[center][size=16]هانا
ئێستا.. منی ون له‌ ته‌مومژی ڕه‌شی غوربه‌تا
گه‌ڵای دره‌ختی گیانم هه‌ڵوه‌ری..
له‌ ناو بڵێسه‌ و گڕی مه‌ینه‌تا
*

ده‌توخوا وه‌ره‌..
بیابانی دڵم.. تینوی کانیاو - شەیدای سێبه‌ره‌
ده‌توخوا وه‌ره‌..
با سه‌رابه‌کان ببن به‌ شه‌تاو
دره‌خت سه‌ر بکا به‌کۆشی هه‌ورا..
هاژه‌ بێته‌وه‌ ناو چه‌می سوتاو
*

ده‌توخوا وه‌ره‌..
له‌تینوێتی‌د‌ا..
هه‌ور خنکاوه‌
لوتکه‌ بێ به‌فره‌
دره‌خت سوتاوه‌
ده‌توخوا وه‌ره‌..
دڵ نوقمی ئه‌شکه‌.. مه‌رگ چاوه‌ڕێمه‌..
خاکێکی سوتاو مه‌زار و ڕێمه‌
*

با بگه‌ڕێمه‌وه‌ به‌ره‌و جیهانی سه‌وزی مناڵیی
با هه‌ست به‌بۆسۆی پرچی سوتاوی ڕۆژه‌کان نه‌که‌م..
نه‌ڵێم.. ئه‌و ڕۆژه‌ سه‌ختانه‌م دیوه‌
به‌هاران جارجار چه‌پکێ گوڵاڵه‌..
بگرمه‌ ده‌ست و به‌ دایکم بڵێم..
ڕاسته‌ گوڵاڵه‌ خوێنی شه‌هیده‌؟
ته‌رمی شه‌هیدم هێشتا نه‌دیوه‌
که‌ تۆ هاتیت و مناڵ بومه‌وه‌..
ده‌مه‌و ئێواران مه‌لی سه‌رنجم..
له‌ داوی تیشکی زه‌رده‌.. ده‌ئاڵێ
خۆرم لێ ئه‌بێ به‌ تۆپێکی سوور یان پرته‌قاڵێ
به‌ دایکم ئه‌ڵێم.. ئه‌چمه‌ سه‌ر لوتکه‌ و ئه‌یگرمه‌ باوه‌ش
خۆر ئه‌هێنمه‌ ژووره‌که‌مه‌وه‌..
چرامان ناوێ شه‌وی تار و ڕه‌ش
*

ده‌توخوا وه‌ره‌..
با سه‌رابه‌کان ببن به‌ شه‌تاو
دره‌خت سه‌ر بکا به‌کۆشی هه‌ورا..
هاژه‌ بێته‌وه‌ ناو چه‌می سوتاو

ژه‌نه‌راڵی پایز[/size][/center]