[center][/center]

[center]دۆن ڕێچکەی قەیسەر دەگرێتەبەر

نووسینی   دانەر ئەسڵان /

دانەر ئەسڵان
ئەوانەی وەک بەندە خۆیان بە مێژووی تۆپی پێوە خەریک کردووە دەزانن و خوێندوویانەتەوە و بە ڤیدیۆش بینیویانە کە لە مەزنترین یاری تۆپی پێ لە سەدەی بیستەم کە بە یارییە ماراسۆنییەکە ناسراوە ڕووبەڕووبوونەوەی نێوان ھەردوو ھەڵبژاردەکانی ئەڵمانیای خۆرائاوا و سکوادلازۆرای ئیتاڵیا بوو لە یاری پێش کۆتایی مۆندیالی مەکسیکی ساڵی ١٩٧٠ دا.

ئەوەی لەو یارییەدا ڕوویدا مێژوو بە پێتی زێڕین نووسیویەتییەوە لە مەزنی یارییەکە لە نێوان ھەردوو زلھێزەکەی تۆپی پێی ئەوروپا و جیھاندا کە دەرەنجام بە بردنەوەی سکوادلازۆرای ئیتاڵیا کۆتایی پێھات بە ئەنجامی ٤ – ٣ و لە مێژووی تۆپی پێدا ناوی “ماراسۆن” ی تۆپی پێی لێ نرا لە سەدەی بیستەمدا.

لە ھەمان یاریدا چیرۆکێک ھەیە کە تا ئەمڕۆمان ئەوەتا من لە نووسینێکدا ئاماژەی بۆ دەکەمەوە دڵنیاشم ئەگەر پاش ٢٠ ساڵی تریش کەسێک ئەم نووسینەی خوێندەوە بە ھەمان شێوە ئەو چیرۆکە نوێ و ئەبدایت دەبێتەوە و دەگێڕدرێتەوە کەواتە بە وێنەی ئەو یارییە مەزنەی مێژووی تۆپی پێ چیرۆکی شان دەرچوونی قەیسەری تۆپی پێی ئەو کات و ئەفسانەی لیبرۆکانی جیھانی تۆپی پێی ئێستا فرانزبیکن باوەر کاریگەری ھەیە و لەگەڵ ناوھێنانی ئەو یارییەدا ھەموان وێنەی قەیسەرمان دێتە بەرچاو کە چۆن بە شانێکی دەرچوو و بەستراوەوە کە شانی چەپی بوو ماوەی ٦٥ خولەکی یارییەکە بەردەوام بوو لەگەڵ دوو تاییمی زیاد کراودا ئەمەش بوو بە یەکێک لە چیرۆکە مەزن و کاریگەرەکان بۆ ھەموو مرۆڤێک کە ڕۆژێک لە ڕۆژان حەزی بۆ یاری تۆپی پێ جووڵاوە و ویستوویەتی لە ھێڵی بەرگریدا یاری بکات و بە وێنەی قەیسەر مەزنی خۆی نیشان بدات و بە پێکراویش ھەر یاری بکات.

پێکانە ناودارەکانی مێژووی تۆپی پێ زۆرن ھەر لە شکانی ئێسکی ڕانی پیلێوە بۆ شان دەرچوونەکەی زێدان لە مۆندیالی ٢٠٠٦ ی ئەڵمانیا و دواتر چاک بوونەوەی لە نێو یاریگادا بۆ چەندان و چەندان پێکانی کاریگەری تر، بەڵام ئەوەی کە لە ھەموان زیاتر سەرنجی منی ڕاکێشا کە من وەک سزایەک بۆ ئەو ھاندەرانەی یانەی ڕیاڵ مەدریدی دەبینم لە لایەن ئاسمانەوە ھەمان پێکانی کارلۆس پۆیۆڵ بوو کە لە ھەفتەی ڕابردوو لە یارییەکەی بەنفیکا و بەرشەلۆنەدا تووشی ھات لە سەر یاریگای نوری تایبەت بە یانە پورتوگالییەکە کاتێک بۆ کەلەیەک ھەستا لە ناوچەی سزای بەنفیکادا بە توندی کەوت و ئانیشکی چەپی دەرچوو و بەو ھۆیەوە ماوەیەک زۆر لە یاریگاکان دوور دەکەوێتەوە کە ئەمەش چەند ھاوڕێیەکی یانەی شاھانەی خۆشحاڵ کرد ئەگەر چی زۆرێک ھاوخەمی خۆیان بۆ پۆجۆڵ دەربڕی بە تایبەت کریستیانۆ ڕۆناڵدۆ کە لە ئەکاونتە تایبەتەکانی خۆیدا لە سەر ھەردوو پێگە کۆمەڵایەتییەکانی فەیس بووک و تویتەر لە دۆخی پۆیۆڵی پرسییەوە و ھیوای خواست کە بە زووترین کات چاک ببێتەوە.

