لەگەڵ گەیشتنی هەر جۆر و مۆدێلێكی ئۆتۆمبێل بۆ كوردستان، نێوی هونەرمەندێكی بەسەردا دەبڕێ . كڕیاران و فرۆشیاران دەڵێن ناوی هەندێك لەو ئۆتۆمبێلانە لەبەرئەوەی ناوەكانیان قورسن، خەڵك ناوی هونەرمەندانیان لێدەنێن.
لەگەڵ پەخشكردنی زنجیرە درامای ئارەزوو، تەكسی كوردستان دەركەوت، هەر زوو ناوی (سەباو) لە تەكسی تۆیۆتا كرۆلا نرا. سەباو كاراكتەرێكی نێو دراماكە بوو، كە رۆڵێكی تێكدەرانەی هەبوو. بە بۆچوونی شوفێرانی تاكسییە كۆنەكان، تاكسی كوردستان گرفتی زۆری بۆ دروستكردن بۆیە ناویان لێنا سەباو.
ساڵی رابردوو لەكاتی كۆتایی هاتنی پەخشی درامای (گەردەلوول)، ئۆتۆمبێلی تۆیۆتا لاندكرۆز مۆدیلی 2009 گەیشتە بازاڕەكانی كوردستان، هەر زوو ئۆتۆمبێلەكە ناونرا (وەنەوشە)، كە وەنەوشە لە درامای گەردەلوول رۆڵێكی بەرچاوی دەبینی، هاووڵاتیان دەڵێن ئۆتۆمبێلەكە جوان  و دڵگیرە بۆیە بەنێوی وەنەوشەیان كردووە.
ناولێنانی ئۆتۆمبێڵ بەناوی هونەرمەند یان كەسایەتییەكان لە كوردستان دەگەڕێتەوە بۆ سەرەتای ساڵانی نەوەدەكان. تائێستا دیار نییە كێ ئەو ناوانەی لەو ئۆتۆمبێلانە ناوە، بەڵام ئەوانەی لە سلێمانی ناونراون بەنێوی هونەرمەندانی سلێمانی، ئەوانەی هەولێریش بەنێوی هونەرمەندانی هەولێر ناونراون، یاخود ناوی سەكردەو كەسایەتی و هونەرمەندی جیهانییان لێنراوە.
فارس محەممەد، 36 ساڵ، كە دەمێكە كاری كڕین و فرۆشتنی ئۆتۆمبێل دەكات لە نێو پێشانگاكانی هەولێر، سەرەتای نێولێنانی ئۆتۆمبێل بە نێوی هونەرمەند و كەسایەتییەكانی لە كوردستان گەڕاندووە بۆ ساڵی 2002 و گوتی "ئەوكات بە ئۆتۆمبێلی لاندگرۆزەریان دەگوت مۆنیكا، چونكە ئۆتۆمبێلێكی جوان بوو، مۆنیكاش كچێكی جوان بوو". مۆنیكا لوینسكی، كارمەندێكی جوانی كۆشكی سپی بوو لە سەردەمی سەرۆكایەتی بیل كلنتن دا، كە كلنتنی بە رابواردن لەگەڵی تۆمەتبار كرد. بەڵام لەڕاستیدا، پێش ئەوەشی مۆدێلێكی پێشتری لاندگرۆزەر بەنێوی لەیلا علوی سینەماكاری میسرییەوە نێونرابوو.
بەشێك لە فرۆشیاران هۆكاری ئەو نێولێنانە دەگەڕێننەوە بۆ قورسی ناوی هەندێك لەو ئۆتۆمبێلانە. كەلعی عەلی، 59ساڵ، خاوەنی پێشانگای هۆزان لە هەولێر، دەڵێت "هەندێك ئۆتۆمبێل كە دێن ناوی قورسیان لێیە، بۆیە ناوێكی شایستەی لێدەنێن، بۆ ئەوەی لەسەر زاران ئاسان بێ".
هەندێك لە هونەرمەندانیش ئەو ناونانەیان بەلاوە ئاساییە. عارەب عوسمان، كە حەیرانبێژێكی دیاری كوردە، ئۆتۆمبێلێكی بارهەڵگری بچووكی بەناو كراوە، ئەو لەوبارەوە بە(رووداو)ی راگەیاند"هەرچەندە من ئاگاداری ئەو ناولێنانە نیم، بەڵام بەلای منەوە ئاساییە و پێشی دڵگران نابم"، وەك بڵێی لە جۆری ئەو ئۆتۆمبێلە ناڕازیبێ كە بەنێوی ئەوەوە نێونراوە گوتی "ئەو ئۆتۆمبێلەی بەناوی وەنەوشە كراوە زۆر جوانە".
