[size=16]جامی لێوت فرو بێنه‌ بۆ سه‌ر لێوم

بۆ نازانی چه‌ند تینومه‌و چه‌ند په‌شێوم

بێ و ده‌فته‌ری دڵم تێیکه‌ دیارییه‌

هه‌ر بۆ کاراسکی چاوی تۆ جێ یارییه‌

من ئازاری خۆم خۆش ئه‌وێ و ماکی خۆمه‌

هه‌رگیز خه‌مێ بۆ خۆم ناخۆم خه‌می تۆمه‌

*                   *                     *

با چاوی تۆ بۆ کوشتنم ته‌رخان نه‌بێ

با زوڵفی لول من شێت نه‌کاو په‌خشان نه‌بێ

با ئاغر بێ هاتو چۆکه‌ت وه‌ك جارانت

مه‌یکه‌ به‌ تۆو ڕژێنه‌که‌ی به‌هارانت

چاو داگره‌ لێت هاتووه‌ به‌ڵام به‌ناز

مه‌لی دڵم ده‌سته‌مۆیه‌ بۆچیته‌ باز

*                  *                     *

خوا پێداوی جوانیت هه‌یه‌ لێم بپرسن

خوا پێداوان تۆی لێده‌رچێ ئێسك قورسن

ئه‌و جوانییه‌ی لای تۆ نه‌بێ که‌ی جوانییه‌

شانم باری تۆ هه‌ڵنه‌گرێ بێ شانییه‌

بۆیه‌ شانم دایه‌ باری ئه‌م خولیایه‌

دنیا به‌بێ ئه‌وینی تۆ هیچی تیایه‌

*                    *                    *

له‌گه‌ڵ ته‌نافا قۆڵی تۆم بکرێته‌ مل

له‌ چاوی پیسی جه‌للادا ئه‌بم به‌ گڵ

عاشق نیه‌ له‌م دنیایه‌ بگات به‌من

دێوانه‌کان من ڕابه‌رم بۆ کوێ ئه‌چن

گری گری خڕ ببنه‌وه‌و ڕۆژی جه‌مه‌

ڕێی هه‌موومان بۆ لای یه‌که‌و به‌ره‌و شه‌مه‌[/size]

حسيب قه‌ره‌داغی

[size=16]وات ئه‌‌زانی به‌جێــــــــم بێڵی كه‌شتی ڕێگات له‌نگه‌ر ناگرێ
بڕوات نه‌كرد كه‌ زریانی گه‌ردونی خوا ڕێت پێ بگرێ
به‌سه‌رمندا شه‌پۆلت برد، هه‌ور ئاسا چوویته‌ ئاسمان
به‌ڵام ئێستاش به‌ لێزمه‌‌وه‌ دێیته‌ خوارێ وه‌كو باران
*                *                  *
خانم ئێستاش چرای ماڵم خامۆش بووه‌ به‌ده‌ستی تۆ
هه‌ستی شیعرم بێ هوده‌یه‌ له‌ یادێكی سه‌رمه‌ستی تۆ
خونچه‌م وه‌ری و دڵم شكا هێلانه‌شم لێ شێواوه‌
گه‌ڕانه‌وه‌ش دادت نادا، چون به‌فری عه‌شقم تواوه‌
*                 *                *
ئاوێنه‌ی دڵ وا شكاوه‌ وێنه‌ی تۆشی وون كردوه‌
تۆ بزانه‌ چ ده‌درێكت به‌م ئه‌وینه‌ی من بردووه‌
ئیتر بڕۆ بیر له‌ سایه‌ی داری عه‌شقم مه‌كه‌ره‌وه‌
ڕێژنه‌ی كۆچت بۆ كوێ دایكرد، هه‌ر بۆ ئه‌وی ببه‌ره‌وه‌[/size]

