بابه‌ت: په‌یكه‌ری كه‌ر دروستكرا
هونه‌رمه‌ندی په‌یكه‌رساز (زیره‌ك میره) په‌یكه‌رێكی جیاواز له‌كاره‌كانی پێشووی دروستكردووه‌‌و ئه‌مرۆ په‌رده‌ی له‌سه‌ر لاده‌درێت.
هونه‌رمه‌ندی په‌یكه‌رساز (زیره‌ك میره) به NNA ڕاگه‌یاند، بیرۆكه‌ی دروستكردنی په‌یكه‌ره‌كه‌ی له‌یه‌كێك له‌هۆنراوه‌كانی حه‌زره‌تی (نالی) یه‌وه سه‌رچاوه ده‌گرێت‌و فه‌لسه‌فه‌یه‌كیش له‌پشت دروستكردنی ئه‌و په‌یكه‌ره‌وه‌یه، ئه‌ویش خۆڕاگری‌‌و نه‌پچڕانی په‌یوه‌ندی ئه‌و ئاژه‌ڵه‌وه‌یه به‌مرۆڤه‌وه.
زیره‌ك میره وتی:”شارستانیه‌تی ئێستای مرۆڤایه‌تی قه‌رزاری دوو ئاژه‌ڵه، ئه‌وانیش (كه‌ر) و (سه‌گ)ه یه‌كه‌میان به‌ماندووبونی له‌گه‌ڵ مرۆڤ‌و به‌جێگه‌یاندنی ئه‌ركه قورسه‌كان، دووه‌میشیان، به‌وه‌فادارێتی”.
په‌یكه‌ره‌كه‌ی زیره‌ك میره پێكدێت له‌پۆرترێتێكی گوێدرێژ كه به‌رزییه‌كه‌ی (180) سانتیمه‌تره‌‌و پانییه‌كه‌شی (110) سانتیمه‌تره، له‌سه‌ر ئه‌ركی خۆی دروستیكردوه‌‌و ناویشی لێناوه (په‌ی كه‌ر) به‌و واتایه‌ی هه‌ست به‌و ئاژه‌ڵه بكه.
