی
خاوه‌ن هه‌ستێكی به‌ تینی

16
كه‌ نامه‌ی تۆ ده‌گاته‌ لام
ده‌به‌خشێ به‌ دڵ سێبووری
هه‌ر حه‌رفێكی ناو نامه‌كه‌ت
له‌ دڵ ده‌با خه‌می دووری

17
هه‌ناسه‌كه‌م بۆ بێ ده‌نگی
خۆ من بێ تۆ نیه‌ ژینم
كه‌ بێ ئاگا ده‌بم له‌ تۆ
له‌ گۆنا ده‌ڕژێ ئه‌سرینم

18
له‌وه‌ته‌ی به‌ تۆ ئاشنا بووم
له‌ مانای ژیان گه‌یشتووم
كه‌ ده‌ستم خسته‌ نێو ده‌ستت
خه‌می له‌ دڵدا نه‌هێشتووم

19
بمبوره‌ گیان كه‌ بێ ده‌نگم
ئه‌مڕۆ نه‌متوانی بتبیستم
سه‌رم قاڵ بوو رۆحی ره‌وان
نه‌ دڵ وای ویست نه‌ خۆم ویستم

20
كه‌ هاتیه‌وه‌ سه‌ما ده‌كه‌ین
تا هه‌ردووكمان ده‌كه‌ین باڵا
له‌ ئاوێزانیت تێر نابم
چون تۆ گوڵی و منیش گه‌ڵا

21
كه‌ هاتیه‌وه‌ ده‌تئاخنمه‌
ناخی ناخم تا بسره‌وی
له‌ ئامێزم ده‌تلاوێنم
تا به‌ مه‌ستی تێر بخه‌وی

22
كه‌ هاتیه‌وه‌ ئه‌م هه‌واره‌
رۆشن ده‌بێ وه‌ك چاوانت
تێنوێتی رۆحم ده‌شكێنم
به‌ شیله‌و شه‌كری لێوانت

23
وه‌ره‌ با هه‌ردوو هه‌نگاو نێین
بۆ مه‌فته‌نێ دوور له‌ ئازار
ئاوێته‌ بین له‌ ناو یه‌كدا
پاراو بكه‌ین لێوی شه‌قار

24
وه‌ره‌ با ته‌ریت تور هه‌لده‌ین
له‌ ئامێزدا تێر بتگوشم
تۆ به‌ ماچ بشكێنی تاسه‌م
منیش لێوانت هه‌ڵبمژم

25
وه‌ره‌ بۆ دڵخۆشی خۆمان
تێك بئالێین وه‌ك لاو لاوێ
رۆ بچینه‌ ناخی یه‌كدی
خاو بینه‌وه‌ تاو نا تاوێ

26
هێند تامه‌زرۆی هه‌ناسه‌تم
هه‌ناسه‌ له‌ سینه‌م نه‌ما
ده‌ ئاوێته‌ی رۆحم ببه‌
با له‌ دڵدا بكه‌ین سه‌ما

27
له‌وه‌ته‌ی له‌ چاوم ونی
تاریك بووه‌ به‌ر بیناییم
تۆ هێز ده‌ده‌ی به‌ بینینم
فریاد ره‌سی بۆ شه‌یداییم

28
بۆچی ئێستا پێم نابه‌خشی
تروسكایی سۆمای كاڵت
تێنووم تاسه‌ی رۆحم ناشكێ
مه‌گه‌ر شیله‌ی لێوی ئاڵت

29
چی له‌ دڵی ناسۆرم كه‌م
كه‌ ته‌نیا تۆی پێ هه‌توانه‌
به‌ هیچ ناشكێ خه‌م و تاسه‌ی
بۆ دڵَی تۆ دیوه‌خانه‌

30
ئای كه‌ بیرت ده‌كه‌م ئازیز
بێ تۆ ساتێكیش هه‌ڵناكه‌م
هێند هۆگری خۆت كردوومه‌
بێ تۆ تامی ژیان ناكه‌م

31
ئه‌و ساتانه‌ چه‌نده‌ جوانن
كه‌ چاوی تۆ ده‌مكا رۆشن
ئاوێته‌ بوون له‌گه‌ڵ تۆدا
به‌ رۆح و دڵ ده‌دا ئۆخژن
------------------------------------------

32

هێند غه‌ریبیت ده‌كه‌م گوڵم
هزر و هۆشم تێك ئاڵۆزه‌
دوور بوون له‌ تۆ چه‌شنی مه‌رگه‌
دڵم خاڵی له‌ چی سۆزه‌.

