[size=19]باوكی كچان به‌تێری ده‌خه‌وێت

له‌م ماوه‌یه‌دا گوڤاری(الوسط)ی به‌حرێنی به‌سه‌رهاتێكی بڵاو كردبووه‌وه‌،
گوڤاره‌كه‌ ده‌ڵی: له‌ساڵه‌كانی بیستی سه‌ده‌ی رابوردوودا دووهاوڵی به‌حرێنی هه‌بوون، یه‌كێكیان به‌ناوی عیسا و ئه‌وی تريان به‌ناوی فه‌هد.. ئه‌م دوو هاوه‌ڵه‌ په‌يوه‌ندی نێوانیان زۆر گه‌رم و گوڕبوو.. قه‌ده‌ر وابوو ئه‌م دوو هاوه‌ڵه‌ له‌ یه‌ك رۆژدا و له‌دوو بنه‌ماڵه‌ی خانه‌دان ژنیان هێنا..
رۆژگار هات و چوو، خێزانی هه‌ردوویان سكیان هه‌بوو، له‌یه‌ك رۆژا منداڵه‌كانیان بوو، عیسا رۆیشت بۆلای فه‌هدی هاوه‌ڵی و لێی پرسی: ئه‌رێ كاكه‌! ئێوه‌ چیتان بووه‌؟ ئه‌ویش گوتی: سوپاس بۆخوا كچێكی جوانكیله‌مان بووه‌.. و ناومان ناوه‌ {نووره‌}.. ئه‌ی ئێوه‌؟ گوتی: وڵڵا ئێمه‌ كوڕمان بووه‌و ناومان ناوه‌ {موحه‌ممه‌د}، و ئیتر خه‌ڵكی بانگم ده‌كه‌ن: ئه‌بوو موحه‌ممه‌د! پێم ناڵێن: ئه‌بوونووره‌! هه‌هها!!
رۆژگار رۆیشت و هه‌ردوو هاوه‌ڵ ژنه‌كانیان سكیان هه‌بوو، كاتێ منداڵه‌كانیان لێ بووه‌وه‌ دووباره‌ عیسا رۆیشته‌وه‌ بۆلای فه‌هدی هاوه‌ڵی و لێی پرسی: ها كاك فه‌هد! چیتان بووه‌؟ گوتی: كاكه‌گیان! خوا كچێكی جوانكیله‌ی پێ به‌خشیوین سوپاس بۆخوا دایكیشی ته‌ندروستی باشه‌..
عیسایش به‌ ههاهای پێكه‌نینه‌وه‌ هه‌ڵی كێشایه‌و گوتی: وه‌ڵلا كاكه‌! ئێمه‌ خوا كوڕێكی تری پێ به‌خشیوین، و به‌گاڵته‌ پێكردنێكه‌وه‌ گوتی: ده‌زانی ئه‌وه‌یانی چی؟
فه‌هدیش گوتی: نه‌خێر نازانم یانی چی، پێم بڵێ..
عیسا گوتی: پێشینان گوتوویانه‌: ئه‌وئافره‌ته‌ی له‌سه‌ره‌تاوه‌ یه‌ك له‌دوای یه‌ك دووكوڕی ببێت ئه‌وه‌ ماره‌ییه‌كه‌ی حه‌ڵال كردووه‌!!
یه‌عنی ژنهێنانه‌كه‌م كه‌وتۆته‌خۆڕایی.. هاها..ا
رۆژگار رۆیشت، و قه‌ده‌ری خوا وابوو له‌ماوه‌یه‌كی نزیك له‌یه‌كه‌وه‌ هه‌ردووهاوه‌ڵ ژنه‌كانیان سكیان ببێت و هه‌ردووشیان له‌ كاتێكی نزێك له‌یه‌كه‌وه‌ منداڵی سێهه‌میان ببێت..
