ئه‌وه‌ی به‌ به‌ڵگه‌نامه‌ی ساخته‌، خۆی نه‌گه‌یاندبێته‌ ئاسته‌به‌رزه‌كانی خوێندن و قۆناغ به‌ قۆناغ سه‌ركه‌وتبێت، ده‌بێت وانه‌ی (دارا دوو داری دی)ی له‌بیر بێت. دارا نازانم بۆ، دوو داری ده‌دی و دوو داره‌كه‌ش دوور دوور بوون. خۆ ده‌كرا، دارا هه‌ر یه‌ك دار ببینێت و داره‌كه‌ش له‌ پاركی ته‌نیشت ماڵه‌كه‌یان بێت. به‌ڵام مامۆستا ئه‌م قسانه‌ی قبووڵ نه‌ده‌كرد و هه‌ر جه‌ختی لێ ده‌كرده‌وه‌، كه‌ (دارا دوو داری دی. دوو داری دوور دوور).

ئێستا ده‌زانم، كه‌ ئه‌و پێداگرییه‌ی مامۆستا، له‌ سه‌ر (دوو) و له‌سه‌ر(دوور)، بۆ ئه‌وه‌ بوو، كه‌ ئێمه‌ی قوتابی، فێری ده‌نگی (وو) بین له‌ زمانی كوردیدا. مامۆستا هه‌وڵی ده‌دا، فێرمان كات، كه‌ له‌ ژیانی داهاتووماندا، جیاوازی بخه‌ینه‌ نێوان، (دوو) و (دو) و (دۆ)، بۆیه‌ش له‌ وانه‌كه‌یتردا، به‌ ئه‌نقه‌ست دۆی داده‌ی ده‌ڕژاند!

كه‌چی پاش هێنده‌ ساڵ، بینینی (دوو داری دوور)و رژاندنی به‌رده‌وامی (دۆی داده‌)، هێشتا نووسه‌ر و رۆژنامه‌نووسان له‌ ده‌زگاكانی راگه‌یاندنی كوردی، به‌رده‌وام (كه‌ركووك) به‌ كه‌ركوك ده‌نووسن و (ئه‌نجومه‌ن) به‌ ئه‌نجوومه‌ن تایپ ده‌كه‌ن و(دوكتۆر) به‌ دكتۆر بڵاو ئه‌كه‌نه‌وه‌و له‌ هه‌مووی خراپتر، كاربه‌ده‌سته‌كانمان، (گه‌ل) به‌ گه‌ڵ بێژ ئه‌كه‌ن . ئه‌رێ گه‌لۆ چیبكه‌ین؟

وه‌رن با جارێكیتر، هه‌ریه‌كه‌و هه‌زار جار، بنووسینه‌وه‌، (دارا دوو داری دی. دوو داری دوور دوور).

                                                            س : خةم