شەكرە Diabetes نەخۆشییەكی درێژخایەنە، تووشبوو دەبێ تا لە ژیاندا ماوە پابەندی پارێز و دەرمان و زوو سەردانی دكتۆرەكەی بێت ئەگینا ئەگەری ئاڵۆزی تەندروستی زۆری پەیوەست بە كۆنترۆل نەكردنی نەخۆشی شەكرە دێنە پێشەوە كە مەترسی گەورە دەخەنە سەر ژیانی تووشبووان. ئەگەر نەخۆشی شەكرە بە باشی كۆنترۆل نەكرێت، لەوانەیە كە گرفتی گەورە بۆ چاوەكان پەیدابكات كە هەندێك جار دەبێتە هۆی كوێربوونێكی هەمیشەیی بێ ئەوەی كە هیچ نیشانەیەك لە چاوەكاندا دەركەوێت كە نەخۆش هەست بە مەترسییەكەی بكات بەر لە روودانی كوێرنوون. نەخۆشی شەكرە بە باوترین هۆكاری كوێربوون دادەنرێت لە پاش تەمەنی 35 ساڵیدا. ئەو گرفتانەی كە لەوانەیە لە ئەنجامی نەخۆشی شەكرەوە لە چاودا رووبدەن بریتین لە: تێكچوونی تۆڕەی چاو(ألشبكیە Retina) كە ئەو بەشە گرنگەی چاوە كە وێنەكانی دەكەونە سەر، دەزوولە خوێنەكان فراوان دەبن یان تووشی گیران دەبن، هەروەها لوولە خوێنهێنەرە بچووكەكانی تۆڕەی چاو دوچاری ئاوسان و لوولبوون و پێچخواردن دەبنەوە. زۆر جاریش خاڵی وردی خوێنبەربوون لەسەر تۆڕەی چاودا بەدی دەكرێت. لە كۆتاییدا، لەوانەیە كە تۆڕەی چاو لە شوێنی خۆیدا هەڵبكەنێت و جیابێتەوە كە دوا قۆناغە بەر لە روودانی كوێربوون كە لەوانەیە قابیلی گەڕانەوە نەبێت. هەروەها نەخۆشی شەكرە هۆكارێكی زەقە بۆ ئاوی سپی Cataract كە بریتییە لە ڵێڵبوونی هاوێنەی چاو. باشترین رێگا بۆ خۆپاراستن لەم ئاڵۆزییە و ئاڵۆزییەكانی تری پەیوەست بە نەخۆشی شەكرە بریتییە لە پابەندبوون بە پارێزی خۆراك، وەرگرتنی دەرمان بە شێوەیەكی رێك، سەردانی دكتۆر بە شێوەیەكی دەوری، رێگرتن لە زیادبوونی كێش و قەڵەوی، مەشقی بەدەنی و وەرزشكردن.
گولان[/size]
]]>