[center]
[/center]
ئەشێ لای تۆ ڕەنگی زەرد ببێ بە ڕەنگی تێکشان و
ڕەنگی باوێشکدانی پایز، ببێ بە ڕەنگی ئاویلکەی
هیوایەکی کز و نەخۆش، ببێ بە ڕەنگی دابڕان
لەنێوانی دوو گۆرانیی و دوو باڵندە و دوو دڵداردا..
کەچی لای من هەر ئەو ڕەنگە
ئەبێ بە ڕەنگی پێکەنین
ئەبێ بە ڕەنگی دیداری ئێوارانی خۆشەویستی و
بە مانگەشەوی خەوبینین.
هەردوو، کێڵگەی گوڵەبەڕۆژە و زاری خۆر
وام پێ ئەڵێن.
ئەشێ لای تۆ ((شین)) هەر ڕەنگی هەڵفڕین و
شەقژن بێت و ڕەنگی بەرزیی و ڕەنگی یاڵی ئەسپی زەریا و
ڕەنگی نەینووکی ساماڵ و ڕەنگی نیگاکانی ئەوین.
کەچی لای من هەر ئەو ڕەنگە
ئەبێ بە ڕەنگی ترساوی منداڵیم و ڕەنگی پرسیاری
ناو سەرم و گیر ئەخوات و وەک ئەستێرە
لە ژوورێکدا حەپس ئەکرێ.
ڕەنگدان
دیوانی شێرکۆ بێکەس
بەرگی پێنجەم لا 283
]]>
[/size]]]>