مامۆستا سدیقی گچكه مامۆستای وهرزشی سهڵاحهددین سیامهند، سیروان مهحهمهد (كاپتنی یانهی بروسك)، بژار ئهكرهم (یاریزانی یانهی ههولێر و بروسك)، غهفوری گۆلچی یانهی بروسكیش لهم قوتابخانهیهی خوێندووه، جگه لهوانهش خۆشم یهكێكم لهوان، كه بچووك بووم له هێڵی بهرگری یارم دهكرد، بهڵام مامۆستا سدیق توانی بهم ئهزمونه گهورهیهی خۆی من بۆ گۆلچییهتی ههڵبژێرێ. . بۆ ئهم مهبهستهش سهركهوتی بهدهست هێنا، سوپاس بۆ خوا هێشتا نهمردبوو سهڵاح و منی بینی كه بووینه یاریزانی ههڵبژاردهی عێڕاق و پێمان نایه به نێودهوڵهتی بوون.
- خولی قوتابخانهكان بۆ تۆپی پێ، كه جاران بهشێوهیهكی زۆر ڕێكوپێك ئهنجام دهدرا نزیك ببویهوه، مامۆستا سدیقی گچكهش تیپێكی ئاماده كردبوو بۆ خولهكه، سروشتی منیش وهك قوتابییهكانی تر سهیری تیپهكهم دهكرد له قوتابخانهی هێمن ئهویش لهبهر ئهوهی وهكو بهرگری كارێك له تاقی كردنهوهكان دهرنهچووم، چونكه ئهوسا یاریزانی هێڵی بهرگری بووم.
جا یاریگای قوتابخانهكه له چیمهنتۆ دروست كرابوو، گۆلچی ههردوولاش زۆر به ترسهوه له گۆڵ وهستابوون و نهیاندهتوانی خۆیان بۆ تۆپه ئاڕاسته كراوهكان ههڵدهن. ئیدی چهند جارێ ئهم شته دووباره بوویهوه، بۆیه به خۆم و شهرواڵ و كراسی سپییهوه له مامۆستا چوومه پێش و گوتم دهمهوێ ببمه گۆڵچی. . ئهویش بهدهست ئاماژهی بۆ كردم كه بچمه دواوه، واته ناڕازی بوو بهوهی كه داواكهم پهسهند بكات.
چهند ڕۆژێك تێپهڕی و خولهكه نزیكتر بوویهوه، منیش له ناوهخۆمدا ههڵچووبوم له تاوی ترسی گۆلچییهكان كه بۆ ههموو شوتێك نهدهوێران بهرپهرچی تۆپهكه بدهنهوه، ئهوه بوو دوای خهیاندن مامۆستا تیپهكهی كرده دوو بهش بۆ ئهوهی لێدانی سزا جێ بهجێ بكهن، بینیم ههمان ترسی گۆلچییهكان دووباره دهبوویهوه، ئهمجاره خۆم بۆ نهگیراو گوتم مامۆستا دهمهوێ ببمه گۆلچی، تخوا ڕێم بده، ئیدی ههر به جلی قوتابخانه له گۆڵ وهستام و زۆربهی لێدانهكانی سزام گهڕاندهوه، بهم شێوهیه سهرنجی مامۆستام بۆ لای خۆم ڕاكێشا كه ئیدی گرنگیم پێ بدا.
دوای ئهوه مامۆستا بانگی كردم و له ماوهی ئهم چهند ڕۆژهی كه مابوو، مهشقێكی تایبهتی پێدام، یهكهم پرسیاری ئهوه بوو: دایك و باوكت باڵایان چۆنه؟ منیش تهنیا وهڵامی ئهوهم دایهوه كه باڵا دایكم بهرزه، ئهمما باوكم نازانم، ئهویش لهبهر ئهوهی باوكی خۆمم نهدیبوو، ههر مناڵ بووم كه له شهڕی عێڕاق و ئێران باوكم بهدیل گیرا، جا كه چوومهوه دایكم گوتی باوكت باڵای لهمن بهرزتره، منیش مامۆستام ئاگادار كردهوه له وهڵامی دایكم.
