به‌ پێی راپۆڕتی تایبه‌تی به‌شی هونه‌ریی ئاژانسی هه‌واڵی په‌یامنێر، سینه‌ماكاری ناوداری كورد به‌همه‌ن قوبادی به‌ فیلمی سینه‌مایی "كسی از گربه‌های ایرانی خبر نداره‌" واته‌ "كه‌س له‌ پشیله‌ ئێرانییه‌كان خه‌به‌ری نییه‌" No One Knows About Persian Cats، توانی خه‌ڵاتی گه‌وره‌ و تایبه‌تی به‌شی پێشبڕكێی 16مین خولی فیستیڤاڵی نێونه‌ته‌وه‌یی فیلمی "ره‌بات" Rabat له‌ شاری ره‌بات له‌ وڵاتی مه‌غریب به‌ده‌ستبێنێت.

فیلمی سینه‌مایی "كه‌س له‌ پشیله‌ ئێرانییه‌كان خه‌به‌ری نییه‌" له‌ به‌شی پێشبڕكێی نێونه‌ته‌وه‌یی 16مین خولی فیستیڤاڵی نێونه‌ته‌وه‌یی فیلمی "ره‌به‌ت" له‌گه‌ڵ 9 فیلمی سینه‌مایی له‌ وڵاتانی ئیرله‌ندا، مه‌غریب، ئیسپانیا، فه‌ره‌نسا، یۆنان، ئه‌ڵمانیا، توركیا، ئیتاڵیا و عێراق، بۆ وه‌رگرتنی ئه‌م خه‌ڵاته‌ گرینگه‌ له‌ ركابه‌ریدا بوو.

16مین خولی فیستیڤاڵی نێونه‌ته‌وه‌یی فیلمی "ره‌بات" رۆژی 20ی حوزه‌یران ده‌ستی به‌ كاره‌كانی خۆی كرد و شه‌وی دوێنێ شه‌ممه‌ 26ی حوزه‌یران له‌ ڕێوره‌سمی كۆتاییدا براوه‌كانی فیستیڤاڵ له‌ به‌شه‌ جۆراجۆره‌كانی "نێونه‌ته‌وه‌یی"، "عه‌ره‌بی"، "دیكۆمێنتی"، "تایبه‌ت"، "كورته‌ فیلم" و چه‌ندین به‌شی دیكه‌ ده‌ستنیشان كران.

فیلمی سینه‌مایی "كه‌س له‌ پشیله‌ ئێرانییه‌كان خه‌به‌ری نییه‌" تا ئێستا له‌ سینه‌ماكانی زیاتر له‌ 40 وڵاتی دنیا به‌ شێوه‌ی گشتی نمایش كراوه‌ و له‌ داهاتوویه‌كی نزیكدا و هه‌روه‌ها تا كۆتایی ئه‌مساڵ له‌ ژماره‌یه‌كی زۆر له‌ وڵاتانی جیهان نمایش ده‌كرێت.

Peyamner