احمد محمد

[size=16]قه‌ت نه‌ده‌ی ئازاری گیانی مه‌ست و بێدارانی شه‌وه‌ (1)
خۆت نه‌خه‌یته‌ به‌ر شه‌پۆلی ئه‌شكی بێ پایانی شه‌و
ئه‌ی كچی خاوه‌نی جوانی و ئه‌ی چرای دیوانی شه‌و
(خۆت بپارێزه‌ له‌ ئاهی دڵبریندارانی شه‌و
نه‌ك خوا نه‌كه‌رده‌ گیرابێ دوعای ناڵانی شه‌و)
*               *               *
وێڵم و تاریكه‌ ده‌ورم، فه‌رشی ڕێگه‌م مه‌ینه‌ته‌
بێكه‌سم، ته‌نها ئه‌ناڵم، مه‌رگی خۆمم عه‌زره‌ته‌
سازی ئاهه‌نگی شه‌وانم، سۆزی جه‌رگی له‌ت له‌ته‌
( یاوه‌رو یاری ئه‌نیسم ئاهو ئه‌شكی حه‌سره‌ته‌
ئافه‌رین ئه‌ی باره‌كه‌ڵا، دیده‌یی گریانی شه‌و )
*                     *                *
وانه‌زانی ده‌ستی غه‌م یادت له‌ دڵدا ده‌رئه‌كا
ئه‌شكی خوینینم ده‌لیله‌ بۆ كه‌سێ باوه‌ڕ نه‌كا
گیانه‌كه‌م به‌و تیشكی چاوه‌ی شه‌ڕ له‌گه‌ڵ ئه‌خته‌ر ئه‌كا
( دڵ ئه‌بێته‌ قه‌تریه‌ خوێن و له‌ دیده‌م سه‌ر ئه‌كا
هه‌ر كه‌ ڕابورێ به‌سه‌رما سوحبه‌تی جارانی شه‌و )
*                *                 *
هاوده‌مێ فه‌رمووی: له‌به‌رچی كرده‌وه‌ت گریانه‌ هه‌ر؟
تافی لاوێتیته‌، لاوی، قه‌ڵبه‌زه‌ری سه‌یرانه‌ هه‌ر
من وتم سه‌یران و خۆشی پێشكه‌شی شادانه‌ هه‌ر
( ئه‌شكی حه‌سره‌ت لازمی جه‌معی سیابه‌ختانه‌ هه‌ر
شه‌ونمی سوبحه‌ ده‌لیلی قه‌تره‌یه‌ك گریانی شه‌و )
*                    *                *
هه‌وڵی زۆرم دا، له‌ داوی زوڵفی ئه‌و بێ مره‌وه‌ته‌
ده‌رچم و دوایی بهێنم به‌م عه‌زاب و مه‌ینه‌ته‌
پێی وتم: بێ سوده‌ هه‌ولت تاكو ماوی جێگه‌ته‌
( نوری له‌م پێچ و خه‌می زوڵفه‌ نه‌جاتت زه‌حمه‌ته‌
لای سه‌خی ته‌بعان مه‌حاڵه‌ روخسه‌تی میوانی شه‌و) [/size]

(1) ئه‌حمه‌د هه‌ردی: سێ دێڕه‌كه‌ی سه‌ره‌تای پێنج خشته‌كیه‌كان هی خۆمه‌، دوو دێڕی ناو كه‌وانه‌كه‌ هی (شێخ نوری شێخ صالح)ه‌

[size=16]ئه‌من ده‌مگوت له‌ دینا تا بمێنم
له‌به‌ر كه‌س ئه‌سته‌مه‌ سه‌ر دانه‌وێنم
كه‌چی ئێستا له‌داوی بسكی تۆدا
گرفتارم گوڵم موو ناپسێنم
*        *          *
ژیانم پڕ له‌ ڕه‌نجه‌ و نا مورادی
به‌ هه‌ڵكه‌وتیش نه‌هاتم توشی شادی
دڵم هێند ته‌نگه‌ هه‌ر جێ تۆ ئه‌بێ و به‌س
ئه‌تۆش مه‌حكومی حه‌پسی ئینفرادی
*         *             *
قه‌رار بوو بێی له‌گه‌ڵ خۆت شادی بێنی
نه‌هاتی گه‌رچی پێت دابووم به‌ڵێنی
له‌ناو كوردا نه‌بوو په‌یمان شكاندن
له‌ كوێ فێربووی گوڵم  په‌یمان بشكێنی
*           *              *
ئه‌گه‌رچی ڕۆیی قه‌ت ناچی له‌یادم
ده‌كه‌م یادت به‌ یادی تۆوه‌ شادم
كه‌ بارگه‌ت بۆ هه‌وار تێكنا عه‌زیزم
شكا ئه‌ستونده‌گی تاوڵی مورادم
*     *                *
شه‌وانه‌ هه‌منیشنی جانی باده‌م
به‌ باده‌ با په‌ژاره‌و غه‌م به‌ باده‌م
كه‌ ده‌ستی رۆژگار بایدا سه‌ری من
سه‌ری شوشه‌ی شه‌راب وا چاكه‌ باده‌م[/size]

مامۆستا هێمن