پرۆستات Prostate گلاندی زاوزێی پیاوه‌، به‌ قه‌د دانه‌ گوێزێكی بچووكه‌، كێشه‌كه‌ی ته‌نها 20 گرامه‌، ده‌وری ملی میزڵدان و بۆرِی میز ده‌گرێ، به‌شێكی ماسولكه‌ییه‌ و به‌شێكی گلانده‌، چه‌ندین جۆگه‌ی هه‌یه‌ ده‌چنه‌ ناو بۆرِی میزه‌وه‌ (ئه‌و به‌شه‌ی بۆرِی میز كه‌ كه‌وتۆته‌ ناو پرۆستاته‌وه‌). پرۆستات له‌ سێ پارچه‌ پێكهاتووه‌، یه‌كێك له‌ ناوه‌رِاست و دووانیش له‌ لای راست و چه‌پ . گلاندی پرۆستات شله‌یه‌كی تفت (ئه‌لكالی) ده‌رده‌دات كه‌ به‌شێكی تۆواو پێكدێنێ و سپێرمه‌كان هه‌ڵده‌گرێ. پرۆستات كه‌وتۆته‌ پێشه‌وه‌ و بنه‌وه‌ی میزڵدانه‌وه‌. فرمانه‌ سه‌ره‌كیه‌كانی پرۆستات بریتین له‌ : دروستكردنی شله‌ی تۆواو ، په‌مپكردن یان پاڵنانی تۆواو به‌ هێزێكی تایبه‌ت به‌ مه‌به‌ستی پیتاندنی هێلكۆكه‌ی ئافره‌ت . پرۆستات فرمان ده‌كات وه‌كو گلاند و ریشاڵه‌ی ماسولكه‌شی تێدایه‌ كه‌ گرژو خاوده‌بنه‌وه‌ .ئاوسانی پرۆستات BPH باوترین نه‌خۆشییه‌ كه‌ دوچاری پرۆستات ده‌بێته‌وه‌ و بریتییه‌ له‌ ئاوسانێكی پاكی ناشێرپه‌نجه‌یی كه‌ له‌گه‌ڵ كرداری نۆرمالی به‌ته‌مه‌نداچووندا رووده‌دات. نزیكه‌ی 50%ی پیاوان له‌ ته‌مه‌نی 60 ساڵیدا و 90%ی پیاوان له‌ ته‌مه‌نی 85 ساڵیدا دوچاری ئاوسانی پرۆستات ده‌بن . ته‌نگاوی زۆر بۆ میزكردن Urgency ،چه‌ندین جار پێویستی به‌ له‌خه‌و هه‌ڵسان بۆ میزكردن Nocturia ، هه‌ندێك جار خوێن له‌گه‌ڵ میزدا به‌ كه‌می به‌دی ده‌كرێت، لاوازبوونی لێشاوی میز، پێویستی به‌ فشار بۆ میزكردن، هه‌ندێك جاریش میزگیران. ئاوسانی پرۆستات به‌ ده‌رمان كۆنترۆل ده‌كرێت، به‌لاَم كه‌ ده‌بێته‌ هۆی میزگیران ئه‌و كاته‌ به‌ نه‌شته‌رگه‌ری لاده‌برێت. [/size]