بەشی یەکەم :  سەڵاحەددین سیامەند، پێش چەند ڕۆژێک لە بەجێهێشتنی یەکجارەکی وڵاتەکەی، لە دیمانەیەکی تایبەتی دوورودرێژدا، باس هەموو لایەنە شاراوەکانی نێوان خۆی و یانەکەی دەکات و لە بارەی چەند پرسێکی تایبەتەوە قسە دەکات... ئەو یاریزانە نێودەوڵەتییەی کورد، لە بارەی سەرەتای گرژبوونی پێوەندیی نێوان خۆی و یانەکەی، بۆ (هەولێر وەرزش) قسە دەکات و دەڵێت: " کێشەی من لەگەڵ یانەی هەولێر، لە 12ـی 09ـی 2006ـەوە دەستی پێ کرد، ئەوکات یارییمان بەرانبەر یانەی ئیسماعیلی لە جامی عەرەبی هەبوو،

گەشتمان هەبوو، من دەمبینی کە هیچ بۆ ئێمە نەکراوە و زیاد لە پێویست بایەخیان بە یاریزانە عەرەبەکان دەدا، بۆیە لە یەکێک لە تیڤییەکان میوان بووم و قسەیەکم کرد و گوتم یاریزانە عەرەبەکان بایەخی زیاتریان پێ دەدرێت، ئەوەیش شتێکی زۆر ئاسایی بوو، چونکە ڕاستییەک بوو نەدەشاردرایەوە، ئیدی دەستەی کارگێڕیی یانەی هەولێر، کاتژمێر 1ـی شەو دووریان خستمەوە، لە کاتێکدا 5ـی بە یانی گەشتی دەرەوەمان هەبوو، هەروەها یاریزانی سەرەکی بووم، جگە لەوە، ڕۆژێک پێش ئەو یارییەیش، لەگەڵ هەڵبژاردەی عێراق یاریم کرد و یاریزانێکی سەرەکییش بووم، ئیدی لەوەوە کێشەکان دەستی پێ کرد، من نەمزانی کێ ئەو کودەتایەی (موئامەرە) دژی من ساز دابوو، هۆکارەکەیشیم نەدەزانی، دوایی بۆم ڕوون بووەوە کە تەنیا لەسەر ئەو قسەیە بوو کە لە تیڤیدا کردبووم و گوتبووم یاریزانە کوردەکان مافی خۆیان نەدراوەتێ، ئەوان ئەو قسەیەیان پێ خۆش نەبوو، بۆیە ئە ڕەفتارەیان بەرانبەر من نوواند، دوای ئەو دوورخستنەوە لە ناکاوەم، کە زانیم غەدرم لێ کراوە، لە ڕێگەی ڕۆژنامەیەکەوە قسەم کرد و کوڵی دڵم بەرانبەر یانەی هەولێر ڕشت، چونکە کارەکەی ئەوان شتێکی زۆر ناماقووڵ بوو، ئیدی کە هاتنەوە لە گەشتەکە، منیان بۆ ماوەی 6 مانگ دوور خستەوە، دوای شەش مانگەکەیش دیسانەوە ئەوان لەگەڵ مندا ڕێک نەبوون، جگە لەوەی بەردەوام ئاستم لە هەڵکشاندا بوو، من ماوەی 3 ساڵە لە ژێر گووشارێکی زۆری دەروونی ئەو دەستەی کارگێڕییەدا یاریم کردووە و لەبەر ئەوە قبووڵم کرد، بۆ ئەوەی نەکەوینە سەر زاری خەڵک، ئەوان هەموو کات دەیانویست بمچەوسێننەوە و بێزارم بکەن، بۆ ئەوەی یانەکەم جێ هێشتبا، بۆ ڕاستی ئەم قسەیەم، جارێکیان مەلاعەبدولخالق، بە ڕاهێنەر (نازم شاکر)ـی گوتبوو، کە لە یەک لە یارییەکانمان بەرانبەر سیروانی نوێ یاریم پێ نەکات، هەروەها پێش یاریمان بەرانبەر مووسڵ لە شاری دهۆکیش هەمان قسەی بە ڕاهێنەر گوتبوو، ئایا دەبێت ئەوانە چۆن کەسانێک بن کە هەوڵی دابەزینی ئاستی یاریزانی کورد دەدەن؟ ئەکرەم سەلمانیش چەندین جار بە چاویدا دەدامەوە و دەیگوت من لە پیاوەتی خۆم تۆم هێشتووەتەوە، چونکە دەستەی کارگێڕیی دەڵێن دەری بکە. بە ڕاستی ئەو شتانە زۆر ناخۆش بوو، من دەمتوانی بیکەمە هەرا و لایەنی پێوەندیدار ئاگادار بکەمەوە، چونکە من پێوەندییەکی تایبەتیم لەگەڵ کەسە دیارەکانی کوردستاندا هەیە، بەڵام شەرمم دەکرد بچمە لای کەسێکی باڵا و بڵێم کارگێڕیی یانەکە ئەو کارە دەکەن، لە ژیانیشمدا حەزم لە قسەبردن و هێنان و ململانێ نەبووە، هەمیشە ئەوانم بە برا گەورە دادەنا، بەڵام ئەوان لەو ئاستەدا نەبوون، چونکە دەستەی کارگێڕیی دەناسم و مێژووی هەموویان دەزانم، دەیشزانم چۆن هاتوونەتە یانەکە، دوو سێیەکیان نەبێت، کەسیان بە ماف و ماندووبوون و ژیریی خۆیان نەهاتوونەتە یانەکە و لە ڕێگەی پێوەندییەوە بووە، بەڵگەیش هەیە، بەڵام لێرەدا دەیبڕمەوە".

