ئاكانیوز:راهێنەری تۆپی پێی یانەی هەولێر دوینئ چوارشەم رای گەیاند ئەو یاریزانە نوێیانەی گرێبەستیان لەگەڵدا ئیمزا كرابوو پێوەندییان بەیەكەی مەشقی یانەكە كرد كە ئەمڕۆ لە دووەم یاریگەی فرەنسۆ هەریری لە هەولێر بەڕێوە چوو.

ئەیووب ئۆدیشۆ دوینئ چوارشەمه‌ بەئاژانسی كوردستان بۆ دەنگوباس (ئاكانیوز)ی راگەیاند، یاریزانە نوێیەكان كە ئەمڕۆ لە مەشقی تیپەكە بەشداریان كرد برێتی بوون لە عەلی خزەیر، سەعد عەتییە، نەبیل سەباح، حەیدەر عەبدولئەمیر، محەمەد گاسد و سەعد عەبدولئەمیر بێجگە لە یاریزانە كۆنەكانی تیپەكە كە بۆندەكانیان بۆ وەرزێكی تر نوێ كرایەوە.

روونی كردەوە، لەگەڵ دەستەی كارگێڕیی یانەی هەولێر كۆكین لەسەر هێنانی یاریزانی بیانی بۆ یانەكە لەوەرزی داهاتوو و بڕیارە بۆ ئەمجارە روو لە یاریزانانی وڵاتانی سۆشیالیستی پێشوو بكەین وەك ئۆكرانیا، سڕبیا و رۆمانیا و لە هەولێر تاقیكردنەوەیان بۆ بكەین بەر لە ئیمزاكردنی گرێبەست لەگەڵیاندا.

ئۆدیشۆ ئاماژەی بۆ ئەوە كرد، ئیمزاكردنی گرێبەست لەگەڵ یاریزانی بیانی بەپێی پێویستی دەبێ وەك هێرشبەر و ناوەڕاست كە تیپەكەمان پێویستی بەیاریزان لەو دوو شوێنەدا هەیە بۆ ئەوەی ببێتە تیپێكی نموونەیی و كێبەركێ لەسەر نازناوی وەرزی داهاتووی خولی نایابی عێراق بكات كە بڕیارە لە تشرینی دووەم/نۆڤێمبەری داهاتوو دەست پێبكات.

هەژیی گۆتنە لە وەرزی 2009-2010ی رابردوو یانەی هەولێر نەیتوانی پارێزگاری لە نازناوی پاڵەوانی خوڵی نایابی عێراق بكات و تەنیا پلەی چوارەمی لە چوارگۆشەی زێڕین پێ بڕا.