[center]پرۆژه‌ی نوێی شه‌هرام عه‌لیدی له‌ نێوان 10 باشترین پرۆژه‌ی دنیا له‌ فیستیڤاڵی كاندا هه‌ڵبژێردرا

KTV ...

نوێترین پرۆژه‌ی سینه‌مایی فیلمسازی كورد شه‌هرام عه‌لیدی له‌ نێوان 10 باشترین پرۆژه‌ی به‌رچاوی دنیا له‌ شه‌ست و پێنجه‌مین خولی فیستیڤاڵی نێونه‌ته‌وه‌یی فیلمی كانی 2012 هه‌ڵبژێردرا.

به‌ پێی راگه‌یاندنی گشتیی ئه‌م پرۆژه‌یه‌، "ئه‌و گۆڕستانه‌ی كه‌ هه‌موو رۆژ ێك ترێی ده‌دا" A Cemetery Which Breeds Grapes Every Morning نوێترین پرۆژه‌ی سینه‌مایی فیلمسازی سنه‌یی شه‌هرام عه‌لیدی له‌ نێوان 10 باشترین پرۆژه‌ی به‌رچاوی دنیا له‌ به‌شی "سینه‌مای جیهان له‌ كان" cinema du monde له‌ شه‌ست و پێنجه‌مین خولی فیستیڤاڵی نێونه‌ته‌وه‌یی فیلمی كانی 2012 هه‌ڵبژێردرا.

به‌شی "سینه‌مای جیهان له‌ كان" كه‌ به‌ به‌شی كه‌شف و ناساندنی پرۆژه‌ سینه‌ماییه‌كانی جیهان ناسراوه‌، هه‌موو ساڵێك 10 سیناریۆ و 10 ده‌رهێنه‌ری سه‌ركه‌وتووی دنیا ده‌ستنیشانده‌كات كه‌ ئه‌مساڵ له‌ نێوان 140 سیناریۆ له‌ 50 وڵاتی جیهان، 10 باشترین پرۆژه‌ی به‌رچاوی دنیا هه‌ڵبژێردراون كه‌ نوێترین پرۆژه‌ی سینه‌مایی شه‌هرام عه‌لیدی به‌ ناوی "ئه‌و گۆڕستانه‌ی كه‌ هه‌موو رۆژ ێك ترێی ده‌دا" له‌ ته‌نیشت 10 سیناریۆی ده‌رهێنه‌ره‌كانی وڵاتانی شیلی، برازیل، ڤێیه‌تنام، ماداگاسكار، پاراگوئا، روواندا، برێمه‌، تونس و فلستین به‌رچاوده‌كه‌ێت.   

ئه‌م 10 ده‌رهێنه‌ره‌ی دنیا له‌ لایه‌ن دوو هونه‌رمه‌ندی ناوداری سینه‌مای جیهان له‌وانه‌: ئه‌كته‌ر و ئه‌ستێره‌ی ناوداری سینه‌مای جهان "ماریا دێ مێدریووس" Maria de Medeiros و ده‌رهێنه‌ری ناوداری دنیا "ئیلیا سوله‌یمان" Elia Suleiman له‌ فیستیڤاڵی نێونه‌ته‌وه‌یی كانی 2012 هاوڕێیه‌تی ده‌كرێن.

ئه‌م 10 ده‌رهێنه‌ره‌ی كه‌ بۆ به‌شی "سینه‌مای جیهان له‌ كان" ده‌ستنیشانكراون له‌ رۆژانی 16 تا 25ی ئایار / مایۆی 2012 له‌ شه‌ست و پێنجه‌مین خولی فیستیڤاڵی نێونه‌ته‌وه‌یی فیلمی كانی 2012 ئاماده‌ده‌بن تاكوو چه‌خماغه‌ی به‌رهه‌مهێنانی پرۆژه‌ی هه‌ڵبژێردراو و چوونه‌ناو سینه‌مای جیهان لێبده‌ن.

