هەستەوەری لووت

هەستەوەری لووت Allergic Rhinitis بریتیە لە كاردانەوەی لووت بەرانبەر بە چەند مادەیەك لە هەوادا كە دەبنە هۆی دەردانی مادەی هیستامین، كە ئەویش دەبێتە هۆی پەیدابوونی هەوكردن و هاتنەخوارەوەی شلە لە لووت و گیرفانەكانی لووت(جیوب) و چاوەكاندا.هەستەوەری لووت لەوانەیە كە مەیلێكی خێزانی یان زگماكی هەبێت. هەستەوەری لووت دوو جۆری هەیە: هەستەوەری وەرزی Seasonal، كە لە وەرزی بەهاردا و لە تەمەنی كەمتر لە شەش ساڵدا روونادات، هەستەوەری ناوەرزی كە بە درێژایی ساڵ دەبینرێت و لە تەمەنی بچووكتر لە شەش ساڵدا سەرهەڵدەدات. ئەو مادانەی كە دەبنە هۆی ئەم جۆرە هەستەوەرییە بریتین لە هەڵاڵەی گوڵ، تۆز و خۆڵ، تووكی ئاژەڵ. نیشانەكانی هەستەوەری لووت زۆرن وەكو: پژمین، لووت گیران، هاتنەخوارەوەی شلە لە لووتدا، خورشت لە ناوپۆشی لووتدا، كڕانەوەی قوڕگ و گوێیەكان، خورانی چاوەكان، لووت پژان. ئەو منداڵانەی كە تووشی هەستەوەری لووت دەبن لەوانەیە كە نیشانەی دیكەشیان هەبێت لەمانە: پرخە، هەستكردن بە ماندووبوون و هیلاكی، هەناسە وەرگرتن بە دەم، دووبارەبوونەوەی هەوكردنەكانی گوێ. هەستەوەری لووت لە لایەن دكتۆری قوڕگ و لووت و گوێدا بە ئاسانی دەستنیشان و بە چەند دەرمانێكی دژی هەوكردن و دژی هەستەوەری و دڵۆپی تایبەتی لووتەوە چارەسەر دەكرێت.
gulan

چێشتخانە سەیرەكانی چین

لەگەڵ ئەوەی خەڵكی وڵاتی چین زۆرترین رێژەیان هەیە لە جیهان، ئەو ژمارە زۆرە دەبێ جێگە و شوێنی خۆیان هەبێ، بۆ نموونە : دەبێ هەر یەكە خانووێكی هەبێ، یان لە شوێنێكی تایبەتدا نان بخوات. بۆیە چێشتخانەكانی ئەو وڵاتە دەبێ گەورە بێ و ئەگینا جێگەی كەس نابێتەوە. ئەمەش نموونەی یەكێكە لە چێشتخانەكانی وڵاتی چین.

gulan

منداڵ و سەگ

وەك رێگەیەك لە پاریزگاری كردنی منداڵان لە رووداو و كارەساتەكان، هەروەها بۆ رێگەگرتن لە ونبوونی منداڵ لە شوێنە قەرەباڵغ و گشتییەكان، رێگەیەكی سەیر و تازە دۆزراوەتەوە بۆ ئەوەی منداڵەكان پارێزراو بن لە كاتی دەرچوون یان گەڕان و بازاڕكردن. ئەوەی سەیر هەمان رێزیان لە منداڵ ناوە وەكو چۆن لە سەگ دەگیرێ.