سەڵاحەددین باسی وەرزی 2007 – 2008 دەکات و دەڵێت: "پێش یارییەکانی خولەکە، 14 یاریی دۆستانەمان ئەنجام دا، تەنیا یەک یاریی وەکوو (شوبه)ـی چەپ یاریم کرد، کە دوو خولەک یاریم کرد، یارییەکی دیکەیش کە چوومە نێو یاریگە پێم بە تۆپ نەکەوت یاری کۆتایی هات، کە خول دەستی پێ کرد، یاریی یەکەم من لەسەر پەیژەکانی یاریگە بووم، ئیدی ڕاهێنەر هێڵی بەرگریی بە دڵ نەبوو، بۆیە یاریی دووەم بەرانبەر (مینا) یاریم کرد و لە خولەکی کۆتاییدا گۆڵی بردنەوەم تۆمار کرد و بەرگرییەکی زۆرم لە یانەکەم کرد، ئیدی کە خولەکە تەواو بوو و جامەکەمان بردەوە، ئەکرەم سەلمان گوتی پێویستم بە تۆ نییە و دەچییە هەر یانەیەک بڕۆ، لەوەوە بۆم دەرکەوت کە دەستەی کارگێڕیی تەواو هانی دەدەن و لە قەدری یاریزانی کورد، بە تایبەتی کەسێکی وەکوو من کەم دەکەنەوە، لە کاتێکدا کە بوونی من چەند لە بەرژەوەندیی یانەی هەولێردا بووە و چەند پێمەوە سەربەرز بوون، من خۆم بە ڕابردوومدا شۆڕ ناکەمەوە، چونکە ئاستم دانەبەزیوە و داهاتوویشم زۆر باشە".