مامۆستا گرنگییهكی تهواوی پێدهدام و ههمیشه دهیگوت: تۆ زۆربهی تایبهتمهندییهكانی گۆلچییهتیت تێدایه، لهسهروی ههمووشیانهوه چاونهترسیت، كه ئهمه دواڕۆژی گۆلچییهتیت گهش دهكات، ههر واش دهرچوو، بهڵام تهنیا ترسی مامۆستا ئهوه بوو كه دهیگوت: ترسی ئهوهم ههیه وهك و دایك و باوكت باڵا بهرز نهبێت.
خولی قوتابخانهكان دهستی پێكرد و یهكهم یاریمان لهگهڵ قوتابخانهی ناڵی بوو، من یهدهگ بووم، كاك هێمنی گۆلچی سهرهكیش كه ئێستا پاسهوانی یهكێك له ڕێكخراوهكانی شاره، توشی پێكان هات، من چوومه جێگای ئهو، ئهو یارییه خاڵی دهستپێكردنی من بوو، تا یاری كۆتایی نهوهستاین. لهوێوه تیپه میللییهكان و پاشان سهرنجی ڕاهێنهرانی یانهیی پێشكهوتن و یانهی ههولێرم بۆخۆم پلكێش كرد.
مامۆستا ههمیشه پێشبینییهكانی ڕاست بوون، جارێكیان بهر لهیاریمان لهگهڵ قوتابخانهی مستهوفی له ئهگهری ڕوودانی ڕووداوێك چهندین جار ئاگاداری كردمهوه، سبحان الله كه یارییهكه دهستی پێكرد له گێمی دووهم توشی ئهو ههڵهیه بووم كه مامۆستا لێی دهترسا، چونكه ئهوخوێندنهوهیهكی باشی بۆ هێرشبهرهكه ههبوو كه ڕووبهڕوم بوویهوه، پێشتر یاری ئهوی بینی بوو.
لهبیرمه جارێكیان لهبهر كهمی مامۆستا، وتنهوهی وانهی جوغرافیا بهر مامۆستا سدیق كهوت، لهبهر خۆشهویستی ههره گهورهی قوتابیان بۆ مامۆستا دهرهجهی قوتابیان لهم وانهیه بهرهو سهروی ههشتا بهرز بوویهوه، دهشێ ئهوه بڵێم كه مامهلهی مامۆستا لهگهڵ قوتابییهكان بهشێوهیهكی جیاواز بوو، ئهوه بۆیه قوتابی ئاماده بوو شهو و ڕۆژ بخوێنێ تا دڵی مامۆستا بهدهست بێنێ و به ئهنامی تاقی كردنهوهكانی دڵخۆشی بكات لای بهڕێوبهری قوتابخانهكه.
