هەولێر 28 تەمووز/یۆلیۆ (ئاكانیوز) ـ ئێوارەی ئەمڕۆ پێنجشەم هەڵبژاردەی تۆپی پێی عێراق لە یاریی گەڕانەوەی پاڵاوتنەكانی مۆندیالی 2014ی بەرازیلدا، لە وڵاتی ئیمارات رووبەڕووی هەڵبژاردەی یەمەن دەبێتەوە.
یارییەكە سەعات 20:00 بەكاتی هەولێر لە شاری عەینی ئیماراتی ئەنجام دەدرێت، كە بە یاریگەی یەمەن هەژمار دەكرێ.
ڕۆژی 23ی ئەم مانگە هەڵبژاردەی عێراق لە یاریگەی فرەنسۆ هەریری لە شاری هەولێر لە یاریی چووندا بە ئەنجامی 2-0 گۆڵ لە هەڵبژاردەی یەمەنی بردەوە، گۆڵەكانی عێراق هاوار مەلا محەمەد و عەلا عەبدولزەهرە تۆماریان كرد.
دووشەمی رابردوو هەڵبژاردەی عێراق لە رێگەی باڵەفڕگەی نێودەوڵەتیی هەولێرەوە بەرەو شاری عەینی ئیماراتی بەڕێ كەوت و لەوێشدا كەمپێكی داخرای مەشق كورتی ئەنجام دا بۆ خۆئامادەكردن بۆ یارییەكە.
لەلایەكی ترەوە عەبدولخالق مەسعوود جێگری یەكەمی سەرۆكی یەكەتیی تۆپی پێی عێراق دوێنێ چوارشەم بە ئاژانسی كوردستان بۆ دەنگوباس (ئاكانیوز)ی راگەیاندبوو، چەند رۆژێكە لەگەڵ زیكۆی راهێنەری بەرازیلی لە گفتوگۆداین بۆ ئەوەی رازیی بكەین ئەریكی مەشقی هەڵبژاردەی عێراق لە تۆپی پێ لە ئەستۆ بگرێ.
ئێستە ئەركی مەشقی هەڵبژاردەی تۆپی پێی عێراق لە ئەستۆی وۆڵف كانگ سیدكای ئەڵمانیایییە و لەگەڵ ئەوەی وادەی گرێبەستەكەی تەواو بووە، بەڵام لە ئەركەكەی خۆی بەردەوامە.