ترشی یوریك یان یوریك ئەسید Uric Acid ئەگەر لە خوێندا زیاد بكات لەوانەیە كە لە جومگەدا بنیشێت و دوچاری ئازارێكی توندو كتوپری بكات و جومگەكەش سووربێتەوە و بئاوسێت. زیاد خواردنی گۆشی سوور هۆكارێكی زەقی ئەم گرفتەیە، هەر بۆیەشە كە بەم جۆرەی هەوكردنی جومگە دەگوترێت دەردی بەگەكان(ألنقرس یان گاوت (Gout. ئازاری جومگە Arthralgia هۆكارێكی زەقی نارحەتییە چونكە ئێمە بەردەوام جومگە بۆ جووڵانەوە بەكاریان دێنین. لە نەخۆشی بەگەكاندا تووشبوو زۆر جار لەكاتی شەودا لەبەر ئازارێكی تیژی پەنجەیەكی گەورەی پێیەكان لە خەو رادەچەنێت و بە توندی سەخڵەتی دەكات. ئازاری جومگە لەوانەیە لە یەك جومگە یان پتردا رووبدات، بەڵام بە گشتی یەك جومگە دەگرێتەوە. زەبر و گەلێك حاڵەت و نەخۆشی تر دەبنە ئەگەری ئازاری جومگە، لەمانە: هەوكردنی رۆماتیزمی جومگەكان كە نەخۆشییەكی باوە بەتایبەتی لە ئافرەتاندا و جگە لە ئازار جومگەكان سخ دەبن و جوولانەوەیان سنووردار دەبێت، داڕووشانی جومگە یان سەوەفان كە زۆر باوە لە تەمەنی پاش 45 ساڵ و جگە لە ئازار دەبێتە هۆی پەیدابوونی نووكی ئێسك(ئێسكە زیاد Bone Spur) و تێكچوونی چینی كڕكڕاگەیی سەر ئێسكەكانی ناو جومگە. هۆكارەكانی تری ئازاری جومگە بریتین لە: زیادبەكارهێنان یان ماندووكردنی جومگەكان، زەبر و شكان، هەوكردنی جومگە بە میكرۆب كە دەبێتە هۆی ئازار و سووربوونەوە و ئاوسانی جومگە، هەوكردنی ژێیەكانی ماسوڵكەكان، ئەنفلوەنزا، سوورێژە و سوورێژەی ئەلمانی، تای رۆماتیزمی، مێكوتە، هەوكردنی ژێرەوەی سابوونەی ئەژنۆ، هەوكردنی ئێسك. بۆ چارەسەركردنی ئازاری جومگە لە نەخۆشی بەگەكاندا، دەرمانی تایبەتی دژەئازار و دەرمانی كەمكردنەوەی ئاستی یوریك ئەسید لە خوێندا بەكاردەهێنرێن لەگەڵ كەمكردنەوەی خواردنی گۆشتی سوور.

گولان[/size]