(ئاكانیوز) – ئیكەر كاسیاس گۆڵپارێز و كاپتنی یانەى ریال مەدریدی ئیسپانیایی رای گەیاند بردنەوە لە بەرشەلۆنە و دەستەبەركردنی جامی سۆپەری ئیسپانیا یەكێكە لە گرینگترین ئەركەكانی یانەى شاهانە.

كاسیاس كە پێشتریش رای گەیاندبوو لەگەڵ یاریزانانی تری ریال مەدرید هەموو تواناكانی خۆی دەخاتە گەڕ بۆ ئەوەی لە وەرزی نوێدا لە بەرشەلۆنە ببەنەوە، بەر لە كەمتر لە 2 هەفتە لە یاریی جامی سۆپەری ئیسپانیا بەویستی یاریزانانی بۆ بردنەوە لە كەتەلۆنییەكانی دووپات كردەوە.

كاپتنی ریال مەدرید لەبارەى كەمپی یانەكە لە چین گوتی، ئێمە بۆ بازرگانی و رێكلام كەمپمان لە چین ساز نەكردووە، بگرە هاتووین بۆ ئەوەی چاومان بەهاندەرانمان لە دەرەوەی ئیسپانیا بكەوێ و خۆمان بۆ وەرزی نوێش ئامادە بكەین.

ئەو گۆڵپارێزە نێودەوڵەتییە لەبارەى یارییان بەرامبەر بەرشەلۆنە گوتی، ئێمە بۆ تۆڵەسەندنەوە یاری ناكەین، بگرە دەمانەوێ باشترین ئاستی خۆمان پێشكێش بكەین و جامی سۆپەری ئیسپانیا دەستەبەر بكەین، بۆ ئەم مەبەستە هەموو تواناكانی خۆمان دەخەینە گەڕ، چونكە ئەم جامە بۆ ئێمە زۆر گرینگە.

هەردوو یانەى ریال مەدرید و بەرشەلۆنە لە 14ی ئەم مانگەدا لە یاریی كۆتای جامی سۆپەری ئیسپانیا لە یاریگەى "سانتیاگۆ بێرنابیۆ" لە مەدریدی پایەتەختی ئیسپانیا یاریی چوون ئەنجام دەدەن و دوای 3 رۆژ لە یاریگەى "كامپ نۆ" لە شاری بەرشەلۆنە لە یاریی گەڕانەوەدا بەیەك دەگەن.