میسرییه‌كان و جه‌زائیرییه‌كان: شه‌ڕی گه‌یشتن به‌ مۆندیال هونه‌رمه‌ندانیشی گرتۆته‌وه‌

دوورگه‌- ئه‌و یارییه‌ی كه‌ له‌میانی پاڵاوتنه‌كانی كیشوه‌ری ئه‌فریقیا له‌نێوان هه‌ردوو هه‌ڵبژارده‌ی میسر و جه‌زائیر ماوه‌، یارییه‌كی یه‌كلاكه‌ره‌وه‌ ده‌بێت و دوای یارییه‌كه‌ش یه‌كێك له‌و دوو هه‌ڵبژارده‌یه‌ ده‌گاته‌ مۆندیالی 2010. ئیدی رۆژ به‌رۆژ شه‌ڕه‌ قسه‌ و كاریكاتێری جۆراوجۆر له‌نێوان هانده‌رانی هه‌ردوولادا توندوتیژی و تانه‌ و ته‌شه‌ری زیاتر به‌خۆوه‌ ده‌بینێت. ئه‌مجاره‌ش هانده‌رانی جه‌زائیر وێنه‌ی سه‌ری چه‌ندین خانمه‌ هونه‌رمه‌ندی میسریان له‌ جه‌سته‌ی یاریزانه‌ میسرییه‌كان دانا و جگه‌ له‌مه‌ش ئاڵای میسریان سووتاند. ئه‌مه‌ش بووه‌ هۆی تووڕه‌بوونی هونه‌رمه‌ندانی میسری. له‌مباره‌وه‌ خانمه‌ هونه‌رمه‌ندی به‌ناوبانگ (یوسرا) كه‌ سه‌ری ئه‌ویشیان بۆ گاڵته‌پێكردن له‌ جه‌سته‌ی یاریزانێكی میسری دابوو،رایگه‌یاند كه‌ (زۆر عه‌یبه‌ بۆ جه‌زائیرییه‌كان ئه‌م كاره‌ ده‌كه‌ن و سووتاندنی ئاڵای میسریش عه‌یبێكی گه‌وره‌تره‌). هه‌روه‌ها یوسرا گوتیشی: هانده‌رانی جه‌زائیر هه‌رچی بكه‌ن، میسر هه‌ر یارییه‌كه‌ ده‌باته‌وه‌ و ده‌گاته‌ كۆتاییه‌كانی جامی جیهانی 2010.شایانی باسه‌ ئه‌و خانمه‌ هونه‌رمه‌ندانه‌ی كه‌ وێنه‌كانیان شێوێنراوه‌ ئه‌مانه‌ن: یوسرا، له‌یلا عه‌له‌وی، فیفی عه‌بده‌، غاده‌ عادل، مونا شلبی، نه‌بیله‌ عوبێد، نادیه‌ جوندی، یاسه‌مین عه‌بدولعه‌زیز، دینا عه‌لی و چه‌ندانی دیكه‌ن.