سینه‌ماكاری كورد شه‌هرام عه‌لیدی به‌ "سرته‌ له‌گه‌ڵ با" Whisper With the Wind یه‌كه‌مین فیلمی بڵندی سینه‌مایی خۆی له‌ به‌شی پێشبڕكێی به‌شی هه‌فته‌ی ره‌خنه‌گرانی شه‌ست و دووه‌مین خولی فیستیڤاڵی نێونه‌ته‌وه‌یی فیلمی كانی 2009 له‌ وڵاتی فه‌ره‌نسا به‌شداریكرد و سێ خه‌ڵاتی سه‌ره‌كی ئه‌م به‌شه‌ی به‌ده‌ستهێنا، له‌وانه‌: "خه‌ڵاتی روانینی گه‌نج له‌ لایه‌ن هه‌ڵبژارده‌ی لاوانی ئه‌ورووپا"، "خه‌ڵاتی كه‌ناڵی 5 ته‌له‌فیزیۆنی فه‌ره‌نسا" و هه‌روه‌ها "نمایشكردنی فیلمه‌كه‌ له‌ سه‌رتاسه‌ری فه‌ره‌نسا ـ له‌ لایه‌ن ئه‌نجوومه‌نی سینه‌مای سه‌ربه‌خۆ و سندووقی سه‌ره‌كی چالاكی كۆمه‌ڵایه‌تی ACID/CCAS".

ئه‌م فیلمه‌ له‌ درێژه‌دا به‌ به‌شداری له‌ فیستیڤاڵی جۆراوجۆری فیلم له‌ سه‌رتاسه‌ری جیهان، كۆمه‌ڵێك خه‌ڵاتی گرینگی بۆ هه‌رێمی كوردستان به‌ده‌ستهێنا، له‌وانه‌:
ـ خه‌ڵاتی ره‌خنه‌گرانی لاوی هیندستان یا خه‌ڵاتی "ده‌روازه‌ی زێوی هیند" له‌ به‌شی كێبڕكێی یازده‌یه‌مین خولی فیستیڤاڵی نێونه‌ته‌وه‌یی فیلمی "مۆمبای" له‌ هیندستان
ـ خه‌ڵات و مه‌دالیای شانازی زانكۆكانی هه‌ڵبژارده‌ی فه‌ره‌نسا له‌ بیسته‌مین خولی فیستیڤاڵی نێونه‌ته‌وه‌یی فیلمه‌ مێژووییه‌كانی "پساك" له‌ وڵاتی فه‌ره‌نسا
ـ خه‌ڵاتی تایبه‌تی لێژنه‌ی ناوبژیوانی شه‌شه‌مین خولی فیستیڤاڵی نێونه‌ته‌وه‌یی فیلمی "ئامازۆن" له‌ وڵاتی به‌رازیل
ـ خه‌ڵاتی باشترین فیلم له‌ لایه‌ن لێژنه‌ی ناوبژیوانی زانكۆكانی براتیسلاوا له‌ یازده‌یه‌مین خولی فیستیڤاڵی نێونه‌ته‌وه‌یی فیلمی "براتیسلاوا" له‌ وڵاتی ئیسلۆڤاكیا
ـ خه‌ڵاتی "دۆن كیشۆت" له‌ بیسته‌مین خولی فیستیڤاڵی نێونه‌ته‌وه‌یی فیلمی "ترۆمسۆ" له‌ وڵاتی نه‌رویج
ـ خه‌ڵاتی سه‌ره‌كی باشترین فیلم بۆ شه‌هرام عه‌لیدی و خه‌ڵاتی باشترین ئه‌كته‌ری پیاوی بۆ ئه‌كته‌ری ناوداری سینه‌مای كوردستان عومه‌ر چاوشین له‌ هه‌شته‌مین خولی فیستیڤاڵی نێونه‌ته‌وه‌یی فیلمی "ئۆرۆعه‌ڕه‌ب" (ئێمال) Amal له‌ ئیسپانیا
ـ خه‌ڵاتی باشترین وێنه‌گرتن بۆ هونه‌رمه‌ندی كرماشانی تووره‌ج ئه‌سڵانی و باشترین ئه‌كته‌ر بۆ عومه‌ر چاوشین ئه‌كته‌ری به‌ئه‌زموونی كورستان له‌ یه‌كه‌مین خولی فیستیڤاڵی نێونه‌ته‌وه‌یی فیلمی "به‌غدا" له‌ وڵاتی عێراق.

به‌ڕێوه‌به‌رایه‌تی راگه‌یاندنی گشتیی پرۆژه‌ی "ئه‌و گۆڕستانه‌ی كه‌ هه‌موو رۆژ ێك ترێی ده‌دا".
[/center]