كۆمەڵناسانیش ئەو ناولێنانە بە كارێكی دروست نازانن  و دەڵێن رەنگە هەندێك لە هونەرمەندان پێیانناخۆش بێ. نێرگز حەمەسور، كۆمەڵناس لەو بارەیەوە دەڵێت "هاووڵاتیان كاتێك دەبینن یەكێك خاوەن كەسایەتییەكی دیارە ئۆتۆمبێلێكی بەنێو دەكەن، بەڵام رەنگە زۆرجار ئەو كەسە یان ئەو هونەرمەندە ناولێنانەكەی پێناخۆش بێ".
گۆرانیبێژ دەشنێ موراد پێی ناخۆشە ئۆتۆمبێلێكی بەناو بكرێت،"هەرچەندە ئەو ناونانە دەبێتە رێلامێك بۆ زیاتر ناساندنی هونەرمەند، بەڵام من پێم خراپە ناوی هونەرمەندان لەئۆتۆمبێل بنرێ، چونكە هونەرمەند زۆر لەوە گەورەترە ناوی لە ئۆتۆمبێلێك بنرێت"، بەڵام دەڵێ حەزدەكات شەقامێكی بەنێو بكرێ " بەومەرجەی شەقامەكە تایبەت بێ بە وەرزشوانان".
هونەرمەند عەتا قەرەداخیش بێزارە لەو دیاردەیە و دەڵێت "زیاتر لە 20 وڵات گەڕاوم لە هیچیان نەمبینیوە ناوی هونەرمەند لە ئۆتۆمبێڵ بنرێ، تەنیا لە كوردستان نەبێ، دیارە ئەوەش پەیوەندی بە ئاستی رۆشنبیری خەڵكەوە هەیە".قەرەداخی دەڵێت ئەگەر سەرمایەدار بووایە هوتێلێكی بەنێو سەید عەلی ئەسغەری كوردستانی یان رێستورانتێكی بەنێوی ماملێ دروستدەكرد.
ئێستا ئۆتۆمبێڵی لانسەر قەمەرە بەنێوی د.بەلقیس دۆسكی كراوە، بەڵام ئەو رەتیكردەوە كە ئەو جۆرە ئۆتۆمبێڵەی هەبێ و گوتی "من ئۆتۆمبێڵم هەر نییە"، ئەو كە مامۆستای كۆلیژی هونەرە جوانەكانە بە پاس هاتووچۆی كۆلیژ دەكات. سەبارەت بە ناونانی ئەو ئۆتۆمبێلەش بە ناوی ئەو گوتی "خەڵك ئازادە دەمكەنە تەیارەو سەیارە، چونكە تۆ ناتوانی رێگری لەو خەڵكانە بكەی كە ناوی دكتۆرە بەلقیس بەكارمەهێنن دیارە ئەوان لەخۆشەویستیان ناوی من بەكاردەهێنن بۆ ئۆتۆمبێل، بەڵام نازانم چ ئۆتۆمبێلێكیان بەناو كردووم".

ئەو ئۆتۆمبێلانەی بەنێوی هونەرمەندان و كەسایەتییەكان كراون:
\- ئۆتۆمبێلی تۆیۆتا لاندگرۆزەر مۆدیل 1999 بەنێوی لەیلا علوی كراوە.
-لاندگرۆزەری مۆدێل 2001 بەنێوی مۆنیكا كراوە.
- مۆدیل 2009 ی لاندگرۆزەر ناونراوە وەنەوشە، مۆدیل 2010 بەنێوی عەزیز وەیسی كراوە.
- لانسەر 2009 بەنێوی د.بەلقیس كراوە.
- ئۆتۆمبێلی پیكاب تۆیۆتا جۆری هیلوكس مۆدیل 2005 بەنێوی هونەرمەند مەرزییە فەریقی كراوە.
- ئۆتۆمبێلی هافی مۆتۆر، مۆدێل 2009 چینی، كە ئۆتۆمبێلێكی بارهەڵگری قەبارە بچووكی خڕە، بەنێوی هونەرمەند عارەب عوسمان كراوە.
- ئۆتۆمبێلی گلایزەر جۆری c300 مۆدیل 2008، بەنێوی ئۆباما كراوە
سه‌رچاوه‌ی تیشک