صه‌ڵواتێ جوانتر له‌ خۆشه‌ویستی                         له‌ سه‌ر ڕه‌سول و هاوڕێی خۆشه‌ویستی

که‌ چرای دینی هه‌ڵکرد دوباره‌                            له‌ کۆردستانی پڕ له‌ په‌ژاره‌

دیسان له‌ کانگای ره‌حمه‌تی باری                         ره‌حمه‌تێ به‌سه‌ر کۆردوستان باری

له‌ ئه‌م وڵاته‌ی پڕ داخ و ده‌رده‌                            هه‌ڵکه‌وتوه‌ رێبوارێ هه‌لبژارده‌

خوا دڵی کرده‌ ئاوێنه‌ی سه‌فا                               تیا دیار بێ شێوه‌ی مۆسته‌فا

شێوه‌که‌ی شێوه‌ی خۆشه‌ویستیه‌                           بانگی یه‌کسانی و مرۆڤ دۆستیه‌

شێوه‌که‌ی شێوه‌ی عه‌شق و ئیمانه‌                        شێوه‌ی سه‌ربه‌رزی هه‌ردوو جیهانه‌

شێوه‌ی دڵسۆزی گه‌ل و وڵاته‌                            شێوه‌ی جوانترین رێگه‌ی خه‌باته‌

شێوه‌ی بێزاری له‌ ناحه‌ساوه‌                              شێوه‌ی باوه‌ر به‌ رۆژێ حه‌ساوه‌

له‌و لای چه‌ن وڵات و سنووره‌وه‌                        له‌ پشت هه‌زار ساڵ مێژووی دووره‌وه‌

خه‌ڵک چۆن بزانن مۆسته‌فا چۆن بوو؟!                دڵی پڕ عه‌شق و پڕ سه‌فا چۆن بوو؟!

خوا رێبوارێ ئه‌نێرێ جارجار                          نیشان با شێوه‌ی ره‌سوولی سه‌ردار

شێوه‌ی محمد وه‌ک خۆره‌تاوه‌                           شێوه‌ی ئه‌م مانگی چوارده‌ی ته‌واوه‌

شه‌وقی دڵی خوی له‌ ئه‌و گرتوه‌                        ئاوا وڵاتی رۆشن کردوه‌

خوایه‌ ئه‌م نووره‌ پڕ تین و تاو که‌                      جێگه‌ی له‌ دڵی گشت پیر ولاو که‌

سه‌رانسه‌ر وڵات رۆشن کاته‌وه‌                         سنوور تا سنوور شه‌وق بداته‌وه‌

خوایه‌ صه‌ڵوات هه‌زار هه‌زاران                       بنێره‌ له‌ سه‌ر ره‌سوولی نازدار

بنێری له‌ سه‌ر یارانی یه‌کسه‌ر                          بوبه‌کرو عمر،عثمان و حیدر