ب ئاماده‌بوونا په‌یامنێرێ ئاژانسا (په‌یامنێر) د دادگه‌ها تاوانێن دهوكێ ڤه‌، دادگه‌ه ب دوو كه‌سان هاته‌ كرن،كو دتومه‌تباربوون ب دزینا كه‌سه‌كى ب ناڤێ پاراستنێ.

ده‌ستپێكا دادگه‌هێ دادوه‌رى بۆ تومه‌تباران گۆت :هوون دتومه‌تبارن ب دزینا كه‌سه‌كى ل مێژوویا 9- 2 -2009 ێ ل باژێرێ دهوكێ.

بابێ وى كه‌سێ هاتیه‌ دزین كو ناڤێ وى (ع،ب) بوو، وه‌كو داواكارێ كێشێ هاته‌ به‌رامبه‌رى دادوه‌رى و گوت :رۆژا روودانێ هه‌ڤاله‌كێ كورێ من گوته‌ من 3 كه‌سان ب ناڤێ پاراستنێ كورێ ته‌ (خ) یێ برى، و من ژى ئێكسه‌ر قه‌ستا پاراستنێ كر داكو بابه‌تى بزانم و كانێ بوچى پاراستنێ كورێ من گرتیه‌ و بریه‌ و ده‌مێ گه‌هشتیم وێرێ، پاراستنێ گوته‌ من مه‌ كورێ ته‌ نه‌بریه‌ و مه‌ هه‌ر ئاگه‌ه ژ ڤى بابه‌تى و وێ گرتنێ نینه‌ و د وان ده‌لیڤان ئانكو هێشتا ئه‌ز یێ ل پاراستنا دهوكێ كورێ من تێه‌فونا من كر و گوت : ئه‌ز یێ ل فلان جهى و هه‌وارا من وه‌ره‌ و ئه‌ز پاراستن پێكڤه‌ چووینه‌ وێرێ، مه‌ دیت تومه‌تباران (د،م) و (ن،و) ئانكو ئه‌ف تومه‌تبارێن نوكه‌ دقه‌فه‌سێ دا و كورێ من ل وى جهى بوون و وه‌سا ئه‌ف هه‌ردوو زه‌لامه‌ پێ تومه‌تباربوون و ژلایێ پاراستنێ ڤه‌ هاتنه‌ گرتن.

ئه‌و كه‌سێ هاتیه‌ دزین ئانكو (خ،ع) هاته‌ به‌رامبه‌رى دادوه‌رى و گۆت :دوو مه‌هان به‌رى روودانێ من كوژمێ 2500 دولار ل ئێك ژ ڤان تومه‌تباران بوون و روژه‌ك بۆ من ده‌ستنیشاكربوو كو وى كوژمه‌ى بده‌ته‌ من و پشتى رۆژا ده‌ستنیشانكرى بورى و نه‌داى تومه‌تبارى پێشڤه‌ رستكه‌كا زێرى پێشكێشى من كر وه‌كو ره‌هینه‌ هه‌تا بده‌ت لێ پشتى ماوه‌یه‌كێ دیتر من هند دیت رۆژه‌كێ ئه‌ف هه‌ردو تومه‌تباره‌ هاتنوو و ب چه‌كبوون و بناڤێ پاراستنێ ئه‌ز برم و قوتام.

دیده‌ڤانه‌ك ژى هاته‌ به‌رامبه‌رى دادوه‌رى و گۆت : پشتى ئه‌و كه‌سێ هاتیه‌ دزین زانى كو تومه‌تبار كوژمێ دراڤێ وى نائینن رابوو ب فروتنا وێ رستكا زێرى ئه‌وا ره‌هینه‌.

پشتى هه‌ر دوو تومه‌تبار (د،م) و (ن،و) ژ قه‌فه‌سا تومه‌تباران هاتینه‌ ده‌ر و جودا جودا ل به‌رامبه‌رى دادوه‌رى راوه‌ستیاین گوتن :مه‌ ئاگه‌ه ژ ڤان تومه‌تان نینه‌ و بناڤێ پاراستنێ مه‌ چ كریار نه‌كرینه‌ و ئه‌م ئیفادێن وان ره‌تكه‌ین و ئه‌م دبێ گونه‌هین.

داواكارێ گشتى یێ دادگه‌هێ پشتى گوهدارییا ئیفادێن وان كرى و دووفچوونا به‌لگه‌یان كرى و لیستا خۆ یا تاوانان به‌رهه‌ڤكر د دادگه‌هێ ڤه‌ خواند تێدا اخاز ژ دادگه‌هێ كر كو هه‌ر دوو تومه‌تبار بهێنه‌ ئازادكرن و پاشى لیستا خۆ دا ده‌ستێ سه‌روكێ دادگه‌هێ.

دووف دا پارێزه‌رێ تومه‌تباران ژى كو ناڤێ وى (ئ،گ) برێكا لیستا خۆ ژ هه‌مى دلێ خۆ به‌ره‌ڤانى ژ بریكارده‌رێن خۆ كر و داخاز ژ دادگه‌هێ كر كو بریكارده‌رێن وى بهێنه‌ ئازادكرن ژبه‌ركو ئیفاد و به‌لگێن ب دژى وان د لاوازن.

ل دوماهیێ ژبه‌ر نه‌بوونا چ به‌لگێن راست و درووست و روهن ل سه‌ر تومه‌تباران دادگه‌هێ بریاردا هه‌ردوو تومه‌تبار بهێنه‌ ئازادكرن.

       
  Peyamner