ئەم یارییە بۆ هەردوو یانە گرینگە، چونكە لە ریزبەندی یانەكاندا هەردوو یانە كێبركێیەكی بەهێزی یەكتر دەكەن، یانەى هەولێر بەكۆكردنەوەى 44 خاڵ لە پێشەنگی ریزبەندی دێ، هەروەها یانەى سناعەش بە 42 خاڵ لە ڕیزبەندی دووەم دێ، بۆیە بردنەوەى ئەم یارییە، وەرگرتنی پێشەنگی ریزبەندیی خولی نایابی عێراقە.

عومەر مەجید یاریدەرى راهێنەرى یانەى هەولێر بەئاژانسی كوردستان بۆ دەنگوباس (ئاكانیوز)ى راگەیاند، یارییەكەى ئەمرۆمان گرینگە و بەوەرگرتنی سێ خاڵی یارییەكە پێگەى خۆمان لە پێشەنگی ریزبەندی قایمتر دەكەین، بۆ ئەوەی بتوانین ئەمساڵ نازناوى خولی نایابی عێراق بۆ جارى چوارەم بگەڕێنینەوە پایتەختی هەرێمی كوردستان .

مەجید گوتی، راهێنان و ئامادەكاریی و بارى دەروونی یاریزانەكانمان باش و جێگیرە، بەتایبەت دواى ئەو سەركەوتنەى لە قۆناخی 16 جامى یەكەتیی یانەكانى ئاسیا بەدەستمان هێنا، ئاماژەی بەوەش دا تەنیا شوان مامۆ بەهۆى ئەنگاوتنەوە ناتوانێ بەشداری لەو یارییە بكات.