- دهۆک/ئیسماعیل تاهیر- ژئه‌نجامێ رێککه‌فتنه‌کێ دناڤبه‌را زانکۆیا دهۆکێ و زانکۆیا ئاشتى یا سه‌ر ب نه‌ته‌وێن ئێکگرتى ڤه ل وه‌لاتێ کوستاریکا و پشتى دوو سالێن خواندنێ 2009 – 2010 و د 30ـه‌مین خولا ده‌رچوونا وێ دا قوتابیێ کوردێ کۆرِێ دهۆکێ "محه‌مه‌د عه‌لى یاسین" باوه‌رناما ماسته‌رێ ب بابه‌تێ میدیا و ئاشتى و ململانێ ب ده‌ستڤه‌ئینا و د ئاهه‌نگا ناڤبرى دا کو رۆژا شه‌مبى ژلایێ زانکۆیا ئاشتى ڤه ل کوستاریکا هاته خه‌لاتکرن.
قوتابى یێ کورد محه‌مه‌د عه‌لى یاسین د په‌یوه‌ندیه‌کا تایبه‌ت دا دگه‌ل ئاژانسا په‌یامنێر ژ کوستاریکا گوت: ناما وى ب ناڤێ "پێشڤه‌برنا په‌یره‌وان د میدیایێ و ئاشتى و ململانێ دا " بوو و ژ هه‌ر دوو ته‌وه‌رێن میدیا ل عیراقا پشتى سالا2003ێ و میدیا و ئاشتى و ململانێ ل رۆژهلاتا ناڤین ڤه‌گرتبوون و دڤێ ئاهه‌نگێ دا کو ئێکه‌مین سه‌رۆکا ئافره‌ت ل وه‌لاتێ کوستاریکا "لاورا چینیچیا" تێدا به‌رهه‌ڤبویى ئه‌ز و ژماره‌کا دى یا قوتابى یێن ده‌رچویى هاتینه خه‌لاتکرن و باوه‌رنامێن مه هاتنه به‌لاڤکرن.
هه‌ر وه‌سا محه‌مه‌د عه‌لى یاسین گوت: ب دیتنا من گرنگه دڤێ قوناغێ دا گرنگیێ بده‌ینه لایه‌نێ ئه‌کادیمى یێ میدیا و راگه‌هاندنێ ل کوردستانێ نه‌خاسم کو میدیا رۆله‌کێ مه‌زن و به‌رچاڤ لێ دگێریت و چه‌ندین بیاڤێن گرنگ ڤه‌دگریت و میدیا کو ئالاڤه‌کێ په‌روه‌ده‌یى د شیاندایه کارتێکه‌ر بیت بۆ ئاڤاکرنا جڤاکى و پێدڤى یه ب رێ راگه‌هاندن و میدیایێ و ژبوو هندێ دڤێت ب رێ یێن زانستی کرنا میدیایێ ژ کارتێکرنێن وێ یێن نه‌رێنى بهێته پاراستن.
هه‌ر دڤێ په‌یوه‌ندیا تایبه‌ت دا دگه‌ل ئاژانسا په‌یامنێر قوتابى یێ کورد محه‌مه‌د عه‌لى یاسین سوپاسیا سه‌رۆکاتیا زانکۆیا دهۆکێ و هه‌ڤکارێن میدیاکار کر بۆ بجهئینانا خه‌ونا وى یا وه‌رگرتنا ماسته‌رێ دڤى بیاڤێ گرنگ دا کو هیڤى ل سه‌ر هاتینه ئاڤاکرن بۆ بجهئینانا خزمه‌ته‌کا باش بۆ گه‌ل و وه‌لاتێ خو ل ئایینده‌یى ل سه‌ر بنه‌ره‌ته‌کێ زانستى.
قوتابى یێ دهۆکى محه‌مه‌د عه‌لى یاسین ل سالا1983 ێ ل رۆژانێن ده‌ربده‌ریێ ل ته‌برێزێ ل وه‌لاتێ ئیرانێ هاتیه سه‌ر دونیایێ وخواندنا خویا سه‌ره‌تایى وناڤنجى ل ئیرانێ ب دووماهى ئینایه و ئاماده‌یى و زانکۆ "کولیژا ئادابێ – پشکا زمانێ ئینگلیزى" ل دهۆکێ ب دووماهى ئینایه و بۆ ده‌مێ چه‌ندین سالان کار د سازى یێن راگه‌هاندنێ دا ل دهۆکێ کریه و دیوانه‌کا هه‌لبه‌ستێ ب ناڤێ "دیسان بێ یى ته" چاپکریه و چیرۆک و ئه‌ده‌بیاتان دنڤیسیت.
Peyamner.