عیسا ئه‌م جاره‌ش كوڕی بوو!! ئیتر پۆزی لێده‌دا و وای ده‌زانی به‌ ئازایه‌تی خۆیه‌تی، و زۆركه‌یف خۆش و شاد بوو، رۆیشت بۆلای فه‌هدی هاوه‌ڵی و لێی پرسی ها برا! چیتان بووه‌؟
ئه‌ویش گوتی: خوا كچێكی جوانكیله‌ی ساق و سه‌لیمی پێ به‌خشیوین، سوپاس بۆخوا دايكیشی ته‌ندروستی باشه‌..
عیساش به‌ده‌نگێكی به‌رز و به‌ پێكه‌نینێكی قه‌به‌وه‌ و وه‌ك شێوه‌ لاقرتێیه‌ك گوتی: من ژنه‌كه‌م كوڕی سێهه‌می بوو.. ده‌زانی ئه‌وه‌ یه‌عنی چی؟
فه‌هدیش كه‌تووشی به‌تووشی ئه‌م هاوه‌ڵه‌ نادانه‌وه‌بووببو هه‌ناسه‌یه‌كی ساردی هه‌ڵكێشاو به‌زه‌یی به‌ عه‌قڵیا ده‌هاته‌وه‌و گوتی: نه‌خێر نازانم یه‌عنی چی..
عیسا گوتی: ئه‌وه‌ی سێ كوڕی هه‌بێت وه‌ك ئه‌وه‌ وایه‌ سێ كوچكه‌ی ئاگردانی هه‌بێت و مه‌نجه‌ڵی خواردنی له‌سه‌ردانابێ.. من مه‌نجه‌ڵی خواردنم داده‌نیشێ و تۆیش باوكی كچان بێ مه‌نجه‌ڵ ده‌بیت..!!
فه‌هدیش گوتی: كاكه‌گیان ! ئه‌مه‌ی روویداوه‌و بووه‌ نه‌ به‌ئازایه‌تی تۆیه‌و نه‌به‌ كه‌وده‌نی من، به‌ڵكو ئه‌مه‌ به‌شێكه‌و خوای باڵاده‌ست پێی به‌خشیوین، من به‌به‌شی خۆم رازیم، چونكه‌ لێم روونه‌، كاری خوا هه‌مووی هه‌ر خێره‌..
# # #
رۆژگار رۆیشت و منداڵ گه‌وره‌بوون.. كوڕه‌كانی عیسا ژنیان هێنا وهه‌ریه‌كه‌یان ماڵی خۆی پێكه‌وه‌ ناو باوك و دایكیان جێهێشت، كچه‌كانی فه‌هدیش شوویان كرد و رۆیشتنه‌ ماڵ و حاڵی خۆیان..
له‌م لایشه‌وه‌ عیساو ژنه‌كه‌ی، هه‌روه‌ها فه‌هد و ژنه‌كه‌ی پیربوون و هێزو گوڕیان نه‌ما، ژنان كه‌ڵكی ئه‌وه‌یان نه‌ما خزمه‌تی خۆیان و مێرده‌كانیان بكه‌ن.. نه‌كاری چێشتخانه‌و نه‌كاری جل شۆرین..
رۆژێكیان فه‌هد به‌لای عیسای هاوه‌ڵی كۆنیا تێپه‌ڕی و دیتی له‌به‌ر سێبه‌ری دره‌ختێكی به‌رماڵه‌كه‌ی خۆیان دانیشتووه‌، به‌ڵام لاواز، چڵكن، جل و به‌رگێكی كۆن و پرتووكاو!! لێی پرسی هاوڕێ ! ئه‌وه‌ چیته‌؟ بۆچ وات به‌سه‌ر هاتووه‌؟! زۆر لاوازبوویت، و جل و به‌رگه‌كه‌یشت كۆن و چڵكنن؟!
