(ئاكانیوز) - ئەندامێكی یەكەتیی تۆپی پێی عێراق ئەمڕۆ هەینی ئاشكرای كرد یەكەتییەكە لەگەڵ زیكۆ راهێنەری ناسراوی بەڕازیلی بۆ سەرپەرشتیكردنی هەڵبژاردەی تۆپی پێی عێراق رێك كەوتووە.

یەحیا زغەیر بەئاژانسی كوردستان بۆ دەنگوباس (ئاكانیوز)ی گوت یەكەتیی تۆپی پێی عێراق لەگەڵ زیكۆ رێك كەوتووە، بۆ ئەوەی بۆ ماوەی وەرزێك سەرپەرشتیی هەڵبژاردەی تۆپی پێی عێراق بكات.

زغەیر روونی كردەوە "زیكۆ باسی لایەنی مایەكیی نەكرد" و ئاماژەى بەوە دا "زیكۆ ئەوەی بۆ یەكەتیی تۆپی پێی عێراقی دووپات كردەوە كە وەك خۆشەویستییەك بۆ عێراق و گەلەكەی و ئەو پێوەندییە نێزیكەی كە لەگەڵ گەلی عێراقدا هەیەتی، دەیەوێ ئەركی راهێنەرایەتیی هەڵبژاردەی تۆپی پێی عێراق بگرێتە ئەستۆ و لایەنی مایەكی نابێتە بەربەست لە بەردەم ئەركی داهاتووی".

زیاتر گوتی زیكۆ لەگەڵ گەیشتنی بۆ عێراق، لە رێگەی دیتنی ژمارەیەك لە یارییەكانی خولی بژاردەی تۆپی پێ یاریزان دەستنیشان دەكات، سەرەڕای هەڵبژاردنی ژمارەیەك لە یاریزانانی هەڵبژاردەی عێراق كە لە 10ی ئەم مانگەدا لە یارییەكی هەڤاڵینیدا روووبەڕووی هاوتا قەتەرییەكەی دەبێتەوە.

هەروەها ئاماژەى بەوە دا "زیكۆ لە یاریگەى گەل لە بەغدا مەشقی هەڵبژاردەی عێراق دەكات"، ئەوەشی روون كردەوە "یەكەتیی تۆپی پێی عێراقی دەسەڵاتی داوەتە زیكۆ ستافی یاریدەرانی دیاری بكات".

پێشتر سەرۆكایەتیی وەزیرانی عێراق و وەزارەتی وەرزش و ولاوان ئامادەییی خۆیان بۆ پاڵپشتیی یەكەتیی تۆپی پێ و هەڵبژاردەی تۆپی پێی عێراق لە پاڵاوتنەكانی گەیشتن بەمۆندیالی 2014ی بەرازیل دووپات كردبووەوە.

هەژیێ گۆتنە "ئارتۆر ئەنتۆنیس كیۆمبرا" ناسراو بە زیكۆ لەدایكبووی 3ی ئادار/مارسی 1953یە، یەكێكە لە ئەفسانەكانی تۆپی پێی بەڕازیل و لە هەشتەكانی سەدەی رابردوودا سەرنجڕاكێشترین یاریزان بوو، خاوەنی زیاتر لە 800 گۆڵە، كە لە یانەكانی فلامینگۆی وڵاتەكەی و ئۆدێنیری ئیتاڵیایی و كاشیمای ژاپۆنی یاریی كردووە.

لە كاری مەشقیشدا كاری چەندان یانە و هەڵبژاردەی لە ئەستۆ بووە، لە 1998 یاریدەری راهێنەری بەڕازیل بووە، لە 2004 راهێنەری ژاپۆن بووە و جامی ئاسیای بۆ بەدەست هێناوە، لە وەرزی 2007-2008یش راهێنەری یانەی فەنەرباخچەی توركیایی بووە، هەروەها ئەركی راهێنەرایەتیی یانەى بونیودكۆری ئۆزبەكستانیشی لە ئەستۆدا بووە.