بەشی یەکەمی ئەم قەسیدەیەم نزیکەی دوو ساڵ و نیو لەمەوبەر لێرە بڵاو کردەوە، ئێستا بەشێکی دیکەم بۆی زیاد کردووە، واتە یەک و دوو بڵاو دەکەمەوە.
هیوادارم لاوازم نەکردبێت لە بەشی دووەمدا.
--

دەمەو ئێواران خۆر ئاوابوونە
ئاسمان شیوەنی تاریکبونیەتی
بەدەم هەنسکی ماڵئاواییەوە
شەوی دەیجورە و پشکۆ دڵیەتی
*
دڵەی سیاپۆش نابینێ ئۆقرە
گەر سیمای ڕۆژی لە کەل ئاوابێ
چۆن بۆ مەرگی نور ناگێڕێ پرسە،
پەردەی زوڵمەتی بەسەر چاوا بێ؟!
*
ئای بۆ سەحەرێک کە ئەبەدی بێ
شەقایق هەردەم بزە بۆ خۆر کا
خۆریش بە هەستی پڕ میهر و سۆزی
کڵپە لە سینەی عاشق ڕەها کا
*
سپێدەیەکی پڕ گۆرانییە
شەقایق بۆ خۆر هاتۆتە سەما
زەردەی خۆرنشین چەندە سامناکە
خەیاڵی مەرگ دێنێ بەسەرما
*
خۆزگە ئەمتوانی بەری بەیانان
خۆری ئومێدت بۆ بوەستێنم
لە ڕەنگاڵەیی قەوس و قەزەحدا
پەیکەری باڵات بۆ بنەخشێنم
*
باڵات درەختی سەوزی بەهارە
چۆن دەستی پاییز هەڵیوەرێنێ!؟
چۆن موچڕکەی خەزانی ڕۆحم
جوانی لە لەپی بەهار دەربێنێ؟!
*
تاکە تروسکەی ئاسمانی رەشپۆش
ئەستێرەیەکە مات و گڕگرتوو
ژیلەمۆی ئەویش ببیتە خۆڵەمێش
کێ بگری بۆ، عومری بابردوو؟
*
بەسەر تابوتی خۆشبەختی منا
ئەمشەو چاوانم دوا تنۆکیان ڕشت
کڕێوەی هەناسە و گڕکانی دەروون
دوایین بزەی، منداڵێمی کووشت....

سیروان عەباس

.