(ئاكانیوز) ـ ئەمڕۆ چوارشەم ئەندامێكی یەكەتیی تۆپی پێی عێراق رای گەیاند، یەكەتییەكی دوێنێ كۆبوونەوەیەكی نائاسایی لەگەڵ زیكۆی راهێنەری هەڵبژاردەی عێراق بەست و لە بەشێكی كۆبوونەوەكەدا رێككەوتن لەسەر ئەوەی یارییەكی هەڤاڵینی لەگەڵ هەڵبژاردەی یەكەمی بەرازیل لە عێراق ئەنجام بدەن.

Naim Saddamنەعیم سەدام بە ئاژانسی كوردستان بۆ دەنگوباس (ئاكانیوز)ی راگەیاند بە رێككەوتن لەگەڵ یەكەتیی تۆپی پێی عێراق، زیكۆ قسەی لەگەڵ یەكەتیی تۆپی پێی بەرازیل كردووە بۆ ئەوەی وادەیەك بۆ یاریی هەڤاڵینیی نێوان هەردوو هەڵبژاردەی عێراق و بەرازیل دیاری بكات.

زیاتر گوتی "ئەگەر یەكەتیی تۆپی پێی هەردوو وڵات گەیشتنە رێككەوتن، یارییەكە لە عێراق دەكرێت و ئامانجیش لێی شكاندنی گەمارۆی وەرزشیی سەر عێراق و خۆئامادەكردنی هەردوو هەڵبژاردەیە بۆ پاڵەوانیەتییەكانی داهاتوو".

ئاماژەی بەوەش كرد "زیكۆ لەگەڵ یاریزانی نێودەوڵەتی كاكا رێك دەكەوێ بۆ ئەوەی ئامادەی یارییەكە ببێ".

هەڵبژاردەی تۆپی پێی عێراق لەژێر سەرپەرشتیی زیكۆی راهێنەری بەرازیلی بڕیارە ڕۆژی 2ی ئەیلوول/سێپتێمبەری داهاتوو، یەكەم یاریی خۆی لە قۆناغی سێیەمی پاڵاوتنەكانی پارزەوینی ئاسیا بۆ گەیشتن بە مۆندیالی 2014ی بەرازیل، بەرامبەر هەڵبژاردەی ئوردن لە هەولێر ئەنجام بدات.