ھەر پاش ئەو یارییەی بەنفیکا بەرشەلۆنە لە بەشی یەکەمی کلاسیکۆی ئەم وەرزەی لالیگای ئیسپانیادا لە سەر یاریگای کامپ نوی تایبەت بە خۆی میوانداری یانەی ڕیاڵ مەدریدی کرد و بە وێنەی قەیسەر فرانزبیکنباوەر و پۆیۆڵ دۆن کریستیانۆش لە نیوەی تاییمی دووەمدا ویستی جوڵەیەکی ئەکرۆپاتیکی ئەنجام بدات و گۆڵێکی ناوازە لە سەر یانەی بەرشەلۆنەی کەتەلۆنی ڕکابەری یانەکەی تۆمار بکات، بەڵام ئەویش بە وێنەی قەیسەر و پیلێ بەردەوام بوو لە یاریکردن تا کۆتایی و بە ناچاری وەک دڵی شێرەکەی ھێڵی بەرگری یانەی بەرشەلۆنە نەبرایە دەرەوە تا نەخۆشخانە بەڵکو ئەو یاریزانە سەرەڕای ھەبوونی ئەو ھەموو ئازارەش کە لە شانی چەپیدا ھەستی پێ دەکرد، بەڵام ھەر بەردەوام بوو لە یاری کردن و دوو جاریش مەترسی دروست کردەوە بۆ سەر گۆڵەکەی ڤاڵدێز سەرەڕای ئەوەی ئازارێکی زۆریشی ھەبوو و بە تەواوەتی قۆڵی چەپی شۆڕ بوو بۆوە خوارەوە.

کریس بەو گیانە بەرزە جەنگاوەریانەی کە نیشانیدا سەلماندی کە ئەو چەندە یاریزانێکی ئازا و بە جەرگە، بەڵام ئەوا جارێکیتریش من دەیڵێمەوە: “خوا ڕۆژگار بگرێت لە سەردەمی ئەم یاریزانە ئازایەدا شتێکی بچکۆلە ھەیە کە نەک عیسام شەوالی و دانەر ئەسڵان بەڵکو ھەموو دونیا ناتوانێت پێناسێکی بکات و ناسناوێکی شیاو بە خۆی بۆ دابنێن کە ئەویش لیۆنێل میسی ئەرجەنتینی یاریزانی یانەی بەرشەلۆنەیە، چونکە ئەگەر میسی نەبوایە کریستیانۆ ڕۆناڵدۆ تەڕ و وشکی بە یەکەوە لووش دەدا”.

ئەوەی کە لەو یارییەدا شتێکی جوانتر بوو لە چوار گۆڵەکەی کە ٢ گۆڵیان دۆن و ٢ گۆڵەکەی تریش لیۆ تۆماریان کرد ئەو دیمەنە جوانە بوو کە ھەموان پاش یارییەکە بینیمان کاتێک میسی لە کریستیانۆ نزیک بۆوە و لە دۆخی پرسییەوە ئەویش ھەر بە بێدەنگی و بە چەند وشەیەک دڵنیای کردەوە کە ئەو باشە، ئەو ھەڵسوکەوتەی میسی ھەمان ئەو دیمەنەی بیر خستمەوە کە دوو ساڵ لەمەوبەر و لە یاری گەڕانەوەی قۆناغی پێش کۆتایی خولی یانە پاڵەوانەکانی ئەوروپادا ڕوویدا کاتێک سێرجیۆ ڕامۆس زۆر بە توندی لە میسیدا لە ناوەندی یاریگاکەدا ئەو کات من دیمەنەکەم لە کامێراکەی جەزیرە ڕیازییەوە بینی چۆن کریستیانۆ لەو ھەڵسوکەوتەی ڕامۆس بێزار بوو کاتێک سەری بە نەرێنی ڕاوەشاند دواتر لە لیۆ نزیک بۆوە و لە دۆخی ئەوی پرسییەوە، ئەوەی میسیش کردی ھەمان ھەست بوو بەرامبەر بەو یاریزانەی کە لە مێژوو و داھاتووی تۆپی پێدا ناوی لەگەڵ ئەودا بە وشەی زێڕین دەنوسرێتەوە.

کەواتە میسی مەزن و جەنگاوەرە کریسیش مەزن و جەنگاوەرە ھەردووکیشیان لە ھەمان ئەو پێکەیان نۆش کردووە کە پێش ئەوان ئەفسانە مەزنەکانی وەک قەیسەر و گەوھەرە ڕەشەکە و بیبی دیۆرێ و ئیمپراتۆر و دیاردەکە و شێرە گۆڵچییەکە و چەندان و چەندانی تریش نۆشیان کردووە تەنھا بۆ خۆشەویستی تۆپی پێ و جوانتر کردنی کاتێک پیلێ بە قاچێکەوە یارییەک تەواو دەکات و قەیسەر بە شانێکی بەستراوەوە و گۆڵچییە شێرەکە بۆ ھەڵگرتنی تۆپێک خۆی کرد بە ژێر قاچی ئەندی کۆڵدا و دۆنیش دواجار بە شانێکی دەرچووەوە ماوەی زیاتر لە ٣٥ خولەک یارییەکەی بەڕێ کرد ھەموو ئەمانە بۆمانی دەردەخەن کە ئەوانە ئەفسانەن بە ڕاستی ناوازەن.

[/center]