به‌غدا.. له ته‌قینه‌وه‌ی 2 بۆمبدا له‌ناو یاریگایه‌كی تۆپی پێ له به‌غدا 17 كه‌س بوونه قوربانی
هه‌ولێر 13 حوزه‌یران/یۆنیۆ (PNA) – سه‌رچاوه‌یه‌ك له پۆلیسی عێراقی رایگه‌یاند، ئێواره‌ی دوێنێ له ئه‌نجامی ته‌قینه‌وه‌ی 2 بۆمب له‌ناو یاریگایه‌كی تۆپی پێ له باشوری رۆژئاوای به‌غدا 17 هاووڵاتیی مه‌ده‌نی كوژران و بریندار بوون.
سه‌رچاوه‌كه له لێدوانێكدا بۆ سۆمه‌ریه نیوز وتی: "ئێواره‌ی دوێنێ یه‌كشه‌ممه 2 بۆمب له‌ناو یاریگایه‌كی تۆپی پێ له گه‌ڕه‌كی جیهاد له باشوری رۆژئاوای به‌غدا ته‌قینه‌وه و له ئه‌نجامدا 2 هاووڵاتیی مه‌ده‌نی كوژران و 15ی تریش بریندار بوون".
سه‌رچاوه‌كه وتیشی: "ئۆتۆمبێله‌كانی فریاگوزاری گه‌یشتنه شوێنی رووداوه‌كه و كوژراوه‌كانیان بۆ فه‌رمانگه‌ی پزیشكی داد گواسته‌وه و برینداره‌كانیشیان بۆ نه‌خۆشخانه‌یه‌كی نزیك ره‌وانه كرد، هاوكات هێزێكی ئه‌منیش شوێنی رووداوه‌كه‌ی گه‌مارۆ دا و لێكۆڵینه‌وه‌ش له‌وباره‌یه‌وه ده‌ستی پێ كرد".
شایه‌نی باسه ماوه‌ی 2 مانگه له شاری به‌غدا و چه‌ند پارێزگایه‌كی تری عێراق كرده‌وه توندوتیژییه‌كان له به‌رزبوونه‌وه‌دایه و به‌ده‌یان كه‌س بوونه‌ته قوربانی، ئه‌وه‌ش له كاتێكدایه كه وڵات له ته‌نگژه‌ی سیاسیدایه به‌هۆی ته‌واونه‌بوونی پیَكهاته‌ی حكوومه‌ت و یه‌كلانه‌بوونه‌وه‌ی وه‌زاره‌ته ئه‌منییه‌كان، سه‌ره‌ڕای ئه‌وه‌ی نوری مالكی ناوی كاندیده‌ی وه‌زاره‌ته ئه‌منییه‌كانی پێشكه‌شی ئه‌نجوومه‌نی وه‌زیران كردوه، به‌ڵام به‌هۆی ناكۆكییه سیاسییه‌كانه‌وه تا ئیَستا نه‌گه‌یشتوونه‌ته رێككه‌وتنێك.
س.ت