ئالوودە ببوو بە كڕین‌و فرۆشتن‌و بەكارهێنانی ماددە هۆشبه‌رەكان، سەرەنجام دووچاری زیندان بوو، دادگا بە تۆمەتی بەكارهێنان‌و مامەڵەكردن بە ماددە هۆشبه‌رەكانەوە، فەرمانی زیندانی هەتا هەتایی بە سەردا دا!
ئەمە چیرۆكی گەنجێكی تازە پێگەیشتوو نییە، بەڵكو باسی كەسێكە كە تەمەنی لە نێوان 50-60 ساڵیدایە، خاوەنی ماڵ‌و منداڵەو ئەزموونێكی لە ژیاندا هەیە، بە هەرحاڵ زۆر بە سەر ئەم ڕووداوەدا تێنەپەڕی، كوڕی یەكەمی بە هەمان تۆمەت خرایە زیندان، ئەویش دادگا بە وێنەی باوكی فەرمانی هەتا هەتایی بەسەردا دا!
بەڵام كوڕی دووەمی بە پێچەوانەی باوكی‌و برا گەورەكەیەوە، قۆناغەكانی خوێندنی بە سەركەوتوویی تەواو كردو بوو بە بەڕێوەبەری یەكێك لە كۆمپانیا بە ناوبانگەكانی شارەكەی!
توێژەرێكی كۆمەڵایەتی ویستی توێژینەوەیەك لەسەر ژیانی ئەم خێزانە ئەنجام بدات، سەرەتا چووە لای كوڕی یەكەم كە بە هەمان تۆمەتی باوكی خرابوویە سووچی زیندان، لێی پرسی: هۆكاری گەیشتنت بە زیندان چی بوو؟
چاوەڕوان دەكەیت چ وەڵامێك بداتەوە؟!
زۆر بە ئاسایی وتی: لە كاتێكدا باوكم بە تۆمەتی مامەڵەكردن‌و بەكارهێنانی ماددە هۆشبه‌رەكان فەرمانی هەتاهەتایی لە زینداندا هەیە، ئیدی چ چاوەڕوانییەك لە من دەكرێت؟!
پاشان توێژەرەكە ڕۆیشت بۆ لای كوڕی دووەمی ئەو پیاوەو لێی پرسی: چۆن توانیت ببیتە بەڕێوەبەری یەكێك لە كۆمپانیا بە ناوبانگەكانی ئەم شارە؟
لە وەڵامدا گوتی: باوكم ئالوودەی ماددە هۆشبه‌رەكان بوو، ئێستاش بەو تۆمەتە فەرمانی زیندانی هەتا هەتایی هەیە، ئیدی چ چاوەڕوانییەك لە من دەكرێت؟!
ئێستا با پێكەوە بیربكەینەوە، بە وردی سەرنج لەم دوو وەڵامە بدەین، هەمان وەڵام، هەمان ڕووداو، دوو كوڕی یەك خێزان، یەكەمیانی گەیاند بە هەمان شوێنی باوكی‌و دووەمیانی كردە بەڕێوەبەری كۆمپانیایەك!
دەزانم هەموومان دەپرسین چۆن؟ وەڵامەكەی زۆر ئاسانە، كوڕی یەكەم وا بیری كردۆتەوە كە گیا لەسەر بنجی خۆی دەڕوێتەوە، ئیدی هەر بۆیە بە هەمان ڕێچكەو ڕێبازی باوكیدا ڕۆیشتووەو هەمان سیناریۆی باوكی لە ژیاندا دووبارە كردووەتەوە، هەربۆیە دەڵێت: ئەگەر من كوڕی ئەو باوكە بم هەر ئەوەم لێ چاوەڕوان دەكرێت، ئەمەش بوو بە هۆی ئەوەی كە سەرەنجام دووچاری هەمان چارەنووسی باوكی ببێت!
«زۆرجار نەوەكان هەمان ئەو كارە دووبارە دەكەنەوە كە باوكیان ئەنجامی دەدات، بۆ وێنە ئەگەر باوكی كەسێكی جگەرەكێش بێت، ئەویش چاو لە باوكی دەكات‌و دەبێتە كەسێكی جگەرەكێش، ئەگەر پێی بڵێی جگەرەكێشان زیانی زۆرە بۆ سەر تەندروستی مرۆڤ، بۆچی لەم تەمەنەوە دەستت داوەتە جگەرەكێشان؟ ڕەنگە لە وەڵامدا بڵێ ئەگەر جگەرەكێشان كارێكی خراپ بووایە باوكم نەیدەكێشا! خۆئەگەر باوكی خاوەنی سەدان ئاكاری جوان بێت، پێی بڵێی ئەی بۆچی تۆش وەكو باوكت ئەو كارە چاكانە ئەنجام نادەیت، لە وەڵامدا دەڵێت: من ناتوانم وەكو باوكم ئەو كارانە ئەنجام بدەم، بە داخەوە زۆرێك لە منداڵان تەنها لە شتە خراپەكاندا چاو لە باوانیان دەكەن»!
بەڵام كوڕی دووەم، كاتێك دەڵێت: چ چاوەڕوانییەك لە من دەكرێت، مەبەستی ئەوەیە كە نابێت من بە هەمان ڕێبازو ڕێچكەی باوكمدا بڕۆم‌و هەمان هەڵەو مێژووی باوكم دووبارە بكەمەوە، بە پێچەوانەوە من پەندم لە ژیانی باوكم وەرگرت، لە دوای بەند كردنی باوكم بە هەر دەردە سەرییەك بێت خوێندنم تەواو كردو دواتر لەم كۆمپانیایە بوومە كارمەندو پاشان بە هۆی دڵسۆزیی‌و لێهاتوویم لە كارەكەمدا پلەی بەڕێوەبەرم پێبەخشرا!
مرۆڤی ژیر هیچ كات بە ڕێگایەكدا ناڕوات كە لە پێش ئەوەوە كەسانێكی دووچاری ڕۆژگارێكی تاریك‌و ناهەموار كردووە، بەڵكو لەوانە پەند وەردەگرێت‌و هەڵەی كەسانی دی دووبارە ناكاتەوە ئەگەرچی نزیكترین كەسیشی بێت!
لێرەوە بۆمان دەردەكەوێت، كە مەرج نییە ئەو كەسەی خۆی خراپەكارەو ڕێگەی هەڵەی گرتووەتە بەر، نەوەكانیشی هەمان هەڵەو سیناریۆ دووبارە بكەنەوەو لە نێو كۆمەڵگەدا به‌ چاوێكی كەم سەیریان بكرێت، بەڵكو دەگونجێت نەوەكانی ئەو كەسە وەكو كوڕی دووەمی ئەم پیاوە دوور بكەونەوە لە ڕێبازی خراپ‌و مێژووی باوانیان دووبارە نەكەنەوە، لە هەمان كاتدا كەسانی زیرەك‌و بە ئەزموون‌و لێهاتوویان لێ دەربچێت، كە بتوانن خزمەتی خۆیان‌و وڵات‌و شارەكەیان بكەن.
بەو هیوایەی هەموومان چاو لە شتە باشەكان بكەین‌و لە خراپەكان دوور بكەوینەوە!
[/size]