سترانبێژا گەنج ئەمان محەممەد، بەرنیاس ب (ئەمان نهێلی) گەلەكا پەشیمانە كو دبەرهەمێ خۆ یێ نوی دا، كو بەری دوو حەفتیا بەلاڤبووی، چ سترانێن سۆرانی نەكرینە تێدا و سۆزدا د بەرهەمێ بهێتدا چەند سترانەكێن سۆرانی ببێژیت .
ل دەڤەرا بەهدینان هێشتا ژ بەر تیتالێن جڤاكی و عەشایری، ستران گۆتنا ئافرەتێ ب شەرم دبینن، بەلێ ئەمانێ گوه نەدا وان و، وەكو ژنەكا ب جەرگ و بێ ترس چۆ سەردەپێ شانۆیێ و دەست ب ستران گوتنێ كر. دهەڤپەیڤینەكێدا دگەل (رووداو) ئەمانێ دبێژی " مالا وان گەلەك پشتەڤانیا وێ كر". ئێكەم كلیپا وێ ل سالا 2001 بناڤێ (من تو دڤیێ یا رازیمە) تۆماركر، ژبەر كێمییا سترانبێژێن ژن ل دهۆكێ، گەلەك ژ دەزگەهێن راگەهاندنێ یێن دەڤەرا بەهدینان شەڤانە ئەف كلیپە لێددا د پروگرامێن هونەریدا ئەمان دهاتە مێهاڤانكرن.
ئەمان دبینیت كو پەیمانەگەها هونەرێن جوان لاندكا هونەرمەندایە، لەورا پەیمانگەه هەلبژارت و دبێژی"من دڤیا بشێوەیەكێ ئەكادیمی دەست ب هونەری و سترانا بكەم، لەورا چۆمە پەیمانگەها هونەرێن جوان".
ئەمان ژدایكبوویا 1985ە و سێ سالە پەیمانگەها هونەرێن جوان ل دهۆكێ ب داوی ئینای و نووكە ئاكنجیا ناحیا دێرەلوكێ یە كو سەرب دەڤەرا ئامێدیێ یە. چار هەیڤە شوی كریە. پشتی شووكرنا وێ وەسا بەلاڤبوو كو دێ ئەمان سترانا هێلیت، بەلێ ئەو دبێژی "شویكرنێ چ كارتێكرن ل هونەرێ من نەكریە، بەلكو بۆ من بوویە پالنەرەك كو ئەز پتر یا رژدبم لسەر كارێن هونەری". ئەو زەلامێ ئەمانێ شوی پێكری نە هونەرمەندە، لێ وەك ئەو دبێژی "ئەو هونەردۆستە و گەلەك حەز ژهونەری دكەت".
دپرانیا ئەو سترانێت ئەمان دبێژیت ب رۆلێ ئافرەت رادبیت و ب كوڕان ڤە دبێژیت "ئەز بخۆ كچم، نە یا جانە ئەز وەك كچ ب كچێ ڤە بێژم".
هەتا نووكە وەكو كلیپ ئەمانێ گەلەك كلیپ بەلاڤكرینە، بەلێ ئەو دبینیت ب سترانا (شارێ دلا) كو ب دووقۆلی دگەل هونەرمەند محەممەد تەها ئاكرەیی گۆتی و كلیپ كری، گەلەك بەرنیاس بوو.
ئەمان كێمیا هونەرمەندێن كچ ل دەڤەرا بەهدینان بۆ رێگریا مالێن وان دزڤرینیت و دبێژی"گەلەك كچ دەنگێ وان گەلەكێ خۆشە و پەیوەندی بمن كرنە و دبێژن ئەم گەلەك حەزدكەین ببینە هونەرمەند، بەلێ مالێن مە رێكێ نادەنە، ئەف چەندە بوویە كولەك ددلێ وان دا".
بۆ كارێن هونەری و چۆنا وێ بۆ هەولێر و سلێمانیێ و پشكداریكرن د پرۆگرامێن هونەری دا هەتا نوكە ئەمانێ چ ئاریشە نەدیتینە و دبێژی"سوپاس بۆ خودێ هەتا نووكە سەرا هونەری چ ئاریشە بۆ من دروست نەبووینە و هەر جهێ من ڤیای ئەزا چویمێ".
ئەمانێ گەلەك سوپاسیا كەسوكارو مالباتا خۆكر "ئەگەر مالباتا من هاریكاریا من نەكربا نووكە ئەز نەدبوومە هونەرمەند".
ئەلبووما نوو یا ئەمانێ بناڤێ (پەری ناسم) بریتییە ژ 9 سترانان "بۆ ئاواز و هۆزانا گەلەك هونەرمەندا هاریكاریا من كریە ژ واناژی عەبدولقەهار زاخۆیی، محەممەد تەها ئاكرەیی، شەعبان سلێمان، ئیبراهیم رەشاڤەیی و سلێمان هەركی". هەروەها ڤین پرۆدێكشن و سلێمان ئورەی و شڤان رێكانی هاریكارییا داراییا ئەلبووما ئەمانێ كریە.
ل دۆر كلیپكرنا سترانێن بەرهەمێ خۆ، ئەمان پیچەك رادوەستی و ب مخابنی ڤە گۆت "بەری نووكە سترانا فۆلكلۆری(بێ فرە فرا ڤان چیجكا) ب شێوەیەكێ گەلەكێ جوان كلیپ كربوو، چار كچ و كوڕان پشكداری تێدا كربوو، پشتی كلیپ ب دوماهی هاتی، مالا كچەكێ پەشیمان بوون و گوتە وێ كچێ ئەگەر ئەو كلیپ بەلاڤ ببیت، دێ تە كوژین". ژ بەر هندێ ژی بەلاڤنەكر.
بەلێ ئەو دێ ل ڤان نزیكان سترانا (ئەز كچم كچا كوردانم) كلیپ كەت و دەتە هەمی دەزگەهێن راگەهاندنێ.