عیسایش گوتی: چیت پێ بڵێم؟ خۆت ده‌زانی كه‌وتوومه‌ته‌ ساڵه‌وه‌و توانای كاركردنم نه‌ماوه‌، و خێزانیشم له‌خۆم خراپتر.. توانای ئه‌وه‌ی نییه‌ كاسه‌یه‌ك ئاوم بداتێ.. كوڕه‌كانیش رۆیشتوونه‌ته‌ ماڵی خۆیان و به‌منداڵ و كاسبی خۆیانه‌وه‌ خه‌ڕۆن، نه‌كه‌سێك هه‌یه‌ نانمان بۆ بكات، نه‌كه‌سێك هه‌یه‌ جلمان بۆ بشۆرێت، و خۆیشت ده‌زانی توانای ئه‌وه‌مان نییه‌ كاره‌كه‌رێك بگرین!! مه‌گه‌ر ئه‌و به‌ر و دراوسێیانه‌ له‌ رای خوادا لایه‌كمان لێ بكه‌نه‌وه‌..!!
به‌ڵام ده‌بینم كاك فه‌هد تۆ ره‌نگ و رووت جوانه‌، و قه‌ڵه‌ویش بوویته‌وه‌و پاك و ته‌میزی و جله‌كانیشت وتوو كراون!! خۆ تۆیش كچه‌كانت شوویان كردووه‌ و رۆیشتوونه‌ته‌ ماڵ و مێردی خۆیان، و خۆت و پیره‌ژنه‌كه‌ پێكه‌وه‌ن، ئه‌ویش باوه‌ڕ ناكه‌م توانای كار كردنی مابێ.. پێم ناڵێیت چۆن وه‌زعت وایه‌؟!!
فه‌هد پێی گوت: برای خۆم! ئێمه‌ كچه‌كانمان یارمه‌تیمان ده‌ده‌ن.. به‌یانیان كچه‌گه‌وره‌كه‌مان دێت نانی به‌یانی له‌ته‌ك خۆیا دێنێت، نانمان ده‌رخوارد ده‌دات و حه‌ماممان بۆگه‌رم ده‌كات، و جله‌كانمان ده‌شوات و ئینجا ده‌گه‌ڕێته‌وه‌ بۆ ماڵ خۆی.. كچه‌ ناونجينه‌كه‌م نیوه‌ڕوان دێت و نانی نیوه‌ڕۆمان له‌ته‌ك خۆیا بۆ دێنێ وده‌رخواردمان ده‌دات و جله‌كانمان بۆ ئوتوو ده‌كات و ئینجا ده‌گه‌ڕێته‌وه‌ بۆ ماڵ خۆی.. كچی سێ هه‌میشم شه‌وانه‌ نانی شێومان بۆدێنێ و ده‌رخواردمان ده‌دات و ده‌مان كاته‌ خه‌و و ئینجا ده‌رواته‌وه‌ بۆ ماڵ خۆی.. ئه‌زانی ئه‌وه‌ یه‌عنی چی؟!!
عیسای هاوه‌ڵیشی گوتی: نه‌خێر نازانم ..
فه‌هدیش گوتی: یه‌عنی باوكی كچان شێوده‌كاته‌وه‌ ئینجا ده‌خه‌وێت.. به‌ڵام باوكی كوڕ بێ شێو سه‌رده‌نێته‌وه‌!!

# # #
خوێنه‌ری به‌ڕێز
كاتێ خوا به‌هره‌یه‌ی به‌كه‌سێك به‌خشی بالاف به‌سه‌رخه‌ڵكانی ترا لێ نه‌دات و نه‌ڵێ: به‌ئازایه‌تی خۆم به‌ده‌ستم هێناوه‌، ده‌نا له‌وانه‌یه‌ وه‌ك قاروون خوا بیبات به‌ناخی زه‌ویدا، ویه‌كێ له‌و سێ شته‌ی هه‌ر له‌م دنیایه‌دا خوا تۆڵه‌یان لێ ده‌كاته‌وه‌ ئه‌وانه‌ن كه‌فه‌خر ده‌كه‌ن و به‌سه‌ر خه‌ڵكی ترا پۆز لێ ده‌ده‌ن.[/size]

[size=18]وه‌رگیراو..[/size]