خۆراك بەردەوام گرنگە بۆ لەش، بەڵام لەگەڵ نەخۆشییە درێژخایەنەكاندا دەبێ حیسابێكی تایبەتی بۆ بكرێت. ئەمە زانراوە كە لەكاتی تووشبوون بە سەرما و هەڵامەت خەڵك شیرەی پرتەقال یان سوپی مریشك دەخۆن، بەڵام ئایا تا چەند خۆراك دەتوانێت كە سوودی بۆ نەخۆشییە درێژخایەنەكان هەبێت؟ تووشبووان بە نەخۆشییە درێژخایەنەكان بەردەوام لە لایەن دكتۆرەكانیانەوە سەبارەت بە بڕ و جۆری خۆراكی رۆژانەیان ئامۆژگاری دەكرێن. دەتوانرێت كە لە رێگای خۆراكەوە بەرگری لەش بەهێز بكرێت و نەخۆشییە درێژخایەنەكان پتر لەژێر كۆنترۆلدا بن. سەرەتا دەبێ نەخۆش پەیڕەوی پارێزی خۆراكی خۆی بكات كە دكتۆرەكەی بۆی داناوە. با ژەمەكانی خواردنت رێك و بالانس بێت. ئەگەر نەخۆشییەكەت رێگر بوو، دەتوانیت كە چەند ژەمێكی بچووك و خۆراكی سووكی وەكو میوە یان ماست بخۆیت. با خۆراكت بە باشی كوڵاو و بە باشی ئامادە كرابێت، با بەردەوام سەوزە و میوەی جۆراوجۆر لە فریزەرەكەتدا هەبێت و لەكاتی پێویستدا بیخۆیت. دەبێ پێویستییە خۆراكییەكانت بزانیت و پەیڕەویان بكەیت، بۆ نموونە لەكاتی هێڵنج و سكچووندا بڕی زیاتری شلە و ئاوت پێویستە و دەبێت زیاتر خۆراكی شل بخۆیت. دووركەوە لەو خۆراكانەی كە وزەی زۆریان تێدایە و دەبنە ئەگەری زیادبوونی كێشی لەشت. لەگەڵ هەموو ئەمانەدا، گرنگییەكی زۆر و تایبەت بە پاك و خاوێنی و سەلامەتی خۆراكت بدە بۆ رێگرتن لە تووشبوون بەو نەخۆشییانەی كە بە خۆراكەوە تووشت دەبن، لەو كاتەی كە لەگەڵ نەخۆشییە درێژخایەنەكاندا بەرگری لەش دادەبەزێت. [/size]