(1)

نه‌خێر ، هه‌رگیز باوه‌ڕ ناکه‌م
           چرکه‌یه‌ک بێ تۆ ژیابم

ڕێی تێ ناچێ ،
بێ کووژه‌که‌ی دلۆڤانیت ،
به‌ دۆزه‌خی ئه‌م عومره‌دا
    ڕه‌ت بووبم و هێشتا مابم !

     * * *

که‌ منداڵ بووم ،
گه‌ر تۆ ده‌ستت نه‌گرتبام ،
چۆن ده‌متوانی پێڕه‌وکه‌ بم؟
دره‌نگتریش ،
بۆ تۆ نه‌با ،
من که‌پرۆکه‌م بۆ کێ ده‌کرد له‌ چیلکه‌دار؟

بۆ وه‌ک نۆما ،
به‌ پێی په‌تی ،
ده‌شتم ته‌ی ده‌کرد سه‌روخوار؟

ئه‌گه‌ر شیعریش
ئادگاری وه‌ک تۆ نه‌بایه‌. . .
      وه‌ک تۆ نه‌بایه‌ کتومت ،

چۆن ئه‌و هه‌موو باڵدارانه‌ ،
داده‌بارینه‌ سه‌ر زمان؟
چۆن یه‌که‌م دێر شیعرم ده‌گوت؟!

نه‌خێر ، هه‌رکیز باوه‌ڕ ناکه‌م
چرکه‌یه‌ک بێ تۆ ژیابم

ده‌تناسمه‌وه‌ :
له‌ تۆفانی شه‌ست و سێدا
تۆ بووی . . . شه‌وێک
به‌ره‌و شاخ بووی به‌ ڕێنمام . . .

تۆ بووی له‌ ناو ئه‌ڵقه‌ی گڕدا
شیعره‌کانت چه‌پاڵه‌ دام
تۆ بووی خه‌ونت بۆ زین کردم ،
ڕه‌شمه‌ی بروسکه‌ت له‌ مست نام

ده‌تناسمه‌وه ‌:
هه‌ر جارێکی که‌وشه‌نێکم په‌ڕاندبێ ،
له‌گه‌ڵما بووی هه‌نگاو هه‌نگاو

تۆ بووی مۆته‌ی ترست ده‌کوشت ،
دنه‌ت ده‌دام بۆ ناو ئاگر ، بۆ ناو گه‌رداو

ده‌تناسمه‌وه‌ :نه‌خێر ، هه‌رگیز باوه‌ڕ ناکه‌م
           چرکه‌یه‌ک بێ تۆ ژیابم

ڕێی تێ ناچێ ،
بێ کووژه‌که‌ی دلۆڤانیت ،
به‌ دۆزه‌خی ئه‌م عومره‌دا
ڕه‌ت بووبم و هێشتا مابم !

له‌ههه‌ر جێیه‌ک گرماندبم ،
تۆ چه‌خماخه‌و گه‌واڵه‌ بووی
                  له‌ سه‌رمدا

ئه‌تۆی کاڵای
ئاودامانی گوللـه‌به‌ند بووی
                  له‌ به‌رمدا

نه‌خێر ، هه‌رگیز باوه‌ڕ ناکه‌م
           چرکه‌یه‌ک بێ تۆ ژیابم

ڕێی تێ ناچێ ،
بێ کووژه‌که‌ی دلۆڤانیت ،
به‌ دۆزه‌خی ئه‌م عومره‌دا
ڕه‌ت بووبم و هێشتا مابم !

                 (2)

من پێش تۆ هاتمه‌ دنیا . . .
تا گیانی خۆم ته‌یار که‌م
       بۆ گۆڤه‌ندی ژوانی تۆ

        تا بێ تۆیی بچێژم ،
هه‌رساتێکی بینینت
        بۆ من ببێته‌ په‌رجۆ

       * * *

من پێش تۆ هاتمه‌ دنیا :
تا عومری گوڵ درێژتر ،
گڕی ئاگر په‌تیتر ،
       ته‌می خه‌م ته‌نکتر که‌م

تا فێربم ، به‌ ئاسانی ،
له‌سه‌ر سنگت سه‌وز بم ،
         تۆ له‌ خۆمدا بزر که‌م !

      * * *

من پێش تۆ هاتمه‌ دنیا
تا وابکه‌م کارمامز
   چیدی نه‌سه‌نگرێنه‌وه‌
            له‌ ئاوایی و ده‌راوان

تا وابکه‌م ته‌یر و توار
   جێی چینه‌یان ناو له‌پ بێ و
       نه‌که‌ونه‌ ته‌پکه‌ و داوان

    * * *

من پێش تۆ هاتمه‌ دنیا :
تا بتوانم ، ئازیزم ،
هه‌رکاتێ ئاره‌زوو که‌ی ،
        ئه‌ستێران وه‌ک مۆم پێکه‌م

له‌ تووکی نه‌رمی مه‌لان
             جێژوانێکت بۆ چێکه‌م

    * * *

من پێش تۆ هاتمه‌ دنیا :
تا چاوی خۆم ڕابێنم ،
له‌ تۆفانی ڕه‌نگاندا
          ئادگارت هاوێر بکا

تا گوێچکه‌ی خۆم فێر بکه‌م ،
له‌ باهۆزی ده‌نگاندا
       سرته‌ت گوڵبژێر بکا

    * * *

من پێش تۆ هاتمه‌ دنیا :
تا بۆ نۆته‌ی له‌شی تۆ
      موو به‌مووم هه‌مووی ژێ بێ

تا شایانی ئه‌وه‌ بم ،
کلیلی ته‌خت و تاجی
      خۆشه‌ویستیی تۆم پێ بێ !

عبدالله‌ په‌شێو

29/10/1996
هێڵسنکی