ژن‌و پیاو ڕۆژانە لەماڵەوە پەیوەندییان لەگەڵ یەكتر بەردەوامە، ئەگەر بیانەوێت لەم پەیوەندیەدا سەركەوتوو بن، ئەوا پێویستە زیرەكانە مامەڵە لەنێوان یەكتریدا بكەن‌و پێش بەتوڕەبوون‌و هەڵچونەكانیان بگرن، یان كۆنترۆڵی ڕق‌و كینەی دەرونی خۆیان بكەن، قسەكردن یان گفتوگۆ گوزارشتە لەبەردەوام پەیوەند‌و هەڵسوكەت لەگەڵ كەسێكی تر.
پێدەچێت بتوانین لەگەڵ كەسانی دیكە قسە بكەین، لەگەڵ ئەوەشدا هەندێ‌ لەهاوسەران لەقسەكردن‌و دەربڕینی وشەدا خۆیان لەهاوبەشی ژیانیان دەدزنەوەو هەندێ‌ كەس لەگەڵ بوونی ئەم پەیوەندیەدا ناتوانن بەسانایی دەستپێكی قسەكردن دەستپێبكەن، بەتایبەت لەگەڵ هاوسەرەكانی خۆیاندا.
بیرتان نەچێت تاك بەگشتی پێی خۆشە دەربارەی خودی خۆی‌و ئەزمونەكانی قسە بكات، بۆئەوەی پیشانی دەوروبەرەكەی بدات كە ئەویش وەك هەر تاكێكی تری ماندووی ئەم كۆمەڵگەیە ڕۆڵی هەیە، ئەوەش بەباسكردنی گرنگی كارەكانی خۆی پیشانی كەسانی دەوروبەری دەدات.
كۆدی سەركەوتنی گفتوگۆو قسەكردن لەپەیوەندیە كۆمەڵایەتیەكانداو بەتایبەت لەژیانی ژن‌و مێردایەتیدا ئەوەیە كە بەتامەزرۆیی‌و تەركیزەوە گوێ‌ لەو بابەتانە ڕابگرن كە بەلای هاوسەرەكانتانەوە جێگەی گرنگی‌و بایەخن، ڕێڕەوێكی تری دیالۆگكردن لەگەڵ هاوسەرەكانتاندا ئەوەیە، سەبارەت بەكارو فرمانەكانی ڕۆژانەتان قسە بكەن، بۆئەوەی لەڕووی ڕۆحیەوە زیاتر لێك نزیك ببنەوە، هەروەها ڕاو بۆچوونی جیاوازتان بەشێوەیەك دەرببڕن كە بەرامبەرەكەتان زویرو ناڕەحەت نەكەن، هەوڵ بدەن هەمیشە بەڕێزەوە خاڵە لاوازەكانی یەكتر شرۆڤە بكەن، پێویستە ئەوە بزانن كە پرسیاركردن باشترین ئامرازە بۆ دەستپێكردن‌و بەردەوامی گفتوگۆكردن، چونكە پرسیاركردن بەئاسانی هاوسەرەكەت دێنێتە قسە، بەوەش بەتامەزرۆیی‌و دڵگەرمیەوە گوێ‌ بۆ قسەكانت ڕادەگرێت، جا بۆئەوەی پرسیارەكانتان سوودمەندو كاریگەر بن باشتر وایە بەپرسیاری سادەو كورت دەست پێبكەن‌و لەپاش هەر پرسیارێك چاوەڕێی وەڵام بن‌و پەلە نەكەن لێیان.
هەوڵ بدەن هاوسەرەكانتان دڵنیابن لەوەی كە گوێ‌ بۆ قسەكانیان دەگرن، ئەم كارەش بەپەیڤی “بەڵێ‌” و نیگاكردن ئەنجام بدەن، باشترە پیاوان بزانن كە ژنان پێیان خۆشە چەندان كاتژمێر لەكەناری هاوسەرەكانیاندا دابنیشن‌و قسە بكەن، لەبەرامبەریشدا پیاوانی سەركەوتوو ئەو پیاوانەن كە ساتە جوانەكان درووست دەكەن یان جێگەی ئەو چەند كاتژمێرە كاتە دەكەنەوە لەشەو وڕۆژێكدا بۆ قسەكردن لەگەڵ خێزانەكانیاندا.
لەیادتان بێت ژنان هەرچەندە قسە بكەن بەهەمان ئەندازە دڵ‌و دەرون‌و مێشكیان خاڵی دەبێتەوەو دوور دەكەونەوە لەخەمۆكی‌و دڵەڕاوكێ‌‌و فشاری دەرونی، ئەو ژنانەی كە گیرۆدەی ڕاڕایی‌و ناهاوسەنگی دەرونین، پیاوەكانیان دەتوانن زەمینەیەكیان بۆ قسەكردن بۆ بسازێنن، بۆئەوەی بتوانن لەو دۆخە ناهەموارە بیانهێننە دەرەوە، بەمەش كێشەو خەمۆكی‌و ڕاڕاییەكەیان تا ڕادەیەكی باش چارەسەر دەبێت.
ئەوەی ماوەتەوە بیڵێین ئەوەیە كە پێویستە ژنان‌و مێردەكانیان بەسەرنجەوە گوێ‌ لەقسەكانی یەكتر بگرن‌و دوور بكەونەوە لەخوێندنەوەی رۆژنامەو گۆڤارو سەیركردنی تیڤی لەكاتی قسەكردنیاندا.

    Bawar. م/ده رونناسى