سەڵاحەددین، دوو باسی دیکە پێکەوە گرێ دەدات و دەڵێت: ئەو ڕۆژەی هاتمە یانەی هەولێر، تەمەنم 14 ساڵ بوو، بەڵێنم دا کە تا کۆتایی یاریکردنم لەو یانەیەدا بمێنمەوە، بە کرداریش ئەوەم جێبەجێ کرد، لە ژیانمدا نەمزانیوە (لەخۆبایـیـبوون) چییە، بەرانبەر شارەکەم و یانەکەیشم و هەموو لایەک، بەڵگەیشم بە چەند نموونەیەک دەهێنمەوە، جارێکیان کە لە هەڵبژاردەی عێراق بووم، کات 10ـی بەیانی گەییشتمەوە، کەچی ئێوارەکەی لەگەڵ یانەکەمدا مەشقم کرد، جارێکی دیکەیش کە گەڕامەوە، دەمەونیوەڕۆ بوو، هەولێر یاری هەبوو، دەیشبوو بە 2 گۆڵ لە بروسک بباتەوە، ئیدی یاریم کرد، گۆڵێکم تۆمار کرد و دانەیەکیشم دروست کرد و یانەکەم سەرخست بۆ شیاندنی پلەنایاب، کەڕەتێکی دیکەیش کە جامی لاوانی ئاسیامان بردەوە، من 10ـی بەیانی گەییشتمەوە بەغدا و بە ڕێکەوت زانیم یانەی هەولێر یاریی بەرانبەر مووسڵ هەیە و پێویستی بە 3 گۆڵ هەبوو، یەکڕاست هاتمەوە و یاریم کرد، 2 گۆڵم تۆمار کرد و 2ـیشم دروست کرد، ئەوە لە کاتێکدا بوو، کە مافی خۆم بوو بۆ 3 ڕۆژ پشوو بدەم و یاری نەکەم، بەڵام من بەو گیان و دڵسۆزییە یاریم دەکرد، ئەوانیش ئاوها بوون، دەبوو ئەوەیان لە بەرچاو گرتبایە، نەک 3 ساڵ شەڕم لە دژ بکەن، ئەوانەی ئەوان کردیان، زۆر یادگاری ناخۆش بوون، بەڵام من زیانم نەکردووە، شاری هەولێر زیانی کرد، چونکە ئیدارەکە گوێی لێ نییە و دیارە سوودی ئەوان لەوەدایە یاریزانی بێگانە بێت یارییان بۆ بکات".

سەڵاحەددین، گلەیی لە یاریزانە کوردەکانی هاوکاری ناکات و دەڵێت: "من کێشەم هەبوو، ئەوان هیچیان نەکرد، بەڵام گلەییشیان لێ ناکەم، چونکە منیان زۆر خۆش دەوێت، لەگەڵ ئەوەیشدا هەڵەیان هەیە و نەدەبوو هەندێک شت بکەن.

لە درێژەدا سەڵاحەددین دەڵێت: "ئەوکاتی لە یانەکە بووم، دەستەی کارگێڕی ئاگای لە زۆر شت نەبوو، من لە جیاتی ئەوان جێبەجێم دەکرد، ئەمە یەکەمجارە باسی دەکەم، بۆ نموونە کە یاریمان بەرانبەر زاخۆ هەبوو، یاریزانەکان مانیان گرت کە نەیەنە یارییەکە، ئەگەر نیوەی بۆندەکانیان وەر نەگرن، بەڵام من هەموویان هێنایە یاریگە و بەڵێنم پێ دان کە ئیدارە بۆیان دابین دەکات، هەروەها پێش یاریی پاختاکۆریش هەمان کێشە ڕووی دا، کەچی من ڕێنماییم بە یاریزانان دا و پارێزگار و یانەکەیشم لەو بارەیەوە ئاگادار کردەوە و چارەمان کرد، لەو بارانەدا لە ئیدارە زیاتر ڕۆڵم گێڕاوە، زۆر کێشەی دیکەم چارە کردووە و پێوەندیی نێوان یاریزانانم ئاسایی کردووەتەوە، ڕێگر بووم لەوەی کێشە لە نێو یانەدا هەبێت".

ئەم دیمانەیە پێنج بەشە و نهێنییەکانی دیکە بۆ بەشەکانی داهاتوو...

بەشی دوو بۆ بەیانی

دیمانە ،،، مامە یارە