بۆ بۆ" بووەتە یەكێك لە دیارترین دروشمەكانى ئەو هاندەرانەى بەرشەلۆنە كە بۆ هاندانى تیپەكەیان روویان لە شارى لەندەن كردووە.

بەر لە چەند ساتێك لە دەست پێكردنى یاریى كۆتاى خولى یانە پاڵەوانەكانى ئەوروپا لە نێوان هەردوو یانەى بەرشەلۆنەى ئیسپانیایی و مانچستەر یونایتدى ئینگلیزى، هاندەرانى بەرشەلۆنە لە شەقامەكانى لەندەن بڵاو بوونەتەوە.

گۆڕەپانى "ترافالگار" لە شارى لەندەن بەبارەگەى هاندەرانى بەرشەلۆنە هاتووەتە دەستنیشانكردن و ئەوەى جێگەى سەرنجە لەو گۆڕەپانەدا زیاتر گوێبیستى ناوى جۆزىَ مۆرینیۆ راهێنەرى پورتوگالیى یانەى ریال مەدریدى ئیسپانیایى دەبى.

مۆرینیۆ كە دواى دۆڕاندنى تیپەكەى لە یاریى پێش كۆتاى خولى یانە پاڵەوانەكانى ئەوروپا بەرامبەر یانەى بەرشەلۆنە زۆر تووڕە بووبوو، بەردەوام پرسیارى دەكرد كە زۆربەى پرسیارەكانى بەوشەى "بۆ" دەستیان پىَ دەكرد، ئەمەش بووەتە هۆى ئەوەى هاندەرانى بەرشەلۆنە دروشمى "بۆ بۆ" بۆ خۆیان هەڵبژێرن و ئەو دروشمە بووەتە خۆشەویستترین دروشم لەلایەن ئەو هاندەرانەوە.

تەنانەت هەندىَ لە هاندەرانى بەرشەلۆنە چەند دروشمێكیان هەڵگرتووە كە هەریەكێكیان برێتییە لە پەیامێكى جیاجیا بۆ مۆرینیۆ، یەكێك لەو دروشمانە برێتییە لەوەى "مۆرینیۆ ئەوە چۆنە لە ڕێگەى تەلەڤزیۆنەوە سەیرى یاریى كۆتا دەكەى؟".