33
بۆچی نایه‌ی بۆ چه‌ند ساتێ
به‌با بده‌ین خه‌می ڕۆژگار
هه‌ردوو بۆ یه‌كتر عه‌وداڵین
وه‌ره‌ با ڕامووسین ئه‌دگار.

34
وه‌ره‌ گیانی شیرینی من
ته‌ڕایی بێنه‌وه‌ لێوم
تۆ به‌ دووری تاڵت كردم
ئای كه‌ تامه‌زرۆ و په‌شێوم.

35
ده‌ وه‌ره‌وه‌ هه‌ناسه‌كه‌م
له‌ دووری تۆ سه‌رگه‌ردانم
بێ ئاگا له‌ تۆ بووراندن
ئه‌شك دێنێ له‌ چاوانم.

36
بیستم گوڵم كه‌ نه‌خۆشی
وه‌ره‌ با ساڕێژ كه‌م زامت
له‌گه‌ڵ هه‌توانی ئازارت
خۆشم چێژ بكه‌م له‌ تامت.

37
وه‌ره‌ ئازیز بۆ ژوانێ
دڵشادم كه‌ به‌ ڕوانێ
با پڕ به‌ دڵ ماچت بكه‌م
به‌ مرچه‌ بۆت بێمه‌ دوانێ.

38
بۆچی ئاوا جێت هێستم
خه‌م و ژانت پێ چێشتم
به‌ ڕۆیینی ناكاوت
ئه‌شكی زۆرت پێ رێشتم.

39
كه‌ڕۆیشتی و به‌جێت هێشتم
ئه‌ی كێ نازی دڵ هه‌ڵگرێ
رۆح له‌ تاوت له‌ هه‌ڵپه‌یه‌
وه‌خته‌ بۆ لای تۆ هه‌ڵفڕێ.

40
به‌ ده‌ستم بوا هه‌رچی حه‌زته‌
ده‌مهێنا دی تا دڵت بێ شاد
تاكو له‌ ئامێزی سۆزم
پشوو بده‌ی تۆ به‌ ئازاد

41
ئه‌ی تۆ نه‌بووی كه‌ ده‌تدركاند
بێ من بۆ ساتێ هه‌ڵناكه‌ی
له‌سه‌ر خاكی لێوم نه‌بێ
ره‌شماڵی لێوت هه‌ڵناده‌ی.

42
چه‌ند جوان چاوانت هڵدێنێ
كه‌ تێم ده‌گری سێره‌ی نیگات
خۆزگه‌ ده‌خوازم تا مردن
كه‌ ره‌سمێ بم له‌ ناو سیمات.

43
كه‌ده‌تبینم پێ ده‌كه‌نی
دڵشاد ده‌بم به‌ بزه‌ی لێو
ته‌مه‌ننای چه‌ند ساتێ ده‌كه‌م
پشوێ بده‌م له‌ ئامێز سێو.

44
بۆ بێ ده‌نگی هه‌ناسه‌كه‌م
تامه‌زرۆی بیستنێكی تۆم
له‌ره‌ت بچرپێته‌ گوێچكه‌م
به‌لكو ساتێ دێمه‌ سه‌ر خۆم

45
كاتێ ڕۆشتی هه‌نگاوت نا
به‌ بێ باكی ته‌نیات كردم
منێك كه‌ هۆگری تۆبووم
به‌ ئۆغرێ شه‌یدات كردم.

