(رووخسار و جوانی مرۆڤ شتێكی كاتییە لەگەڵ بەسەرچوونی رۆژگار ئەویش بەرەو گۆڕان و لە ناوچوون دەچێ) ئەمە سەرەتای قسەكانی توێژەرێكی دەروونییە بەناوی(سەناء تاهیر)،(سەناء) كە ساڵانێكە لەو بوارە كاردەكات لە قسەكانیدا زیاتر جەختی لەسەر كاریگەری میدیا و پەروەردەی سەرەتایی دەكات كاتێك دەڵێت: پەروەردەكردنی منداڵ بەشێوەیەكی نا دروست و بێ بەشبوون لە سۆز و خۆشەویستی و دووری هەردوو رەگەز لەیەكتری وایكردووە لە كۆمەڵگەیەكی وەك ئێمەدا زیاتر بایەخ بە رووخسار لەسەر حیسابی ناوەڕۆك بدرێت، هاوكات میدیاش بەشێوەیەك لە شێوەكان بەتایبەت بەهۆی بانگەشە و بایەخدانی رادەبەدەر بە ریكلامكردن بۆ كەرەستەكانی جوانكاری و بەكارهێنانی كوڕان و كچانی جوان لە ریكلامەكاندا، ئەو فڕۆم و شێوە بیركردنەوەی لە هزری كچان و كوڕاندا قووڵتركردووە.
میدیای كوردی بەهەموو بەشەكانیەوە بەشێوازی جیاجیا مەسەلەی جوانی، بەتایبەت جوانی ئافرەتی خستۆتە بەر باس و لێكۆڵینەوە، هەر ئێمە لە هەفتەنامەی (گـــــــــوڵان)دا چەند جارێك لەمیانی ریپۆرتاژە كۆمەڵایەتییەكاندا باسمان لە جوانی ئافرەت، لە نێوان رووخسارو ناوەڕۆك و كاریگەری جوانی لەسەر پێگەی كۆمەڵایەتی ئافرەتان كردووە، بێگومان ئەو بابەتە مەسەلەیەكە بە ریپۆرتاژێك یان نووسینێك كۆتایی نایەت لەوانەیە لە رووە دەروونی و كۆمەڵایەتیەكەشەوە لێكۆڵینەوە و توێژینەوەی زانستی لەسەر كرابێ، هەر بۆیە بەباشمان زانی ئەم جارەیان باسەكە پێچەوانە بكەینەوە و بپرسین، رووخساری دەرەكی كوڕان تا چەند كاریگەرە؟ ئایا تا چ ئاستێك سەرنجڕاكێشیان پێدەبەخشێت؟ هەروەها (پارە و ئۆتۆمبێل و جلوبەرگ و شێوازی قسەكردن وێنەیەكی جوانی كوڕان نیشانی كچان دەدات؟
دواجار چ كوڕێك بەلای ئەوانەوە سەرنجڕاكێشە؟
- بە بڕوای(سومەیە سامی)ی گۆرانی ئەو حاڵەتە زیاتر لە قۆناخی هەرزەیدا بەرجەستەیە بەسەر هزر و خەیاڵاندا چونكە لەو قۆناخەن گۆڕانكاری جەستەیی و هۆرمۆنی بەسەر مرۆڤدا دێت بە بڕوای(سومەیە) هەر بۆیە هەرزەكارانی لەو تەمەنە دا خولیای لاسایكردنەوەی شێوەی قژ داهێنان و رووخساری ئەستێرە و ناوە گەشەكانی بوار هونەر وەك گۆرانبیژان و ئەكتەرەكان دەبن، هەروەها(سومەیە)، لە دوا قسەكانیدا ئەوەشی گوت كە رەنگ رووخسار و دوور لە كەسایەتی بەهێز و خۆشەویستی بەهایەكی نییە.
   هەڵەیەكی گەورە
(سیروان رەسول) یش لەلای خۆیەوە ئەوە، ناشارێتەوە كە رەنگ و رووخسار رۆڵی هەیە لەوەی كوڕ یان كچ مایەی سەرنجڕاكێشانی دەورووبەرەكەی بێ، بەڵام هۆشداری ئەوەش دەدات كە هەڵەیەكی گەورە دەكەین گەر تەنیا لەسەر ئەو ئەساسە بەرامبەرەكەمان هەڵسەنگێنین و پێی سەرسام بین(من ئەوە بە هەڵەیەكی گەورە دادەنێم، ئەوانەی وا بیردەكەنەوە بێگومان كەموكورتی دەروونی و نەخۆشیان هەیە، چونكە هەندێ جار ئاریشەی كۆمەڵایەتی لێدەكەوێتەوە).
