ئەیوب ئۆدیشۆ لە دیمانەیەكی تایبەتدا لەگەڵ ئاژانسی كوردستان بۆ دەنگوباس (ئاكانیوز) كە دواتر بڵاو دەكرێتەوە، راگەیاند"تیپەكەمان لە لایەنی توانای جەستەیی و دەروونی و هونەرییەوە بۆ یارییەكانی داهاتووی خولی بژاردەی عێراق ئامادەیە".
ئۆدیشۆ پێش سەفەركردنی یانەكەی بۆ بەغدا، لەبارەی هەواڵی رۆژنامەكانی بەغدا تێڕوانینی خۆی خستەڕوو، پێی وابوو بەبڵاوكردنەوەی هەواڵی بێ بنەما دەیانەوێت كاریگەریی خراپ لەسەر دەروونی یاریزانەكان دروست بكەن.
پتر گوتی، لە سیستەمی پیشەگەریدا نابێ شەرم بكەین و بگرە دەبێ سەرجەم یاریزان و راهێنەر و ئیدارەی یانەكان راستگۆبن لەگەڵ یەكتردا.
راهێنەری یانەی تۆپی پێی هەولێر باس لە سیستەمی پیشەگەریی دەكات و پێی وایە یانەكەی توانیویەتی كارێك بكات، یاریزانەكانی تا رادەیەكی زۆر هەست بەوە بكەن یاریزانی پیشەگەرن، لەم بارەیەوە گوتی "پیشەگەربوون رۆشنبیریی خۆی هەیە و پابەندبوونی زۆری تێدایە، هەروەها یاریزانیش دەبێت هەوڵ بدات پابەند بێت".
]]>