چه‌ندین زانای به‌ریتانی هۆشداری ئه‌وه‌یان دا كه سه‌یركردنی یارییه‌كانی تۆپی پێ كاریگه‌ریی خراپی بۆسه‌ر دڵی مرۆڤ هه‌یه. ئه‌م زانایه به‌ریتانییانه له ئاكامی لێكۆڵینه‌وه‌یه‌كدا كه له‌سه‌ر زیاتر له 13 هه‌زار پیاو ئافره‌تیان ئه‌نجامداوه، گه‌یشتوونه‌ته ئه‌و راستییه‌ی كه دانیشتن به‌دیار ته‌له‌ڤزیۆنه‌وه به‌مه‌به‌ستی سه‌یركردنی یارییه‌كانی تۆپی پێ مرۆڤ دووچاری نه‌خۆشییه‌كانی دڵ ده‌كات. هه‌روه‌ها به‌پێی لێكۆڵینه‌وه‌كه 7%ی ئه‌و كه‌سانه‌ی كه رۆژانه بۆماوه‌ی یه‌ك كاتژمێر سه‌یری یاریی تۆپی پێ ده‌كه‌ن ئه‌گه‌ری تووشبوونیان به نه‌خۆشییه‌كانی دڵ لێده‌كرێت. له لێكۆڵینه‌وه‌یه‌كی دیكه‌شدا كه ئه‌ویش له‌باره‌ی سه‌یركردنی یارییه‌كانی تۆپی پێ ئه‌نجامدراوه و له گۆڤاری نێزده‌وڵه‌تی بۆ زانست و ده‌رمانه‌وه ئه‌نجامدراوه، ده‌ركه‌وتووه كه له هه‌ر 373 دا 35 كه‌سیان به‌هۆی سه‌یركردنی زۆری یارییه‌كانی ته‌له‌ڤزیۆنه‌وه دووچاری نه‌خۆشییه‌كانی دڵ ده‌بنه‌وه و دواتریش گیان له‌ده‌ست ده‌ده‌ن. ئه‌م لێكۆڵینه‌وه‌یه له‌لایه‌ن دكتۆر (كاترین)ه‌وه ئه‌نجامدراوه و له لێكۆڵینه‌وه‌كه‌شدا ئاماژه به‌وه‌ده‌كات كه سه‌یركردنی یارییه‌كانی تۆپی پێ و یاریی وه‌رزشییه‌كانی دیكه و دانیشتن به‌دیار كۆمپیوته‌ر و زۆر لێخوڕینی ئۆتۆمبێل مرۆڤ دووچاری نه‌خۆشییه‌كانی دڵ ده‌كه‌نه‌وه و هه‌ندێك جاریش ده‌بێته هۆی ئه‌وه‌ی كه مرۆڤه‌كان به‌م هۆیه‌وه گیان له‌ده‌ست بده‌ن و ماڵئاوایی له‌ژیان بكه‌ن
دله‌که‌م