- بەبۆچوونی خاتوو (پەروین عەبدولڵا)ش تاكی كوردی لە بری ئەوەی پۆزەتیڤانە سوود لە جیهانگەرایی و پێشكەوتنی تەكنەلۆژیا وەربگرێ دەبینین ئەو پێشكەوتنە دەرەنجامێكی پێچەوانەی لێكەوتۆتەوە، ئێمە تەنیا بەرواڵەتی سوودمان لە شتەكان وەرگرتووە و ناوەڕۆكمان فەرامۆش كردووە هەروەها (پەروین) ئاماژەی بەوەشدا مرۆڤ هەر چەند جوان و روواڵەت و سەرنجڕاكێش بێ كە پیربوو ناشرین دەبێ، بۆیە ئەوە هزر و نافی مرۆڤە دەبێ سەرنجمان رابكێشێ نەك جوانی و سیمای كاتی و بەسەرچوو.
ماكیاژی كوڕان
- بەپێچەوانەی بۆچوونەكانی پێشوو(گـــــــــوڵاڵە) قوتابی قۆناخی یەكەمی - راگەیاندن رای وابوو سەرەتا یەكەمین شت كە لە كوڕێكدا سەرنجی رابكێشێ سیما و رووخسارییەتی(ئینجا دوای رووخسار هەوڵی تێگەیشتن لە ناخی دەدەم، ئایا چۆن سەیرم و دەكاو بیر دەكاتەوە رای بەرامبەر چییە و وەك مێینەیەك چۆن تەماشام دەكات؟! هەر بە ڕای ئەو قوتابییە ناكرێ بڵێین كچانی بایەخ بە سیمای دەرەوەی كوڕان نادەن و بە هەندی وەرناگرن، هاوكات كەسایەتی و زانایی لە قسەكردن و موجامەلە ماكیاژی كوڕانن و لەلای كچان سەرنجڕاكێشیان دەكات .
-(كەسایەتییەكی) بەهێز و رۆشنبیر و قسەزان پێشە رووخسارێكی بۆیە كراوە، بە ماكیاژ و پارەو جلوبەرگ و ئۆتۆمبێل) (هاوژین موفەق) قوتابی لە قۆناخی دووەمی بەشی مێژوو جگە لەو قسانە هێمای بۆ ئەوەش كرد كە یەكێك لە فاكتەرە سەرەكییەكانی بەرزی رێژەی تەڵاق و زۆربوونی ئاریشە كۆمەڵایەتییەكان، هەڵخەڵەتانی كچانە بە رووخسار و فەرامۆشكردنی ناخ و ماهیەتی رەگەزی بەرامبەر، هەر بۆیە (هاوژین) لە هاوڕەگەزەكانی دەخوازێ ئیتر بە جۆرێكی دیكە بیر بكەنەوە و هەرگیز جەستە و رووخساری جوانی كوڕان پارە و ئۆتۆمبێلیان نەكەنە پێوەر لە هەڵبژاردنی خۆشەویست یان هاوتەمەنی ژیانیان.
   رووخساری هیچ كوڕێك سەرنجی رانەكێشاوم
- بە قسەی (فاتیمە موراد)ی قوتابی بەشی كۆمەڵناسیش تا ئێستا رووخساری هیچ كوڕێك سەرنجی رانەكێشاوە(مەرج نییە هەموو كچان بایەخ بە سیماو رواڵەتی دەرەوەی كوڕان و شێوازی پرچ داهێنان و شێوەی جلوبەرگیان بدەن) هەر بە بۆچوونی(فاتیمە) لێرەدا تەمەن حوكم لەسەر شتەكان دەكات،(فاتیمە) پێی وایە لە تەمەنی هەرزەییدا ئەو پێوەرو شتانە خرووری بەرچاویان هەیە و هەر كچێك بەشێوە و جۆرە جوانی و رووخسارێكی كوڕان سەرسامە، بەڵام دواتر كە كامڵ دەبێ و بیر لە هاوسەرگیری دەكاتەوە ئەو پێوەرانە بەرەو كاڵ بوونەوە دەڕۆن عەقڵ بەسەر دڵ و خەیاڵدا زاڵ دەبێ گەر بەردەوام بەو شێوەیە بیر بكەینەوە، هەڵەیەكی گەورە دەكەین چونكە رۆژێك دادێت جوانی و رووخسار نامێنێ بەو پێورانگە بێ دەبێ خۆشەویستیمان بۆ هاوژیانیشمان نەمێنێ).
- دواجار(چیمەن محەمەد) لە قۆناخی دووەمی هەمان بەشی دەڵێت: لە كۆمەڵگە رۆژهەڵاتییەكاندا ئەوەندە ئیعتیبار بو جوانی و رووخسار دەكرێ بۆ ئەو ئیعتیبارە بۆ كەسایەتی و رۆشنبیری مرۆڤ داناندرێ، بە بڕوای ئەو قوتابییە، داخراوی كۆمەڵگە و دووری كوڕان و كچان لە یەكتری وایكردووە ئەوان تەنیا لەرێگەی خەیاڵ رووخسارەوە هەست بە وجود و جوانی یەكتری بكەن، لە كاتێكدا ناخ و كەسایەتی مرۆڤیش پێكهێنەرێكی دیكەی وجودی مرۆڤن و فەرامۆشكردنیان هەڵاتنە لە راستی و واقیع.

سه‌رچاوه‌:هه‌فته‌نامه‌ی گوڵان