ده‌ست خۆش هه‌ربژیت

جیهاد دڵپاک دەرهێنەری دراماکە بە ئاژانسی کوردستان  گوتی: زنجیرەدرامای "لاپەڕەکانی کەرکووک" لە 15 ئەڵقە پێک هاتووە، من لەم درامایەدا وەک دەرهێنەر و ئەکتەری سەرەکی رۆڵم هەیە، دراماکەش پڕۆژەیەکی هونەریی وەزارەتی رۆشنبیری و لاوانی حکوومەتی هەرێمی کوردستانە بۆ شاری کەرکووک، ماوەی دوو ساڵ خەریکی پێداچوونەوەی دەقەکەی بووین، ئێستەش وێنەگرتنی تەواو بووە و دواتر دێتە مۆنتاجکردن و ئامادە دەبێ بۆ وەشان.

لەبارەی ستاف و ئەکتەرەکانی دراماکەش دڵپاک گوتی: هەموو ستافی نواندن و پشتی کامێرا و بەردەم کامێرا لە هونەرمەندانی کەرکووک پێک هاتوون، ئەکتەری تورکمان و عەرەبی رەسەنی ئەو شارەشمان لەگەڵدایە، ئەمەش هۆی تایبەتی خۆی هەیە، سیناریستەکەش کامەران مەنسوورە، کۆمەڵێک ئەکتەری بە ئەزموون و لاوی کەرکووک و هەندێ لە قوتابییان و مامۆستایانی بەشی شانۆی پەیمانگەی هونەرە جوانەکانی کەرکووکیش رۆڵیان لەم درامایەدا هەیە، نێزیکەی 100 ئەکتەریش بە رۆڵی سەرەکی و کۆمبارس لە دراماکەدا رۆڵ دەبینن، هەروەها سۆلینی کچم و رووناکی هاوسەریشم لەم درامایەدا رۆڵ دەبینن.

لەبارەی بودجەی دراماکەش ئەو دەرهێنەرە گوتی، بودجەی دراماکە پێشتر بۆ راگەیاندنەکان خستووەتە رووکە برێتییە لە 148 ملیۆن دیناری عێراقی، بودجەکەش لەلایەن وەزارەتی رۆشنبیری و لاوانی حکوومەتی هەرێمی کوردستانەوە هاتووەتە دابینکردن.

مەریوان زەنگەنە ئەکتەر و دیکۆریستی دراماکە لەبارەی شێوازی دیکۆر و ریتمی دراماکە گوتی: من کاری دیکۆری دراماکەم بە شێوازێکی تایبەتمەند کردووە کە هیوادارم لە کاتی بینیندا جێگەی رەزامەندیی بینەران و هونەرمەندان بێ.

لە سه‌ر چیڕۆکی دراماکەش زەنگەنە گوتی: باس لە رووداوە سیاسی و کۆمەڵایەتییەکانی ساڵی 1975ی کوردستان و کەرکزوک دەکا کە ئەوکات بەهۆی پیلانێکی ناودەوڵەتییەوە شۆڕشی کورد تووشی نسکۆ بوو، چیڕۆکەکەش تا ساڵی 1983 بەردەوام دەبێ، لەگەڵ ئەو لایەنە سیاسییەی دراماکەشدا پرسی خۆشەویستی و لایەنی کۆمەڵایەتی و باری ئابووریی کەرکووک لەو کاتەدا و لەم درامایەدا دەخرێتە روو.

زنجیرەدرامای "لاپەڕەکانی کەرکووک" یەکەمین ئەزموونی درامای تەلەڤزیۆنیی هونەرمەندی کورد جیهاد دڵپاکە، ئەم درامایە لە رێگەی چیڕۆکێکی خۆشەویستییەوە لە یەکێک لە گەڕەکە کۆنەکانی شاری کەرکووک مێژووی شۆڕش و کارەسات و لایەنە کۆمەڵایەتییەکانی ئەو شارە دەگێڕێتەوە، دراماکە لە نووسینی کامەران مەنسوور، وێنەگرتنی سەروەر مەحموود، مونتاجی رێکەوت محەمەد، هۆنراوەی پێشەکی شێرکۆ بێکەس، ئاواز و موزیکی ئاکۆ عەزیز عینایەت، گوتنی گۆرانییەکەی محەمەد رەئووف کەرکووکییە.

zagrostv[/center]