كۆمپانیای‌ به‌رمه‌جیاتی‌ ئه‌له‌كترۆنی‌ زه‌به‌لاح (ئه‌پڵ‌) باره‌گایه‌كی‌ نوێ‌ بۆ كۆمپانیاكه‌ له‌شاری‌ (كۆپرتینۆ) له‌ویلایه‌تی‌ كالیفۆرنیا دروست ده‌كات، كه‌ له‌سه‌ر شێوه‌ی‌ كه‌شتیی‌ ئاسمانییه‌.

تۆڕی‌ هه‌واڵی‌ (سی‌ ئێن ئێن) بڵاویكرده‌وه‌، كۆمپانیای‌ ئه‌پڵ‌ به‌نیازه‌ باره‌گایه‌كی‌ نوێ‌ له‌سه‌ر شێوه‌ی‌ كه‌شتیی‌ ئاسمانی‌‌و له‌سه‌ر پانتایی‌ (2.800.000) پێی‌ چوارگۆشه‌ له‌شاری‌ (كۆپرتینۆ)ی‌ ویلایه‌تی‌ كالیفۆرنیا دروست بكات، كه‌ جێگه‌ی‌ (13) هه‌زار كارمه‌ندی‌ تێدا ده‌بێته‌وه‌‌و هۆڵێكی‌ گه‌وره‌ی‌ شانۆ‌و بنكه‌یه‌كی‌ توێژینه‌وه‌شی‌ تێدا دروست ده‌كرێت، له‌ئێستاشدا نه‌خشه‌ی‌ باره‌گا نوێیه‌كه‌ی‌ ئه‌پڵ‌ له‌لایه‌ن لێپرسراوانی‌ شاره‌كه‌وه‌ خوێندنه‌وه‌ی‌ بۆ ده‌كرێت.

(گێلبه‌رت وۆنگ) عومده‌ی‌ شاری‌ (كۆپرتینۆ) به‌ (سی‌ ئێن ئێن)ی‌ ڕاگه‌یاندووه‌، به‌دڵنیاییه‌وه‌ لێپرسراوانی‌ شاره‌كه‌ نه‌خشه‌ی‌ باره‌گای‌ نوێی‌ كۆمپانیای‌ ئه‌پڵ‌ په‌سه‌ند ده‌كه‌ن‌و پرۆژه‌كه‌ش له‌لایه‌ن شاره‌كانی‌ دراوسێوه‌ پشتگیریی‌ لێده‌كرێت.