ئەبێ خاتوو ئەلیسا خۆى و وەفدە هاوڕێكەى چەند دەفتەر دۆلار لە پارەى ئەم میللەتە قوڕبەسەرە نۆشى گیان بكەن؟ وەڵامى ئەم پرسیارە لاى ئەو كەسانەیە كەلە پشت داوەتكردنى ئەم هونەرمەندەوەن بەمەرجێك ئەوەشى لەگەڵ حساببكەن كە بۆخۆیانى لادەدەن. دیارە هێنانى ئەلیسا بەشێكە لە پڕوپاگەندەكانى هەڵبژاردن و بەهەدەردانى سامانى میللەت لەپێناو مانەوە لە دەسەڵاتدا كە ئەمە مسۆگەر نییە. باشە ئەو پارەیە خەرج بكرایە بۆ دروستكردنى ستۆدیۆیەك بۆ هونەرمەندان باشتر نەبوو؟ زۆر جار هونەرمەندانى كوردستان باس لەوەدەكەن كە ناتوانن بەرهەمى نوێ بڵاوبكەنەوە لەبەر زۆرى نرخى تۆماركردن و بڵاوكردنەوەوە؟ ئەلیساو گۆرانیبێژەكانى هاوتاى ساڵانە سەدان هەزار دۆلار داهاتیانە لەرێگەى بڵاوكردنەوەى گۆرانییەكانیان و نمایشكردنى جەستەیانەوە، ئەى باشە هونەرمەندە كوردەكان داهاتیان چەندە؟ وەك لاى هەموان ئاشكرایە زوربەى هونەرمەندەكانى كوردستان كارى تر دەكەن ئەگەینا ناتوانن بژێوى ژیانى خۆیان دابین بكەن، كە ئەمە جێگەى رێز و خۆشەویستى و سەربەرزییە بۆ ئەوان و جێگەى سەر شۆڕیشە بۆ حكومەت و كاربەدەستان. بەداخەوە هەندێك هونەر فرۆشیش هەیە كە سودمەندبوون لە دەسەڵات. لەبیرمە ساڵانێك لەمەوبەر هونەرمەند بورهان مەجید گۆرانییەكانى لە دەزگاكانى راگەیاندن كێشایەوە وەك نارەزاییەك دژى پشتگوێخستنى هونەرى كوردى و گرنگیدان بە هونەرى بیانى، ئەى باشە ئێستا هونەرمەندان دەبێت هەڵوێستیان چیبێت كاتێك حزبى دەسەلات پێی وایە بە هەمو هونەرمەندە كوردەكان ناتوانن جێگەى هونەرمەندێكى عەرەب بگرنەوە. ئەگەر هونەرمەندە كوردەكان هەڵوێست وەرنەگرن دیارە بۆ چونەكەى ئەو حزبانە راستە. ئیسماعیل خورماڵى شاعیر لە هۆنراوەى "خەمى خاك"دا كە هونەرمەند بورهان مەجید كرى بە گۆرانى و كەناڵى كوردسات بلاوكرایەوە دەڵێت "دەبا دڵى كوڕوكاڵمان بە نیشتیمان ئاشتكەینەوە"، تۆ بڵَێى لاوەكانى كوردستان لە حزبە كوردییەكان تۆرابن چونكە تامەزرۆى گۆرانى عەرەبین و دەستیان پێیناگات؟ ئاخر دەبەنگى حزبە دەسەلاتدارەكانى كوردستان كە مەبەستم پارتى و یەكێتییە ئا لێرەدایە! لاوى كورد پێویستى بە گۆرانى عەرەبى نییە، لاوى كورد پێویستى بە كارە، پێویستى بە ژیانە، ئەگەر دەتانەوێت دەنگتان بۆ بدەن پارەى میللەت مەدزن، دەرچوى زانكۆ و پەیمانگاكان دامەزرێنن بۆ ئەوەى تۆزێك بڕواى میللەت بۆخۆتان بگێڕنەوە! تۆ بلێى گۆرانییەكانى ئەلیسا جێگەى نان و ئاو و كار بگرێتەوە بۆ لاوەكان؟ باش بزانن بەم كارەتان ئەوەندەى تر لاوەكانتان لەخۆتان تۆران و دڵى هونەرمەندە راستەقینەكانیشتان شكاند! ئێوە لەسەر ئەم كارە ناشرینانەتان بەردەوام بن، ئینجا لە 7/3 خۆتان دەبیننەوە.