رێگەكە بریتییە لە دانانی گوریس یان پەتك، لە ملی منداڵەكان یان ئەو منداڵانەی لەگەڵ كەسەكان دەچن بۆ دەرەوە، یان لە شوێنێكی جەستەی منداڵەكە دەخسترێ، سەرەكەی دیكەی گوریسەكە یان پەتكەكە لە دەستی كەسوكاری منداڵەكان دەبێ، بەم جۆرە دەكرێ منداڵەكان لە ونبوون و كارەسات و رووداوەكان بپارێزرین و سەلامەت بن.
gulan

خورمای هیندی بۆ شەقەسەر

خورمای هیندی(تمر هندی) چەندین ترشی میوە لەخۆدەگرێت كەرێژەیات دەگاتە 20% لەمانە :ترشی سیتریك(لیموندوزی)، ترشی تارتاریك بۆیە شیرەی خورمای هیندی ترشترە لە سركە و شیرەی لیمۆترش. هەروەها شەكری فركتۆز(شەكری میوە) بە رێژەی 35%، هەروەها پۆتاسیۆم، بنێشت، پێكتین Pectin، ریشاڵی خۆراكی. خورمایی هیندی گەلێك مادەی دژەئۆكسان لەخۆدەگرێت وەكو لیمۆنین Limonin و جیرالیۆن كە رۆڵیان هەیە بۆ رێگرتن لە گەشەی خانە شێرپەنجەییەكانی مەمك. هەروەها خورمای هیندی مادەی گرنگی تری تێدایە كە دژی ئازار كاردەكەن و پلەی گەرمی لەش دادەبەزێنن لەكاتی تا بەوەی كە هانی كرداری ئارەقەكردن دەدەن.خورمای هیندی جگەر لە بەها خۆراكییەكەی، تامێكی ترشی هەیە بۆیە بۆ خۆشكردنی چێژی خۆراكیش سوودی لێ وەردەگیرێت. لە رۆژەكانی گرمی هاویندا، خورمای هیندی لەگەڵ ئاو و هەندێك شەكر تێكەڵ دەكرێت، خواردنەوەی ئەم شیرەیە سەرەڕای تێنوو شكاندن مرۆڤ دەپارێزێت لە خۆربردن و پلەی گەرمی بەرزی لەش دادەبەزێنێت. پێكهاتە گرنگەكانی خورمای هیندی دژی بەكتریا كاریگەریان هەیە، لەبەر ئەوە گیراوەی خورمای هیندی وەكو غەرغەرەی دەم بەكاردێت لە حاڵەتەكانی هەوكردنی لەوزەكان، جگە لەمە یارمەتی هەرسكردنی خۆراك دەدەن. خورمای هیندی یارمەتی فرمان و چالاكیی جگەر دەدات و دژی زەردوویی كاردەكات، هەروەها بۆ سووككردنی نیشانەكانی نەخۆشییەكانی بۆڕی هەناسە لەكۆكە و هەناسەتەنگی، یارمەتی گوچیلەكان دەدات بۆ دەردانی قوم و بەردی بچووك، دەمارەكان هێور دەكاتەوە و ئازاری شەقەسەر و جۆرەكانی دیكەی سەرئێشە سووك دەكات.
gulan

ئەمە سەگە یان خاولی!

ئەگەر سەیرێكی ئەو وێنەیە بكەن، رەنگە بڵێن هیچ شتێك دیار نییە تەنیا دوو خاولی بۆ سڕینەوەی جەستە، كەچی ئەگەر بە وردی سەیر بكەن دیمەنێكی سەیر و سەرەنجراكێش دەبینن. ئەوەی ژێرەوە راستە بریتییە لە خاولی، كەچی ئەوەی سەرەوە بریتییە لە سەگێكی سەیر.
شێوەی ئەو سەگە وەك پارچە قوماشێكی ئاڵاو وایە، ئەم جۆرە سەگە لە ویلایەتی كالیفۆرنیا هەیە، شێوەیان جەستەیان ئەوەندە خاوە، بە جۆرێك ئەگەر چاوەكانی دەرنەكەوێ، وەك خاولییەك وایە. ئەم جۆرە سەگە بە (بۆلدۆگ) ناسراوە و رەواجێكی گەورەی لەسەرە لە وڵاتانی رۆژئاوا و ئەوروپا، بەهۆی ئەو شێوە سەیرەی لە جەستەیاندا بەدی دەكرێت.

گولان