[size=16]جوانیی ئه‌فسووناوی

هه‌موو شتێك جوانه‌ له‌ تۆ :
نازكردن، تاسه‌، گفتوگۆ
به‌لێندان، سه‌ردان، هاتووچۆ

چه‌نده‌ جوانه‌
شه‌پۆلی پێكه‌نینی ناز،
كه‌ ختووكه‌ی گیانم ده‌دا به‌ سه‌د ئاواز

لایلایه‌یه‌ بۆ خه‌وتنم
له‌ باوه‌شی گه‌رمی مراز

ئای ،چه‌ند جوانه‌
ڕه‌وتت به‌ره‌و قوتابخانه‌
به‌ هه‌نگاوی وردیله‌ی سووك
وه‌ك په‌پووله‌ له‌نجه‌ بكات
بۆ ماچێكی لێوی گوڵووك

هه‌موو شتێك جوانه‌ له‌ تۆ :
سۆزی گه‌رم ،
بزه‌ی نه‌رم ،
دڵته‌ڕیت و چێژی ناسك
جارجار چرپه‌ی تێكه‌ڵ شه‌رم

چه‌نده‌ جوانه‌ :
په‌نجه‌ی له‌ خۆوه‌ نه‌رم و شل
تاڤگه‌ی كه‌زیی ئارمووشینی
په‌خش و خاوی سه‌رشان و مل

چه‌نده‌ جوانه‌ :
قژی ته‌نكی سه‌ر ناوچه‌وان
كه‌ وه‌كوو ته‌م سه‌ما ده‌كا
له‌سه‌ر به‌فر و گوڵ ئه‌رخه‌وان

هه‌مووشتێك جوانه‌ له‌ تۆ :
ورده‌ نیگا ،
چاو و برۆ ،
گێڕانه‌وه‌ی بیره‌وه‌ریت
باسی خۆشی و ده‌رده‌سه‌ریت

باسی ده‌سته‌خۆشكانی خۆت
باسی شیعری بێ تام و بۆت
باسی دواڕۆژ،
باسی ناوماڵ ،
باسی ناوی یه‌كه‌م مناڵ !

عبدوڵڵا په‌شێو
1966 – هه‌ولێر
[/size]