كه زانیم مامۆستا توشی نهخۆشییهكی كوشنده بووه لهگهڵ سامان بریفكانی خۆم گهیانده ماڵیان لهوێ له باوهشم گرت و له خهیاڵمدا شریتی تهمهن گهڕایهوه سهردهمی مناڵێم، زۆر بیرهوهی كۆنی قوتابخانهم هاتهوه یاد، ئهزییهتییهكانی مامۆستام دههاتهوه بهرچاو كه چۆن بهئیرادهوه له ههوڵی پێگهیاندنی یاریزان بوو، ئهو مامۆستایهكی سروشتی نهبوو، ئێستاش نهگهیشتوومهته وهڵامی ئهو پرسیارانهی كه بۆچی مامۆستا لهگهڵ ئهوانیتر جیاوازه؟ بۆچی قوتابییهكانی كه گهورهش دهبن و قوتابخانه جێ دههێڵن ههر دێنهوهی قوتابخانهكه و سهردانی دهكهنهوه؟ بۆچی سهڵاحهددین كه له ههڵبژاردهی عێڕاق دهگهڕایهوه یهكهم شوێنی لای مامۆستا بوو، لهناو بارهگای ڕۆژنامهی خهبات یان له قوتابخانه؟ بۆچی سیروان مهحهمهد بهر له مردنی ههمیشه پرس و ڕای بهو بوو؟ ئهمهو چهندین پرسیاری تر ههمیشه له خهیاڵم خول دهخۆنهوه. . جا ههموو ئهو بیركردنهوانه زادهی چهند چركهكی باوهشدانم بوو به مامۆستا، دوای دانیشتنێكی زۆر ههستم كرد بهتهنیا بێت باشتره، ئهوهبوو ماڵهكهیم جێهێشت. جا دوێ شهو لهلایهن یهكێ له قوتابییه كۆنهكانی مۆستا له مردنی ئاگادار كرامهوه. . دڵ تهزێن بوو كه بهر له مردنی لهوێ نهبووم، ئاخر ئهو لهگهڵ مامۆستا نازهنینی وانهی ئینگلیزی وهك دایك و باوكم وا بوون، بهدرێژایی حهوت ساڵی خوێندن له قوتابخانه سهرهتاییهكه نهیانهێشت ههست به بێ باوكی بكهم* و ههمیشه سهرچاوهی خۆشییهكانی من بوون لهم حهوت ساڵهدا.
لێرهوه پرسهو سهرهخۆشی خۆم ئاڕاستهی بنهماڵهی مامۆستام دهكهم، له خوا دهپاڕێمهوه كه سهبووری من و ئهوان بداتهوه. میوانی دنیاین، ههموو دهمرین، بهڵام بهشێوهیهك مهگهر به ئاستهم ههستی پێبكرێ.
(بۆ مامۆستام "سدیقی گچكه")
له كهناری ئابوونی تهمهن
هاتی و دهست گرتم بهرهو هیوا،
نـهتهێشت باری گرانی خهمی كۆڵم
توانا و حهزهكانم بخوا
فریادڕهسی من تۆ بـووی،
وهلێ دیاری میهرهبانیش بووی
مامۆستا و باوك و هاوڕێی بووی،
بۆ تاریكمان چرایش بووی
خۆ بهر لهو كۆچهت بڕیارم بوو،
وهك جاران بێمه پرس و ڕات
كهم تهرخهم بوو، نهمزانی
ڕۆژهكانی تهمهن وا زوو دهڕوات
ئاخ چ دهردێكی گرانه
وا لههیكڕا ئازیزانت نهبینیهوه
ئێستا وهك سهفینهیهكی بێ كاپتنم،
وشكانی نابینمهوه
دارێكی ئاو لێ بڕاوم
بهسهرچاوهی ژین ناگهمهوه
ژانی لهدهست دانی تۆیه،
خهمهكان وا ئهمخۆنهوه
بهڵام بهتهك كۆچی دوایت
شادومانیم لێ دهتكێ!
چونكه ئهزانم دهروون پاكهكان
لهو دیو دنیا ڕوو دهكهنه كوێ
ئارام بنوو مامۆستا گیان،
گۆڕهكهت تاریكی تێدا ئهنخنكێ
باغیكی جهننهتی خودایه ئێستات
لهوێش كوا ههناسه بڕكێ!
لێرهش بۆ ڕێزلێنانت قوتابی و
دۆستهكانت
كهوتونهته پێشبڕكێ
پێم ناڵێن ئهم شهڕهفه له دنیای
ههڵخهرهتێن
دهكهوته دهست كێ؟!
سهرههنگ موحسین.
_________________________________
[size=10]* قوتابخانهی سهرهتایی 6 ساڵه، من لهبهر ئهوهی له پۆلی پێنجی سهرهتایی ساڵێك كهوتم بۆیه 7 ساڵ خوێندنم نووسیوه.[/size]
]]>