46
ئاوێزانی خۆتم بكه‌
بمخه‌ باوه‌شی گه‌رمت
لێم گه‌ڕێ بۆ چه‌ند ساتێ
بمژم روومه‌تی نه‌رمت.

47
تا بۆم بكرێ بۆنت كه‌م
تا به‌ بۆنت سه‌رخۆشم بم
هێند بتمژم تا كاتێ
له‌ مژینت بێ هۆش بم.

48
گیانه‌ تۆ خاكی منیش پێشمه‌رگه‌
رۆژێنه‌تبینم خۆ ناگرم به‌رگه‌
ده‌ نزیكم خه‌ له‌ باخی سێوت
تاسه‌م بشكێنه‌ به‌ شیله‌ی لێوت.

49
هه‌ناسه‌م ببه‌ بۆ ناو سینه‌ی خۆت
كه‌ وه‌ك دێوانه‌ سووتاوم له‌ بۆت
بمكه‌ره‌ باوه‌ش باوه‌شی نازت
خۆشنوودم بكه‌ به‌ هه‌ست و ڕازت.

50
ساتت جوان كچی چاو ڕه‌ش
رۆژگارت گشتی بێ گه‌ش
به‌ ئاواتم بۆ جارێ
بملاوێنی له‌ باوه‌ش.

51
گڕی عه‌شق و تامه‌زرۆییم
هێنده‌ گه‌رمه‌ ترسم هه‌یه‌ بتسووتێنێ
به‌ڵام سووتانێ ئێجگار خۆش
خۆت و رۆحت ده‌خه‌وێنێ.

52
كه‌ی تۆ به‌ قه‌د من سووتاوی
كه‌ی دیوته‌ خه‌می شه‌یدایی
كه‌ی ده‌زانی چه‌نده‌ شه‌خته‌
بێ ماچ و موچ و ته‌نیایی.

53
بۆ زامم هه‌ڵده‌ده‌یته‌وه‌
بۆ ده‌مبه‌یته‌وه‌ رابردوو
ئه‌رشیفێكه‌ رقم لێیتی
كه‌ بۆ من ئه‌ندێشه‌و خه‌م بوو.

54
گه‌ر شێتێكی عاقڵ بم یا
خۆت ووته‌نی عاقڵی شێت
گرنگ قه‌ره‌جێكی ئاوام
ناشیرینێ پێم یێژێ شێت

55
به‌یانیت باش
هه‌میشه‌ پڕ خۆش و شاد بی
به‌یانیت جوان
هه‌رده‌م له‌ دڵدا گوشاد بی
به‌یانیت گوڵ
ژینت ته‌ژی بێ له‌ گوڵزار
به‌یانیت یاد
یادی خۆشمه‌ندی بێ ئازار.

56
دابڕان هێند گریاندوومی
دیده‌م ئه‌شكی لێ ده‌بارێ
برك و ژان تینی لێ سه‌ندووم
خۆشی نه‌دا بۆ دڵ جارێ.

57
هه‌رچی زیكره‌ به‌ فیڕۆ چوو
عه‌شقیش ته‌نێ پیری كردم
ته‌نیایی هێند ژاكاندوومی
هاكا بیستت بێ ده‌نگ مردم.

58
دابڕان ئه‌شكی پێ ڕشتووم
پڕ بوومه‌ له‌ ژان و له‌ ئێش
كه‌چی ئێستاش له‌ زیكر دام
كه‌ حاڵ ده‌گرم چه‌شنی ده‌روێش.

59
ئه‌گه‌ر دڵیش وه‌ك شووشه‌ بێت
ناشكێ له‌ ئاست كه‌سی ئازیز
گرنگ ئازیزی رۆحم بێ
له‌ ژین وه‌ده‌ر بنێ پاییز.

60
ته‌مه‌نی من وا به‌سه‌رچوو
عه‌شق گشت ژینی شێواندم
چه‌شنی گولێك خه‌زان هات و
په‌ڕ وپۆی گشت هه‌ڵوه‌راندم.

kurdzhin