ئیسلام بۆ ھەمووان- ئەبوبەکری سدیق (رەزای خودای لەسەر بێت) ناوی عبداللە ی کوڕی ئەبو قوحافەی کوڕی عوسمانی کوڕی عامرە) و بە ئەبوبەکر ناسراوە، پێش ئیسلام ناوی (عبدالکعبة) بوو و دواتر پێغەمبەر (صلی اللە علیە وسلم) ناوی گۆڕیوە و کردوویە بە (عبداللە). ئەبوبەکری سدیق (رەزای خودای لەسەر بێت) لە شاری مەککە لەدایکبووە.. لەپێش ئیسلامدا بە نەرمی و پاکی بەناوبانگ بووە..لە سەرەتای بانگەوازی ئیسلامیدا لە گەورە بازرگانەکانی مەککە بووە. موسڵمانبوونی بۆتە ھاتدەرێکی زۆر کاریگەر و بەھێز کە چەندین کەسی دیکە بێنە ناو ئیسلامەوە. کۆچی نەکردووە بۆ حەبەشە، چونکە لە خزمەت پێغەمبەر (صلی اللە علیە وسلم) دابووە لە مەککە و ھاوەڵی بووە لە کۆچکردنی بۆ شاری مەدینەی پیرۆز. سێ جار تەواوی سامانی خۆی لەپێناو ئایینی بێگەردی ئیسلامدا بەخشیوە. وەک پێغەمبەری خودا (صلی اللە علیە وسلم) لە تەمەنی (٦٣) ساڵیدا کۆچی دوایی کردووە و لە مزگەوتی پێغەمبەر (صلی اللە علیە وسلم) لە مەدینە لە تەکم پێغەمبەری خودا (صلی اللە علیە وسلم) نێژراوە.
فەرموون ئێوە و چەندین وتەی بەنرخی ئەبوبەکری سدیق (رەزای خودای لەسەر بێت):
یەکەم: ئاگات لە مردن بێت، ژیانت پێ دەبەخشرێت.
دووەم: خودای گەورە سوننەت وەرناگرێ، ھەتا فەرز جێبەجێ نەکرێت.
سێیەم: ھەشت شت شێوازی شیرینی ھەشت شتی دیکەن: پاکی زینەتی ھەژارییە، سوپاس زینەتی نیعمەتە، ئارامگرتن زینەتی بەڵاکانە، ھێمنی زینەتی زانستە، خۆبەکەمزانین زینەتی قسەکردنە، زۆرگریان زینەتی لەخواترسانە (تەقوایە)، منەت نەکردن زینەتی چاکەخوازییە، گەردنکەچی (خشوع) زینەتی نوێژە.
چوارەم: صەڵاوات لێدان لەسەر پێغەمبەر (صلی اللە علیە وسلم) تاوان لادەبات ھەروەک چۆن ئاو ئاگر دەکوژێنێتەوە، صەڵاوات لێدان لەسەر پێغەمبەر (صلی اللە علیە وسلم) باشترە لە کۆیلە رزگارکردن.
پێنجەم: تاریکایی چوارن و چوار شتیش دەبن بە رووناکی بۆیان: خۆشەویستی دونیا تاریکییە و لەخواترسان رووناکییە بۆی، تاوانکردن تاریکییە و تەوبە رووناکییە بۆی، گۆڕ تاریکییە و کردەوەی چاک رووناکییە بۆی، دەرگای پەڕینەوە لە قیامەتدا تاریکییە و یەقین رووناکییە بۆی.
شەشەم: نھێنییەکانت تێکەڵی ئاشکراکانت مەکە، چونکە کارەکانت تێکدەچن.
حەوتەم: ھەر کەسێک بڕواتە ناو گۆڕەوە و بێ توێشوو بێت، وەک کەسێک وایە بڕواتە ناو دەریایەکەوە بێ بەلەم و کەشتی بێت.
ھەشتەم: داوا لە کەس مەکە لە پەروەردگارت زیاتر، لە ھیچ مەترسە لە تاوانەکانت زیاتر.
]]>