لە نووسینێکیدا کە بۆ سایتەکانی ناردووە، هونەرمەندی ناوداری کورد (شڤان پەروەر) پڕۆتستۆی ئەو کردەوانەی حکوومەتی تورک دەکات، بەوەی ماوەیەکە هەڵمەتی دەستگیرکردنی کەسایەتییە دیارەکانی کوردی دەست پێ کردووە و لە ناویاندا هونەرمەندیشی تێدایە.

ئەو داوا دەکات کە ڕێز لە هونەرمەند بگیرێت و بە توندی ڕەخنەیش لە گرتنی هونەرمەند (نیزامەددین ئاریچ) دەگرێت.

(پەروەر) دەڵێت: ئێمە نابێت بترسین، بە تایبەت هونەرمەندان، چونکە خەباتی ئێمە خەباتە بۆ ئازادی و مافی گەل، لەوە زیاتر هیچ تاوانێکمان نەکردووە، بۆیە پێویستە ڕێز لە هونەرمەند بگیرێت، جا لە هەر شوێنێکی دنیا بێت، بەڵام بەداخەوە ئێستا لە تورکیا هونەرمەندە کوردەکان بێڕێزییان بەرانبەر دەکرێت، ئەمەیش مایەی قبووڵکردن نییە و تەنانەت ئەو کەسانەیشی کە هونەرمەند نین، بە بێتاوان ڕاپێچی زیندان کراون، کە ئەمەیش پێشێلکردنی مافەکانی مرۆڤە.

ئەو لە بەشێکی دیکەی قسەکانیدا، داوا دەکات کە بە زووترین کات هونەرمەند (نیزامەددین) ئازاد بکرێت و داوای لێبووردنیشی لێ بکرێت، چونکە ئەو هونەرمەندێکی دیارە و نابێت بەو شێوەیە مامەڵەی لەگەڵدا بکرێت.

لە کۆتاییشدا دەڵێت: هیچ کەس و حکوومەتێک ئەو مافەی نییە هونەرمەند بترسێنێت و بە خائین و خۆفرۆش ناوزەدی بکات.

zagrostv[/center]