ئافرەت لەكاتی دووگیانیدا پێویستی بە بڕی زیاتر دەبێت لە گەلێك مادەی خۆراكی لەو كاتەی كە جگە لە خۆی، كۆرپەش پێویستی بە مادەی خۆراكییەوە هەیە. كەمی لە هەر مادەیەكی خۆراكی دەبێتە ئەگەری گرفتی تەندروستی. بۆ نموونە زۆربەی ئافرەتان لەكاتی دووگیانیدا تووشی كەمخوێنی دەبن، رێژەی هیمۆگلۆبین لە خوێنیان دادەبەزێت لەبەر كەمی كانزای ئاسن. كانزای ئاسن لە بەروبوومی ئاژەڵی و رووەكیدا سەرچاوە دەگرێت، ڤیتامین C باشترین فاكتەرە كە یارمەتی هەڵمژینی كانزای ئاسن دەدات. ژەمێكی خۆراك كە 25 میللیگرام ڤیتامین C تێدابێت هەڵمژینی كانزای ئاسن بۆ دوو ئەوندە زیاتر دەكات. هەروەها كانزای كۆپەر Copper فاكتەرێكی گرنگی دێكەیە كە یارمەتی هەڵمژین و میتابۆلیزمی ئاسن دەدات. جگە لەمانە زۆر سەرچاوە ئاماژە بەوە دەكەن كە لەوانەیە ڤیتامین A بە شێوەیەك هاریكاری ئاسن لە لەشدا بكات. ڤیتامین C یان ترشی ئەسكۆربیك Ascorbic Acid جگە لەوەی كە یارمەتی هەڵمژینی كانزای ئاسن دەدات لە كۆئەندامی هەرسدا، مادەیەكی دژەئۆكسانی بەهێزە و بەرگری لەش بەهێز دەكات بەرانبەر بە هەوكردنەكان. مرۆڤی پێگەیشتوو رۆژانە نزیكەی 50-100 میللیگرام لەم ڤیتامینەی پێویستە، جگەرەكێشەكان پێویستییان بە بڕی زیاتری ئەم ڤیتامینەوە هەیە. ئەم سەرچاوە خۆراكییانەی كە بڕی باشیان لەم ڤیتامینە تێدایە بریتین لە: میوە مزرەكان وەكو لیمۆ و پرتەقال و لالەنگی، قەرنابیت، بیبەری سەوز، گەڵا سەوزەكان، تەماتە.كیوی.
[/size]