هیوادارم هەولێر سرکەوتن بەدەست بهێنێ ،،بچێتە یاری کۆتایی و لە زەوراش بباتەوە

دەست خۆش

دەست خۆش

بڕیارە سبەى یەكشەم لە میانی یارییەكی دواخراوى خولی نایابی تۆپی پێی عێراقدا، یانەى هەولێر و یانەى روومادی یاریی بكەن، لە یاریگەى یانەى دووەم لە شارى روومادی.

ئەو یارییە بۆ یانەى هەولێر كە 53 خاڵی كۆكردووەتەوە زۆر گرینگە لەبەرئەوەى پێویستی بە بەدەستهێنانی 3 خاڵی یارییەكەیە تا پێشەنگی ریزبەندی لە یانەى سناعە وەربگرێت كە 55 خاڵی هەیە، بۆیە یانەى هەولێر تاكە هەوڵی بردنەوەیە تا بتوانێت بە یەكەمی كۆمەڵەى یانەكانى بگاتە یاریی كۆتایی و بەرامبەر یانەى زەوڕا یاریی بكات.

عومەر مەجید یاریدەرى راهێنەرى یانەى هەولێر بەئاژانسی كوردستان بۆ دەنگوباس (ئاكانیوز)ى راگەیاند، لە یاریی بەرامبەر یانەى كەرخ دوو خاڵی گرینگمان لە دەست دا ئەمەش بەهۆى دابڕانی چەند یاریزانێك لە پێكهاتەى تیپەكەمان، هەروەها كەشوهەواى شارى بەغدا زۆر گەرمە و هی یاریكردن نییە لەلایەكی ترەوە هێرشبەرانی ئێمە چەندان هەلی ئاسانی گۆڵ تۆماركردنیان لە دەست دا.

یانەى هەولێر رۆژى پێنجشەمی رابردوو لە شارى بەغدا لەگەڵ یانەى كەرخ لە یارییەكی دواخراودا یەكسان بوو بەئەنجامی گۆڵێك، ئەگەر یانەى هەولێر سەركەوتنی بەدەست بهێنایە راستەوخۆ دەبووە خاوەن پلیتی گەیشتن بە یاریی كۆتایی.

مەجید زیاتر گوتی، دەستەى راهێنەران بەهەموو خاڵە لاوازەكانى تیپەكەماندا چووەتەوە و هیچ گۆڕانێك لە تیپەكەمان ناكەین لە رووی شێوازى یاریكردنەوەش هەر ئاسایی وەك جاران دەبین، هێڵی بەرگریمان بەهێز دەبێت لەبەرئەوەى یاریزان سەعد عەتییە گەڕاوەتەوە و تەندروستیی هەریەك لە یاریزانان لوئەى سەڵاحی گۆڵكار و مستەفا ئەحمەد زۆرباشە دەتوانن لە یاریی كۆتایی یاریمان بۆ بكەن.

یاریدەرى راهێنەرى یانەى هەولێر ئەوەشی روون كردەوە كە بارودۆخی دەروونیی یاریزانان زۆرباشە و متمانەیەكی زۆرییان بەخۆیان هەیە كە لە یانەى روومادی دەبەنەوە.

جگە لەم یارییە یانەی هەولێر یارییەكی تری دواخراوی بەرامبەر یانەی دهۆك ماوە كە لە دەرەوەی یاریگەی خۆیدا ئەنجامی دەدات.

یانەى هەولێر تا ئێستە 3 جار بووەتە خاوەن نازناوى خولی نایابی عێراق لە ساڵانی 2007 و 2008 و 2009لە وەرزی ئەمساڵیشدا پاڵێوراوە بۆ ئەوەى بۆ جارى چوارەم دڵی جەماوەرەكە بە بەدەستهێنانى نازناوەكە خۆش بكات.