[size=24]هاوڕێم![/size]

[size=16]
بێده‌نگ مه‌به..
چ زه‌مه‌نی سستییه‌كه
وا چوار په‌‌لی گرێ داویت
به‌باڵای گۆشه‌گیریدا؟
چ به‌سته‌ڵه‌كێكه
ڕێگه‌نادات
خونچه‌ی هاوار..
له‌سه‌ر لێوه‌كانت بپشكوێن؟
بێده‌نگ مه‌به
ئه‌زانم..
ئه‌و ‌ده‌سماڵه‌ی پرشنگی خۆری
قه‌ده‌غه كردووه
بگاته ڕه‌نگی كه‌زییه‌‌كانت
هه‌ورێكه‌ له ‌تووڕه‌بوون
ئه‌و لیباسه‌ی به ‌باڵات بڕاوه
كفنێكه له ‌زۆرداری..[/size]

[size=24]هاوڕێم![/size]

[size=16]
بێده‌نگ مه‌به..
ده‌ست بنێ له ‌بینی
ئه‌و خه‌نجه‌ره‌ی ئه‌یبڕنه‌
سه‌ردڵی ئه‌شقێكت و
یاخی به‌
له‌خوێندنه‌وه‌ی ئه‌و كتێبانه‌ی
له‌سه‌ر ڕه‌فه‌كانی عومرت
كه‌ڵه‌كه بوون.
چ زه‌مه‌نی سستییه‌كه؟
چ واده‌ی بێده‌نگییه‌كه؟
خۆت بگه‌یه‌نه سه‌رباڵی
ئه‌و ڕۆژانه‌ی ژیان
به ‌چاوه‌كانتا ئه‌گه‌ڕا و
په‌نجه‌كانت بخه‌ سه‌ر وه‌ته‌ری
ئه‌و كه‌مانچه‌یه‌ی
میلۆدییایه‌ك بوو
بۆ گه‌ڕانه‌وه‌ی به‌هار..
ئه‌و ئینجانانه بنێره ژێر
ڕه‌هێڵه‌ی بارانێك
كه‌ پڕن له ‌گوڵی هیوا،
ده‌م مه‌نێ به ‌لێوی ئه‌و كانییانه‌وه
كه پڕن له‌ ‌ژه‌هر و
فوو بكه له گڕی ئه‌و ده‌نكه شه‌مچه‌یه‌ی
جوانیت ئه‌كا به ژیله‌مۆی
دوای ئاگرێكی بێ به‌زه‌‌یی..[/size]

[size=24]هاوڕێم![/size]

[size=16]بێده‌نگ مه‌به..
بێده‌نگی تۆ
تۆوی كۆیله‌یه‌تی
له ‌سه‌ر دێڕی ئه‌و ده‌فته‌رانه
شین ئه‌كات
كه ‌په‌تی سێداره‌یان له‌سه‌ركێشراوه
سستی تۆ..
قه‌وزه ئه‌نێته نێو ئه‌و گۆمانه‌ی
گوڵه زه‌نبه‌قه‌كانی تێدا ئه‌خنكێنن
ئازار‌‌كانیشت..
شه‌یتانی شه‌ڕ
هه‌موو شه‌وێك ئه‌یانكاته
ئاوازی (مۆنۆ موای) و
له ‌كۆڵانه‌كانی جه‌سته‌ی تۆدا
سه‌مایان له‌سه‌ر ساز ئه‌دات و
چرا‌كانی دوورگه‌ی لاوازیت
ئه‌كوژێنێته‌وه..[/size]

[size=24]هاوڕێم![/size]

[size=16]
بێده‌نگ مه‌به..
سێوه كرمێیه‌كان فڕێ بده‌ و
چاوی ڕه‌شی په‌نجه‌ره‌كان
پڕ بكه له‌ نوور،
چۆنت ئه‌وێت هاوار بكه
ئاسۆ پڕ بكه له خۆشه‌ویستی
چیتر كۆیله‌ی بێده‌نگی مه‌به
هاوار بكه:
نه‌فره‌ت له كۆیله‌یه‌تی
نه‌فره‌ت  له ‌دیكتاتۆریه‌تی
نه‌فره‌ت له ‌بێویژدانی
نه‌فره‌ت له‌بێده‌نگی..[/size]

[size=24]كه‌ژاڵ ئیسماعیل[/size]